2 PEDRO 1
1
Pedroj napaykuynin
1Noqa, Simón Pedro, Jesucristoj kamachin apostolnintaj kani. Dios Tataj cheqa kaynimpi, Salvawajninchej Jesucristopitaj, chay sumaj creeyta noqayku jina tarinkichej. Qankunaman kay cartata apachimuykichej. 2Khuyakuy, sonqo tiyasqa kaytaj qankunapaj ashkhayachun, Diosta rejsinaykichejpaj, Señor Jesucristotawan.
Cristota qhatakojkunaj wiñayninku
3Diosqa atiyninrayku, kausayninchejpaj chay tukuy imasta qowanchej, payta yupaychananchejpaj, payta rejsisqanchejrayku, pichus wajyawarqanchej jatun kayninwan, atiyninwantaj. 4Chay imasnejta Dios niwanchej, qhapaj, jatuchaj imasta qonawanchejta; chay qosqaykichej nisqanejta, qankuna Diospa kayninta chayaqepaj jap'inaykichejta; chantá, kay mundoj millay kausayninmanta ayqenaykichejpaj, aychaj sajra munayninmanta ima. 5Chayrayku qankunapis tukuy k'uchi kayta churaspa, feniykichejman yapaychej atiyta, atiymantaj yachayta. 6-7Yachaymantaj yapaychej, qankuna kikin juchata atipayta; juchata atipaymantaj pacienciata, pacienciamantaj, Diosta yupaychayta, Diosta yupaychaymantaj, hermanospura kausakuyta; hermanospura kausakuymantaj munakuyta.
8Chay imaschus qankunapi kashanku, ashkhayashankutaj chayqa, mana saqesunkichejchu qhellas kanaykichejta, nitaj Señorninchej Jesucristota mana poqoyniyoj rejsinaykichejta. 9Pejpatachus chay imas mana tiyapunchu chayqa, chay runaqa pisi ñawiyoj, nitaj rikunñachu; ñaupa juchasnin llimphuchasqa kasqanta qonqapusqanrayku. 10Chayrayku hermanos, wajyasqas ajllasqastaj kasqaykichejpi sumajta sayaychej. Chaykunata ruwaspa mana jayk'ajpis urmankichejchu. 11Chay jinamanta, Señor Jesucristo Salvadorninchejpa wiñay reinonman yaykunaqa allin, sumaj kichasqa qankunapaj kanqa.
12Chayrayku mana qonqasajpunichu kay imasta qankunaman yuyarichiyta. Qankunarí, ñapis chayta yachankichejña. Kunantaj cheqa kajpi sinch'ita sayashankichej. 13Noqa yuyani cheqan kasqanta kay aycha cuerpoypi kashaspa yuyayniykichejta rijch'arichinay, sonqochanaytaj. 14Yachakuniña pisi p'unchaymantawan kay aycha cuerpoyta saqepunayta. Señorninchej Jesucristopuni jinata sut'inchawan. 15Chayrayku, ruwallasajpuni atisqayta, wañupojtiykamataj, qankuna kay imasmanta sapa kuti yuyarikunaykichejpaj.
Cristoj jatun k'anchayninta rikojkuna
16Señorninchej Jesucristoj atiyninmanta, jamuyninmantawan qankunaman yachacherqayku chay imasqa, mana wakichisqa, nitaj qhasi mana kaj parlaywanchu, astawanqa, noqaykupuni paypa jatun k'anchayninta rikorqayku. 17Maypachachus payqa Dios Tatamanta jap'erqa allin qhawasqa kayta, jatun kayta ima; chaypacha uj jatun k'anchaypi janaj pachamanta Dios parlamorqa: Kaymin munasqa Chureyqa. Paywan ancha kusisqa kani, nispa. 18Noqaykupis uyarerqayku janaj pachamanta parlamojta, Señorwan khuska, Diospaj ajllasqa orqopi kashaspa.
19Tiyapullawanchejtaj profetaspa mana chinkaj escribisqasninku. Chay palabrasta uyarispataj allinta ruwankichej; imaynatachus uj k'anchay laqhapi sut'iyanankama k'anchan, ajinata; paqariy ch'aska jinataj sonqoykichejpi k'ancharinankama. 20Ñaupajta yachaychej kayta: Escriturapi profetaspa escribisqantaqa, mana pillapis payllamanta sut'inchayta atinchu. 21Profetaspa escribisqasnin mana jayk'ajpis runaj munayninmantachu jamorqanku; manachayqa, Diospa ajllasqan runas, Santo Espiritunejta chay imasta parlarqanku.
Currently Selected:
2 PEDRO 1: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
