2 CORINTIOS 10

Apóstol Pabloj atiynin

1Noqa Pablo willaykichej, Cristoj k'acha misk'i sonqonrayku. Qankunawan kashaspaqa k'umuykukoj kani, qankunamanta karupi kashaspataj phiña sonqo kani. 2Mañakuykichej ari, chayman jamojteyqa ama sajrapaj jap'inawaykichejta, imaraykuchus noqa sinch'ita k'aminay tiyan ch'ataykuwajkunata; pikunachus nishanku aychaman jina purisqaykuta. Chaykunawan parlanay kashan. 3Cheqamanta aychaman jina purispapis, mana kay pacha runas jinachu maqanakuyku. 4Maqanakunayku armasqa, mana aychaman jinachu, astawanqa Diospa atiyninwan thuñinaykupaj sinch'i jark'akuna wasista. 5Ajinata ari, runakunaj yachayninkuta thuñispa, wapuykachaspa Diospa yachayninta qhesachajkunata; tukuy yuyaytataj Cristoman apaspa kasunankupaj. 6Wakisqas kashayku mana kasukojkunata jasut'inaykupaj, allin kasukojkuna kanaykichejkama.

7Qankunaqa imatapis qhawashankichej allin rijch'aynillanta. Kayta pipis allinta yachachun. Imaynatachus pipis Cristojta kasqanta nin chayqa, ajinallatataj noqaykupis Cristojta kayku. 8-9Kusikuni Señor astawan atiyta qowasqaykumanta wiñachinaykupaj, manataj thuñisqas kanaykichejpajchu. Chaymanta mana p'enqakunichu, ama cartasniywan manchachejman jina rijch'akunaypaj. 10Cartasniymanta pichá nin sinch'i phiñas kasqankuta; ñaupaqenkupi kashajtiytaj pisi kallpayoj kasqayta nin, parlasqaypis qhesachasqa. 11Pichus kayta parlajqa, yachachun imaynatachus carta palabrasninman jina kasqaykuta karupi kashaspa; kikillantaj kasqayku, ruwasqaykutaj qankunawan kaspaqa.

12Manataj noqayku atiykumanchu paykunaman kikinchayta imaraykuchus paykunallamanta allin kajta parlanku. Paykunalla tupukunku, khuskachakunku paykunapura, manataj yachayniyojchu kanku. 13Manaña noqaykoqa anchata parlasqaykuchu, astawanqa maychus kasqanta parlasqayku, Diospa tupunman jina. Payllataj chay tuputa qowayku, qankunajkama llank'aspa chayamunaykupaj. 14Chayrayku noqayku, tupu churasqamanta astawan jaqayman mana riykuchu, astawanqa noqayku ñaupajta chayamorqayku qankunajman Cristoj evangelionta apamuspa. 15Mana noqaykoqa alabakuykuchu wajkunaj llank'asqankumanta, noqaykojtapis kanman jina. Astawanqa suyashayku feniykichej wiñasqanman jina, qankuna ukhupi allin qhawasqas kanaykupaj puriyniykuman jina. 16Chaymanta, suyashayku qankunajmanta astawan karusman evangeliota apayta, mana wajpa wakichisqanman yaykuspa, nitaj wajpa llank'asqanmanta alabakuspa.

17Astawanqa, pichus kusikuyta munajqa kusikuchun Señorpi. 18Pichus pay kikin alabakojqa, mana allimpajchu qhawasqa; astawanqa jaqay pitachus Dios alaban, chaymin allin qhawasqaqa.

Currently Selected:

2 CORINTIOS 10: QCHSB

Highlight

Copy

Compare