SAN MATEO 1
QCHSB

SAN MATEO 1

1
Jesuspa ñaupa tatasnimpa sutisnin
(Lc 3.23-38)
1Jesucristoj ñaupa tatasnimpa mirayninmanta libro. Jesusqa karqa Davidpa ayllunmanta, Abrahampa ayllunmantawan.
2Abraham, Isaacpa tatan karqa, Isaactaj Jacobpata. Jacobtajrí Judajta, wauqesnimpatawan tatan karqa. 3Judá, Farespata Zarajtawan tatanku karqa, mamankutaj Tamar karqa, Farestaj Esrompata tatan, Esromtaj Arampata. 4Aramtaj Aminadadpa tatan karqa, Aminadabtaj Naasompata, Naasontaj Salmompata. 5Salmontaj Boozpa tatan karqa, mamantaj Rahab karqa. Booztaj Obedpa tatan karqa, mamantaj Rut. Obedtaj Isaejpata tatan karqa. 6Isaitaj rey Davidpa tatan karqa. Rey Davidtaj Salomompa tatan karqa, Uriaspa warmintaj Salomompa maman karqa.
7Salomontaj Roboampa tatan karqa, Roboamtaj Abiaspata, Abiastaj Asajta. 8Asataj Josafatpa tatan karqa, Josafattaj Jorampata, Joramtajrí Uziaspata. 9Uziastaj Jotampa tatan karqa, Jotamtaj Ajaspata, Acaztaj Ezequiaspata tatan karqa. 10Ezequiastaj Manasespa tatan karqa, Manasestajrí Amompata, Amontaj Josiaspata. 11Josiastaj Jeconiaspa tatan karqa, wauqesnimpatawan; israelitasta Babiloniaman apashajtinku.
12Babiloniaman risqankumantaña Jeconías Salatielpa tatan karqa, Salatieltaj Zorobabelpata. 13Zorobabeltaj Abiudpa tatan karqa. Abiudtaj Eliaquimpata, paytaj Azorpa tatan karqa. 14Azortaj Sadocpa tatan karqa, Sadoctaj Aquimpata, Aquimtajrí Eliudpata. 15Eliudtaj Eleazarpa tatan karqa, Eleazartaj Matampata, Matantajrí Jacobpata. 16Jacobtaj Joséj tatan karqa, Josetaj Maríaj qosan, Mariataj Jesuspa maman, Cristo sutichasqajta.
17Ajinamanta, Abrahammanta Davidkama chunka tawayoj miraykuna karqa. Davidmantapacha, israelitas Babiloniaman pusachikusqankukama, chunka tawayoj miraykuna. Chay pachamantataj Cristokama, waj chunka tawayoj miraykuna kallarqataj.
Jesuspa nacisqan
(Lc 2.1-7)
18Jesucristoj nacisqantaj kay jina karqa: María mamanqa mañaqasqa karqa Josewan casarakunampaj. Manaraj khuska tiyakushajtinkutaj, Mariaqa wijsallisqa rikhurerqa Santo Espiritunejta. 19José qosantaj cheqan runa kaspa, María warminta ama p'enqaypi rikhurichinanrayku, pakayllamanta saqerpayayta munasharqa. 20Kay imapi José yuyashajtintaj, Señorpa angelnin payman rikhurerqa mosqoypi, nerqataj: José, Davidpa ayllunmanta kaj, ama manchachikuychu, María warmiykita jap'ikapullay; imaraykuchus paypi kaj wawaqa Santo Espiritumantamin. 21Mariataj uj qhari wawata nacichikonqa, sutichankitaj Jesús sutiwan; imaraykuchus pay ayllunta salvanqa juchasninmanta.
22Kay tukuy ima karqa Señorpa nisqan junt'akunampaj, profetanejta nisqanman jina: 23Uj sipas, manaraj qharita rejsej, wijsallikonqa, nacichikonqataj uj qhari wawata. Paytataj Emanuel sutiwan sutichanki. Kay sutitaj niyta munan: Dios noqanchejwan kashan.
24Josetaj puñusqanmanta rijch'arispa, Señorpa angelnin kamachisqanman jina ruwarqa, María warmintataj jap'ikaporqa. 25María warminwanqa, manaraj casado jinachu tiyakusharqa wawata nacichikunankama; paytaj wawataqa Jesús sutiwan suticharqa.

Qheshwa Biblia DC © Sociedades Bíblicas Unidas, 1986.

Learn More About Qheshwa Biblia DC