1 PEDRO 4

Diospa munayninta ruwana

1-2Cristo ñak'arerqa aychampi, ajinallatataj qankunapis ñak'arinaykichejpaj wakichikuychej. Aychampi ñak'arejqa juchata atipanña, qhepa p'unchaykunapi ama aychaman jina kausanampaj, nitaj runakunaj munayninman jinachu. Astawanqa, Diospa munayninman jina kausaychej. 3Mana creejkunaj munayninta ruwasqaykichejqa tukukunña qankunapaj. Chaypacha purej kankichej millay juchaspi, sajrata purispa, machaykuykunaspi, qhochukuspi, anchata ujyaspa, chejnina lantista yupaychaspa ima. 4Paykunawan khuska sajra chinkay kausaypi mana purejtiykichej, sajra runasta jina qhawasunkichej. Chayrayku qankunapaj rimanku. 5Paykuna chay imasmanta cuentata qonqanku pimanchus wakichisqa kashan, juzganampaj kausajkunata, wañusqakunatawan. 6Chayrayku wañusqasman evangelio willasqa karqa, aychapi kashaspa juzgasqa kanankupaj, runasman jina; Diospa munayninman jinataj, espiritupi kausanankupaj.

7Tukuy imaj tukukuynin qayllapiña. Maychus kajta ruwaspa kausakuychej. Mana sayk'uspataj Diosmanta mañakuychej. 8Ñaupajtaqa qankuna ukhupi munakuy kachun, imaraykuchus munakoyqa ashkha juchata pampachan. 9Qankunapura ama thutuspa, wasiykichejman wajyanakuychej. 10Sapa ujtaj Diospa qosqanman jina wajkunaman jaywachun, sumaj mayordomo jina, Diosmanta ashkha yanapata jap'isqanmanta. 11Pillapis parlajqa, Diospa palabranman jina parlachun. Pillapis wajkunata yanapan chaypis, Diospa kallpa qosqanman jina yanapachun; tukuy imapi Jesucristonejta Dios yupaychasqa kanampaj. Paypajtaj kachun janaj pacha k'anchay, kamachiytaj, wiñaypa wiñaynintinkama. Amén.

Cristianos jina ñak'arina

12Munakusqasníy, ama t'ukuychejchu nina larwaypi jina ñak'arisqaykichejmanta; mana rejsisqapis kanman jina. 13Astawanqa kusikuychej Cristoj ñak'arisqampi chayaqeyoj kasqaykichejmanta; payqa jatun kaynimpi rikhurimojtintaj, may kusiywan junt'asqa kanaykichejpaj. 14Cristoj sutinraykuchus k'amisqas kankichej chayqa, kusikuyniyoj kankichej, imaraykuchus Diospa k'anchaj Espíritun qankunapi tiyakun. [Cheqamanta, paykunaqa Diospa contranta rimanku, qankunataj payta yupaychankichej.] 15Ama mayqenniykichejpis runa wañuchis kaychejchu, chayri suwaspis kaychejchu, amataj sajrata ruwaychejchu, nillataj wajkunaj imasninmampis sat'ikuychejchu. Chayta ruwaspaqa ñak'ariwajchej. 16Pichus Cristota qhatikusqanrayku ñak'arin chayqa, ama p'enqakuchunchu, astawanqa chaynejta Diosta yupaychachun.

17P'unchay chayamunña. Juiciotaj Diospa wasinmanta qallarikunan tiyan. Juiciochus noqanchejmanta qallarikonqa chayqa, Diospa evangelionta mana kasojkuna, imapitaj tukukonqankuri? 18Allinta kausakoj runachus ñak'ayllata salvakun chayqa, Diosta mana yupaychaj runa, juchasapaspis, imapitaj rikhurenqankuri? 19Ajinaqa, Diospa munayninman jina ñak'arejkuna, almankuta jap'ichichunku, mundota ruwaj, junt'aj Diosman, allin imastataj ruwachunku.

Currently Selected:

1 PEDRO 4: QCHSB

Highlight

Copy

Compare