1 PEDRO 3

Casarakojkunaj kausakuyninku

1-2Ajinallatataj, qankunapis warmis, qosasniykichejta kasuychej; ajinamanta Diospa palabrampi mana creejkunapis, warmisninkoj sumaj kausayninta rikuspa, mana palabrallawan Señorman kutirinankupaj; ajinallatataj rikuspa, llimphu puriyniykichejta, Diosta manchachikusqaykichejtawan. 3-4K'achanchakuyniykichejqa ama jawallamantachu kachun, ñajch'akuypis ama runaj rikunallampaj; nitaj qorimanta ruwasqa k'acha imasta churakuspa, chayri valorniyoj p'achaswan p'achallikuspa; manachayqa, k'achanchakoyqa sonqoykichej ukhupi kachun, mana ismoj allinchakuywan, espiritupi, llamp'u sonqo kaypitaj kachun. Kay imasqa Diospa ñaupaqempi jatumpaj qhawasqa. 5Ñaupa p'unchaykunapeqa, Diospi suyayniyoj ajllasqa warmis, chay imaswan k'achanchakorqanku, qosasninkuta kasuspa. 6Sarapis Abrahamta kasoj, señorníy, nispa. Qankunapis chay Saraj kausaynin jina kankichej, allin kajta ruwankichej chayqa, mana ni imamanta manchachikuspa.

7Kikillantataj qosaspis, warmisniykichejwan allin yachaywan kausakuychej. Paykunata allimpaj qhawaychej, p'akikoj vasota jina. Paykunaqa qankunawan khuska wiñay kausay chayaqeta jap'enqanku. Ajinamanta, Diosmanta mañakusqaykichejpis mana jark'asqachu kanqa.

Allinta ruwaspa ñak'arejkuna

8-9Kunanqa tukuyniykichej uj sonqolla kaychej, wajkunapaj sumaj sonqoyoj, hermanospura munanakuspa, khuyakuyniyoj, llamp'u sonqos; ama sajramanta sajrallatataj kutichispa, nitaj maldicionmantapis maldicionllatatajqa; manachayqa bendicispa, imaraykuchus Diosqa wajyasorqachej bendicionta jap'inaykichejpaj. 10Pichus kausayninta munakun, sumaj p'unchaykunatataj rikuyta munan chayqa, qallunta jark'achun sajra rimaykunamanta, simintaj ama llullata parlachunchu. 11Sajra kajmanta t'aqakuchun, allin kajtataj ruwachun. Sonqo tiyasqa kayta mask'achun. Chaytataj qhatichun. 12Señorpa ñawisnenqa cheqan kajkunata qhawashan, ningrisnimpis paykunaj mañakusqankuta uyarishan. Astawampis Señorqa sajrata ruwajkunaj contrampi kashan.

13Pitaj qankunata imanasunkichejman, sichus allin kajta qhatiwajchej chayqa? 14Cheqanta kausaspachus imallatapis ñak'arinkichej chayqa, kusikuyniyojmin kankichej. Chayrayku, ama kharkatitispa paykunata manchachikuychejchu, nitaj musphaykachaychejchu. 15Astawanqa Cristo Señorta yupaychaychej sonqoykichejpi. Wakichisqapuni kaychej, suyayniykichejmanta yachayta munajkunaman, llamp'u sonqowan, mana phiñakuspa, maychus kajta kutichinaykichejpaj. 16Allin sonqoyoj kaychej. Pikunachá qankunapaj thutunku sajratapis ruwawajchej jina chayqa, paykunallataj p'enqachisqas kanqanku, Cristopi allin kausayniykichejta qhasimanta tumpajkuna.

17Aswan walej kanman, allinta ruwaspa ñak'arinaykichejqa, Diospa munaynin ajina kajtenqa; manataj sajrata ruwaspaqa. 18Cristopis juchasrayku uj kutillata ñak'arerqa cheqan mana juchayoj, juchasapasrayku; Diosman pusanawanchejpaj. Cheqamanta aychapi wañorqa, espiritupitaj kausasharqa. 19Chay espiritupitaj rispa, presochasqa espiritusman willamorqa. 20Chaykunataj ñaupa p'unchaykunapi, mana kasukoj karqanku. Noéj p'unchaynimpi, Diosqa jatun pacienciawan paykunata suyarqa arca ruwakushajtin. Chaypachataj pisi runas yakumanta salvasqas karqanku, tukuyninkutaj pusajlla karqanku. 21Chay yakutaj bautismowan ninakun. Bautismotaj aychaj millayninta mana llimphuchanchu; astawanqa llimphu concienciaj munayninwan Diosninchejman pusawanchej, Jesucristo kausarimusqanrayku. 22Jesucristotaj janaj pachaman riporqa, chaypitaj Diospa pañampi tiyasqa kashan. Paypa munaynimpi kanku angelkuna, kamachejkuna, atiykunapis.

Currently Selected:

1 PEDRO 3: QCHSB

Highlight

Copy

Compare