2 CORINTIOS 9

Ofrenda hermanospaj

1Hermanospaj qolqe tantasqamanta escribimunayqa, anchaña kanman. 2Rejsiniña sumaj sonqoyoj kasqaykichejta. Chayrayku may kusisqa kani Macedoniamanta kajkunawan. Acayamanta kajkunapis qayna watamantapacha wakisqas kashanku. Chay ruwasqaykichej ashkhaspa sonqonta kuyurichin. 3Chayrayku chay hermanosta kachamushani, ama qhasi kanampaj kusikuyniyku qankunamanta, nisqayman jina wakichisqas kanaykichejpaj. 4Ichapis noqawan jamunkuman Macedoniamanta wakin hermanos, taripasunkichejmantaj mana wakichisqasta chayqa, p'enqaypi rikhuriykuman; astawanqa qankuna p'enqaypi rikhuriwajchej, qankunamanta allinta parlashajtiyku. 5Chayrayku allin rijch'awarqa, hermanosta sonqochaspa qankunaman ñaupajta kachamunay, qolqeta qosaj nisqaykichejta yuyarinaykichejpaj, wakichisqa kanaykichejpaj tukuy sonqo, amataj kamachisqaykuraykullachu.

6Kayta niykichej: Pichus pisita tarpojqa, pisillatataj oqharenqa; pichus ashkhata tarpojqa, ashkhallatataj oqharenqa. 7Sapa uj churachun sonqompa yuyasqanman jina, ama llakikuspa, nitaj kamachisqa jinachu; imaraykuchus Diosqa munakun pichus kusiywan qojta. 8Diosqa atiyniyoj, khuyakuynin qankunapi ashkhayanampaj; ajinapi ama ima pisinampaj, tukuy ima allin ruwaypitaj junt'asqa kanaykichejpaj. 9Escribisqaman jina: Wajchasman qorqa mana mich'akuspa. Tukuy cheqan ruwasqantaj wiñaypaj kanqa. 10Dios qon tarpojman mujuta, t'antataj mikhunampaj. Ashkhayachenqataj chajrasniykichejta, yapanqataj allin ruwasqaykichejpa poqoyninta. 11Ajinamanta tukuy imapi qhapaj kanay kichejpaj, tukuy imata qospa khuyakuywan; noqaykunejtataj chay qolqemanta hermanos Diosman graciasta qonankupaj. 12Kay yanapata hermanosman qospaqa, mana pisisqallantachu yanapan. Astawanqa paykuna may chhikata Diosman graciasta qonku. 13Kay yanapata rikuspa Diosta yupaychanqanku, Cristoj evangelionta kasusqaykichejmanta, chay qolqeta tukuy sonqo qosqaykichejmanta ima, paykunapaj, tukuypajpis. 14Paykunataj mañapusonqachej Diosmanta tukuy sonqo munakuywan; Diospa jatun khuyakuynin qankunapi kasqanrayku. 15Diosman graciasta qona qowasqanchejmanta mana willay atinata.

Currently Selected:

2 CORINTIOS 9: QCHSB

Highlight

Copy

Compare