ECLESIÁSTICO 40
40
Runaj llakiynin
1Diosqa wakicherqa sinch'i llakiyta runaspaj. Runaqa llakiyniyoj mamampa wijsanmanta llojsisqanmantapacha, tukuy runaspa mamankoj sonqonman kutirimunankukama.
2Llakiywan unanchakun runaqa. Sonqon manchachikuywan junt'a kashan. Phutikuspataj wañupunanta suyan.
3Jatun tiyanapi tiyakojqa llakikun. Jallp'a chaupipi, ushpha chaupipi tiyakojpis llakikullantaj.
4Sumaj p'achallisqa pilluyoj runapis llakikullan. Jinallataj, qara p'achayoj kajpis. Tukuyninku llakikunku, envidianakunku, phutisqas purinku wañuymanta manchachikuspa. Phiñanakunkutaj maqanakunkutaj.
5Runaqa puñukunampaj sirikuspapis, llakisqallapuni.
6Tumpata samariyta munashan. Jinapis, mosqoynimpi ansaqeyashan. Puñusqamanta manchachikushan. Manchachikuspataj ayqeshan.
7Salvakushajtinña payta qhatejmanta, rijch'arimpacha. Chantaqa, sonqon samarin rikuspa mosqoylla kasqanta.
8Ajina kanku tukuypuni, runastaj uywastaj. Astawanraj, qanchis kutikama juchasapasqa.
9Juchasapaj patanman chayman onqoy. Runas wañuchinakunku, phiñanakunku, maqanakunku ima. Runasman chayamuntaj llakiy, yarqhay, wañuy ima.
10Chaynejta sajra runas chinkayman chayanku.
11Imachus jallp'amanta jamun, jallp'aman kutipullantaj. Cielomantaj kutipun imachus cielomanta jamojpis.
12Runasqa mana lluk'enqankuñachu nitaj mana cheqan kajta ruwanqankuñachu. Cheqan kajta ruwayqa mana tukukonqachu.
13Wist'u sonqoyojpa imasnin wayq'o jina ririkaponqa. Imaynachus qhon qhon t'ojyan, ajina t'ojyanqa qhapaj runaj kapuynin.
14Runaqa jap'ikusqanwan kusikun. Jinapis, juchasapaqa chinkaymampuni chayanqa.
15Mana creejkunaj wawasnin rijch'akunku pisi ramasniyoj sach'aman. Mana allin sapheqa qaqas ukhullapi wiñan. Ajinallataj mana creej runapis.
16Runasqa ñaupajtaraj soqososta sik'inku, mayu cantopi kashanku chaykunata. Qhepantaraj qhorasta sik'imunku.
17K'acha sonqoyoj runaqa sinch'ita sayanqa. Cheqan sonqoyoj runa mana kuyurenqachu.
Imachus tukuy imamanta aswan sumaj
18Mana qhellakoj llank'aj runa sumajta kausan. Jinapis, aswan kusisqa kanqa sichus qoritachus qolqetachus tarikunman chayqa.
19Wawasniyoj runaj sutenqa mana chinkanchu. Chantapis, llajtata sayarichej runaj sutimpis, mana chinkallantajchu. Jinapis, aswan sumaj kanman runapaj yachayniyoj kay.
20Vinotaj takiytaj runaj sonqonta kusichin. Astawanraj kusikun yachayniyoj kayta munaj runa.
21Qenataj guitarrataj sumajta yanapanku takejman. Jinapis, aswan sumaj cheqanta parlaj simeqa.
22Runaj ñawenqa k'acha kajta rikuyta munan. Jinapis, aswan k'acha q'omer pampa.
23Runaqa, imallatapis ruwanan kajtin, amigonwan yanapachikun. Jinapis, paypajqa, warmimpuni aswan walej.
24Runaqa, pisichikojtin, wauqenmanchus uj yanapajninmanchus k'askakun. Jinapis, paypajqa aswan walej kanman qolqeta qonankuta.
25Qoripis qolqepis sinch'ita sayachinku runata. Jinapis, aswan sinch'itaraj sayachin amigompa allin parlaykusqan.
26Runaqa atiyniyojtaj qhapajtaj kaspa, may kusisqa sonqoyojmin. Jinapis, aswan kusisqa kanman sichus Diosta respetakunman chayqa. Diosta respetakojqa mana ni imamanta pisichikunchu. Mana ni piwan yanapachikunmanñachu.
27Diosta respetakojqa t'ikayoj chajraman rijch'akun. Mana ni pi aswan kusisqachu paymantaqa.
Ama wajkunaman k'askakuychu kausanaykipaj
28Wawáy, ama mañarikuychu qolqeta kausanaykipaj. Ajina kausaymantaqa, aswan walej kanman wañupuy.
29Runa masinta mikhunanta qhawaj runa, imapaj kausashanri? Wajpa mikhunanmanta mikhojqa p'enqayniyoj rikhurin. Chayta ruwanan kajtin, umayoj runa sonqonta nanachikun.
30Mana umayoj runaqa pillamantapis mañarikun. Jinapis, wijsampi nina jina k'ajarishan.
Currently Selected:
ECLESIÁSTICO 40: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.