ECLESIÁSTICO 38
38
Onqoymantawan wañuymantawan
1Medicota respetowan qhaway. Paywan jampichikunayki tiyan. Chantaqa, paypis Diosmanta jamun.
2Medicoqa Diosmanta jap'ikun yachakusqanta. Kamachejmantataj pagonta jap'ikun.
3Yachakusqanrayku medicoqa respetachikun. Chayrayku, uman oqharisqa rikhurimun kurajkunaj ñaupaqenkupi.
4Diosqa p'utuchimun jallp'amanta jampina qhorasta. Umayoj runaqa chaykunata mana q'opa jinallatachu qhawan.
5Diosqa uj k'ulluwan misk'iyacherqa yakuta, k'ulloj atiyninta rikuchinanrayku.
6Diosqa runasta umayojta ruwarqa, payta yupaychanankupaj jatuchaj ruwasqasninmanta.
7Chaykunawan medicoqa nanayta thañichin, boticariotaj jampista wakichin.
8Ajinamanta, Diospa ruwasqasnin mana chinkanchu. Runastaj sanos kayta atinku.
9Wawáy, onqosqa kajtiyki pacienciakullay. Diosmanta mañakuy, paytaj sanoyachisonqa.
10Sajra kaymanta ayqey. Jinallataj, mana cheqan kajmantapis. Chantaqa, sonqoykipi tukuy juchasta chinkachiy.
11Diosman jayway sumachej rikuchikusta. Tukuy sonqo qollay atisqaykiman jina.
12Jinapis, medicotapis wajyallay. Ama qhesachaychu. Paytapis necesitallanki ari.
13Ashkha kutis paylla sanoyachisonqa.
14Paypis Diosmanta mañakun niyta atinampaj imamantachus runa onqosqa kashan, atinampajtaj allinta jampiyta.
15Chayrayku runaqa Diospa contrampi juchallikun mana munajtin doctorwan rikuchikuyta.
16Wawáy, pipis wañojtin, paypaj Diosmanta mañakuy. Llakisqa kasqaykita rikuchiy. Ruwaytaj imachus p'ampakupi ruwakun chayta. P'ampaykuytaj costumbreman jina. Chantaqa, runas tantakojtinku waqay, ama ripuychu.
17Wawáy, waqaspa lutokuspataj p'ampaykuy maychus kajman jina. Uj diata iskay diatachus waqallay. Chaymantataj sonqochakuy.
18Llakeyqa wañuyman apan. Phuteyqa runata llauch'iyachin.
19Ama wañojpi piensayñachu. Jamoj p'unchaykunapi yuyay.
20Ama wañojpi piensayñachu. Payqa mana ni imata suyananchu tiyan. Yuyakusqayki payta mana yanapanchu, qantataj dañosunki.
21Qampis pay jina wañunki. Qayna pay wañorqa, q'ayaqa qanñataj.
22Wañusqa samarishanña. Ajinallataj, paymanta yuyakusqanchej samarillachuntaj. Qantaj sonqochakuy. Payqa wañusqaña.
Llank'aymantawan yachaytawan
23Letrasniyojpa yachaynin ashkhayan maypachachus tiempoyoj. Pichus pisi llank'ayniyoj, yachayniyojman tukonqa.
24Pichus llank'allashampuni mana yachayniyoj kanmanchu. Payqa wakata thaskichin. Uywasllawan kashan. Chayllawan pay kusikun.
25Payqa usqhayta rijch'arin corralta pichananrayku. Payqa tarpuyllata yuyashan.
26Ajinallataj, ima laya llank'ajkunapis artesanojpis. Chaykuna tuta p'unchay llank'ashallankupuni. Sellosta ruwashaspa mosoj dibujosta mask'ashankupuni. Rikusqantaqa sumajtapuni ruwayta munashan. Trabajontaqa usqhayta tukuyta munashan.
27Ajinallataj herreropis pichus diantinta tiyashan yunque ladopi. Umanqa fierrollapi churasqa kashan. Q'aran ch'akisqaña q'osñirayku ninaraykutaj. Ruphaytaj jump'ichishan. Ningrisnin uyarishampuni martillo takasqanta. Ñawisnin qhawashan imatachus ruwanan tiyan. Paypis tukuyta munashampuni. Afanwan ruwashan tukunanrayku.
28Ajinallataj pichus llink'imanta k'anallasta ruwan. Payqa chakisninwan tornota muyurichishan. Umanqa chayllapi churasqa kashan. Chay diallataj tukuyta munashan yurusta.
29Payqa llamp'uchan t'uruta makisninwan, saruntaj chakisninwan. Payqa barnizaykun k'anallasta. Tukuytawantaj hornota pichaykun.
30Tukuy chaykunaqa makisninkuwan trabajanku. Sapa ujtaj sumajta oficionta yachan.
31Artesanos mana kajtenqa, runasqa mana atinkumanchu kausayta. Nitaj ni pipis waj lugarman kachaykukuyta atinmanchu.
32Jina kajtimpis, mana wajyasqaschu kanqanku kamachejkuna kanankupaj. Nitaj ni imata niyta atenqankuchu runa tantakuypi. Nitaj jueces jina sayanqankuchu, mana cheqanyachiyta yachasqankurayku.
33Paykunaqa mana yachayniyojchu kanku. Manapuni cheqanyachiyta atinkumanchu. Nitaj yachay palabrasta parlankuchu. Chaykuna runa masisninkuta yanapanku makisninkuwan trabajaspa.
Currently Selected:
ECLESIÁSTICO 38: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.