ECLESIÁSTICO 39
39
1Mana jinachu pichus tukuy sonqo yachakun Diospa leyninta. Payqa yachan imatachus ñaupa runas yacharqanku chayta. Profetaspa nisqasninkutapis yachallan.
2Payqa estudian imatachus nerqanku ñaupa yachayniyoj runas. Yachaytataj munan aswan difícil yuyaykunatapis.
3Payqa yachayta munan tukuy palabraspa ukhunta. Aswan difícil tapukunasmampis kutichikuyta munan.
4Jatuchaj runasta yanapan payqa. Purikuntaj kurajkunawan khuska. Payqa karu llajtasman kachaykukun. Yachantaj imachus allintapis mana allintapis.
5Tutamantapacha mask'an patapi kaj Señorta, payta ruwarqa chayta. Diosman qayllaspa perdonta mañakun juchasninmanta.
6Tukuy Atiyniyoj Señor munajtin, yachayniyoj rikhurenqa. Yachayniyoj palabrasqa para jina siminmanta urmamonqa. Mañakusqampitaj Señorqa yupaychanqa.
7Sumaj yuyayniyoj consejosta qonqa. Yachaytataj munanqa Diospa nisqasninta.
8Wajkunata k'anchaykonqa yachakusqanwan. Sonqon junt'asqa kanqa Diospa leyninwan, Señorwan trato ruwasqanwan.
9Ashkha runas yachasqanta yuyarikonqankupuni. Sutin wiñaypaj rejsisqa kanqa.
10Runasqa paypa yachayninmanta parlanqanku. Ayllumpi payta alabaspa takenqanku.
11Kausaynimpi waranqa runamantaqa aswan rejsisqa kanqa. Wañupuytawanqa, sutenqa rejsisqallapuni kanqa.
Diosta yupaychana
12Astawanraj tiyan umaypi ninaypaj. Chaywanqa, purapi killa jina junt'asqa kashani.
13Uyariwaychej, Diosman k'umuykoj wawasniy. Imaynachus rosa t'ikarin larq'a cantopi, ajinallataj qankunapis.
14Incienso jina q'apankichej. Lirio jinataj t'ikarinkichej. Qhapariychej ujllapi takinaykichejpaj. Señorta yupaychaychej tukuy ruwasqanmanta.
15Sutinta jatunman churaychej. Graciasta qoychej alabayachejtaj, takispa, arpasta waqachispa. Niychejtaj kay jinata:
16Diospa ruwasqan sumajpuni. Payqa tiempompi runaman qon imatachus necesitasqanta.
17Siminta kicharejtin yakusqa tantakamorqa. Parlajtintaj, qocha kicharikun.
18Munasqanqa chaypacha ruwakun. Runata salvayta munajtenqa, salvayta atillan.
19Payqa rikullan runas ruwasqankuta. Ñawisnimpaj mana ni ima pakasqachu.
20Wiñaymantapacha payqa tukuy imata qhawashampuni. Atiynenqa, runata salvanampaj mana tukukunchu. Paypajqa mana ni ima juch'uychu, nitaj ancha jatunchu, nitaj mana atikojqa.
21Ama tapuychu: Imapajtaj kay? Imapajtaj jaqay?, nispa. Tukuy ima imallapajpis sirvin.
22Diospa khuyakuynin Nilo mayu jina wasaykamun, jallp'atataj qarpan Eufrates mayu jina.
23Jinallataj, phiñakojtin, runasta jallp'asninkumanta qharqon. Chantapis, milluyachintaj sumaj qarpasqa jallp'ata.
24Sumaj sonqoyoj runasman allin ñanta rikuchin. Sajra runasmantaj misk'ana ñanta rikuchin.
25Qallariymantapacha k'acha runaspaj sumaj kajta wakichiporqa. Sajra runasmantaj sumaj kajta mana allin sumaj kajtataj qorqa, chajrusqata.
26Runa kausanampaj kaykuna kanampuni tiyan: Yaku, nina, fierro, kachi, jak'u, leche, lachiwana misk'i, vino, aceite, p'achataj.
27Tukuy chaykunaqa sumajmin k'acha sonqoyojkunapaj. Chaykunataj sajra sonqoyojkunapajqa mana allinman tukun.
28Wakin wayrasta Diosqa ruwarqa runasta llakichinampaj. Chay wayrasqa phiñakuyninkupi orqosta sikinkumanta sik'imunku. Llakichiy tiempo chayamojtin, jatun phiñakuywan urmaykamunku.
29Nina, chijchi, yarqhay, onqoy ima, ruwasqas karqanku runasta llakichinankupaj.
30Phiña animalkuna, alacranes, kataris, sinch'i maqanakus ima, sajra runasta tukuchinku. Chaykunaqa ruwasqa karqa runa llakichisqa kanampaj. Chaytaqa Dios waqaychashan llakichiy tiempopaj.
31Dios chaykunata wajyajtin, kusisqas uyarikunku. Ch'inmantataj ruwallanku imatachus ruwananku tiyan chayta.
32Kaytaqa noqa yachakorqani allinta qallariymantapacha. Umaypi jap'ispataj escribini.
33Diospa ruwasqan sumajpuni. Payqa, tiempo kajtin runaman qollan imatachus pisichikusqanta.
34Amapuni niychejchu: Kayqa jaqaymanta aswan sumaj, nispa. Tukuy imaqa tiempompi sumaj kanqa.
35Chayrayku, takiychej ari tukuy sonqo, yupaychaychejtaj santo Diospa sutinta.
Currently Selected:
ECLESIÁSTICO 39: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.