Ɛ̍sɔ̍dɔ̍ɔ̄ 14
14
A̍ mɛ̄ɛ̍ wāŋnda̍ I̍sɔ̄lūɛ̄ī lo̍o̍ku̍ Pēē Si̍a̍ŋā Mɛ̄ŋmā Īhɛ᷄llo̍ tāŋɔ̄ɔ̄ yɛ̍
1O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, 2“Di̍mu̍l wāŋnda̍ I̍sɔ̄lūɛ̄ī mā mīīŋgu̍ a̍ mākɔ̄ɔ̄ mā kɔ̍ cha᷅l Pīhāhi̍lɔ̍tī, fo̍nda᷄ŋ cho̍ Mi̍ki̍dɔ̄ɔ̄ tɛ̍ɛ̄ŋ a̍ Pēē Si̍a̍ŋā Mɛ̄ŋmā Īhɛ᷄llo̍ Bāāl Si̍fɔ̄ŋ ndo̍. Lā kīōlu̍ dɔ̍ɔ̍ŋgɔ̍ɔ̍ o̍ Pēē Si̍a̍ŋā Mɛ̄ŋmā Īhɛ᷄llo̍ īkɛ̄i̍ kpe̍e̍kpe̍i̍. 3O̍ ko̍ŋ, māsāa̍ I̍chi̍pī o̍ cho̍ yīya᷄ŋ mbō dīmī māā, bālɔ̄ɔ̍ wāŋnda̍ I̍sɔ̄lūɛ̄ī a̍ cho̍ o̍ po̍llo̍ ni᷄ŋ ni̍, kāni̍ nɛ̄īyo̍ lo̍ nda̍ o̍ hɔ̄l ma̍ hāū o̍ po̍llo̍ ni᷄ŋ. 4O̍ ko̍ŋ, mī ki̍ndi̍ māsā bɛ̍ndōo̍ I̍chi̍pī bōlle̍ŋ mbō tōl nda̍ kɔ̄ɔ̄lī. Ndu̍yɛ̍, nyɛ̄ ya̍ I̍ cho̍ tōsā a̍ māsāa̍ I̍chi̍pī nda̍ so̍vɛ̄i̍ya̍a̍ ndūa̍a̍ wo̍, ndu̍ cho̍ tōsā ni̍ mī wāŋnda̍ ke̍ ya̍ bɛ̄ɛ̄le̍ŋ. Ndu̍yɛ̍, ndu̍ cho̍ tōsā ni̍ mī wāŋnda̍ I̍chi̍pī a̍ si̍na̍ māā ya̍ kpe̍e̍kpe̍i̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.” Ndu̍yɛ̍, mi̍ wāŋnda̍ I̍sɔ̄lūɛ̄ī a̍ to̍sā nyɛ̄ Mɛ̄lɛ̄ka̍ dīmu̍l nda̍ le̍ tōsāa̍.
5O̍ ko̍ŋ kɔ̍ɔ̍lī, mɛ̄ɛ̍ māsā bɛ̍ndōo̍ I̍chi̍pī tu̍e̍ī māā wāŋnda̍ I̍sɔ̄lūɛ̄ī a̍ ku̍ɛ̍ŋnu᷄ŋ, ndu̍ ni̍, lāŋgba̍ā ndūāā ka᷅lla̍ ni̍, ma̍ māŋgālā kɔ̄ltā ndāla̍ŋ ma̍ dīmī āā, “Ī māā vɛ̄ɛ̍nɛ̍ na̍a̍ ŋ̄ tōsa̍la̍ŋ yɛ̍ he̍ī, mi̍ ŋ̄ māl chīāā nāā I̍sɔ̄lūɛ̍i̍ya̍ ma̍ kūānu᷄ŋ?” 6O̍ ko̍ŋ, mi̍ māsā bɛ̍ndo̍o̍ I̍chi̍pī chu̍ā nyɛ̄lā ndɔ̄la̍ nya̍a̍na᷄ŋnda̍ su̍a̍ā ā nāŋ nda̍ŋ, mbo̍ bɛ̄ɛ̄ndīāā la̍ŋ. Mbo̍ chūā vɛ̄lɛ̄ so̍vɛ̄i̍ya̍a̍ ndūa̍a̍ mbo̍ bɛ̄ɛ̄ndīāā nda̍ le̍ sɔ̍ŋgɔ̄ɔ̍. 7Mbo̍ hɛ̄lī vɛ̄lɛ̄ nyɛ̄lā nyāāna᷄ŋnda̍ che̍le̍ŋ su̍a̍ā ā nāŋ nda̍ŋ, lā kɛ̄ndɛ̄ kɛ̍ndɛ̄ la̍ŋ kɛ̄mɔ̄ɔ̍ lē ŋɔ᷄mpu᷅m (600). Ndu̍yɛ̍, ō kɛ᷅ kɛ᷅, wānāa̍ wa̍ so̍vɛ̄i̍ya̍ bōlle̍ wa̍ ā wa̍ īchāli̍ le̍chōo̍. 8Mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mī māsāa̍ I̍chi̍pī o̍ yu̍sā kɔ̄llo̍. Mbo̍ tōsā mi̍ māsāa̍ I̍chi̍pī o̍ ti̍sā wāŋnda̍ I̍sɔ̄lūɛ̄ī kɔ̄ɔ̄lī, wāŋnda̍ I̍sɔ̄lūɛ̄ī a̍ wa̍ kɔ᷄ŋnda̍ŋ a̍ yōŋgā. 9Wāŋnda̍ I̍chi̍pī ni̍, māsāa̍ I̍chi̍pī su̍a̍ā ndūa̍a̍ kpo̍u̍, ā nyɛ̄lā ndɔ̄la̍ nya̍a̍na᷄ŋnda̍ su̍a̍ā ā nāŋ nda̍ŋ, a̍ pūa̍a̍ sɔ̍ŋgā o̍ su̍a̍ā chōo̍ wa̍, a̍ so̍vɛ̄i̍ya̍a̍ ndūa̍a̍ kpo̍u̍, ma̍ tīsā wāŋnda̍ I̍sɔ̄lūɛ̄ī kɔ̄ɔ̄lī. Ā kōma̍l nda̍ o̍ Pēē Si̍a̍ŋā Mɛ̄ŋmā Īhɛ᷄llo̍ īkɛ̄i̍, nāa̍ nda̍ wa̍ Pāhāhi̍lu̍ɔ̍tī a̍ Bāāl Si̍fɔ̄ŋ nda̍.
10Mɛ̄ɛ̍ wāŋnda̍ I̍sɔ̄lūɛ̄ī a̍ che᷅ māsāa̍ I̍chi̍pī hūnɔ̄ɔ̍ a̍ pūa̍a̍ ndūa̍a̍ so̍vɛ̄i̍ya̍ ndu̍ kɔ̄ɔ̄lī, mi̍ sīōōŋīī bɛ̄ndūe̍i̍ bīī nda̍, ma̍ kōŋūl nāa̍ Mɛ̄lɛ̄ka̍ Ya̍a̍wɛ̄ɛ̄ chūā le̍ mālāa̍. 11O̍ ko̍ŋ, ma̍ dīmūl Mūu̍sē āā, “Mūu̍sē, ī māā vɛ̄ɛ̍nɛ̍ ŋ̄ tōsa̍l lɛ̄ na̍a̍ he̍ī, ma̍ sōli̍ na̍a̍ I̍chi̍pī ma̍ hūŋ a̍ na̍a̍ o̍ po̍llo̍ ho̍ō ni᷄ŋ? Bāā, mbō wa̍ māwāā māā sɛ̄ɛ̄la̍ bɔ̍ɔ̍ la̍ ve̍ I̍chi̍pī le̍ nāa̍ chɔ̄ lēni᷄ŋ te̍, māā le̍ sa̍bū kōŋ ŋ̄ hīŋ a̍ na̍a̍ o̍ po̍llo̍ ho̍ō ni᷄ŋ ni̍, hāli̍kpe̍ŋ mī ŋ̄ hu᷄ŋ chu̍ū na̍nu᷄ŋ? 12Nu̍a̍ā le̍ na̍a̍ ŋ̄ dīmu̍l nu̍m māā ma̍l na̍a̍ a̍ sūɛ̍i̍ hūnɔ̄ɔ̍ ho̍ō o̍kɔ̄ɔ̄, mī ŋ̄ wānu᷄ŋ o̍ chɛ̄lē nāā ni᷄ŋ I̍chi̍pī le̍? Kāni̍, ndu̍ o̍o̍ wa̍ le̍ tu̍u̍ mī na̍a̍ ŋ̄ wa̍ŋnu̍ŋ o̍ chɛ̄lē nāā ni᷄ŋ I̍chi̍pī, mbo̍ hīāū a̍ hūnɔ̄ɔ̄ pīɔ̍mndo̍ sɔ̄lāa̍ o̍ po̍llo̍ ho̍ō ni᷄ŋ.”
13O̍ ko̍ŋ kɔ̍ɔ̍lī, mi̍ Mūu̍sē mu̍lī nda̍ dīōm, mbo̍ dīmī āā, “Lā si᷄m yi̍, sīōōŋīī bi̍ī nya̍ le̍. Pāa̍le̍ hāūle̍ŋ nde᷅ŋ, lā chā ni̍ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ bāŋā yɛ̍. Wāŋnda̍ I̍chi̍pī, ā nya̍ cho̍ ha̍ā chɔ̄ɔ̍ hāū wa̍, fɛ̍ɛ̍ŋ a̍ fɛ̍ɛ̍ŋ bɛ̍ɛ̍, lā chi᷅ lɛ̍ ni̍ŋ nda̍ le̍. 14Nyɛ̄ nya̍ nɔ̄ mī lā tōsa̍ tu̍ŋ ndo̍ cho̍ ni̍, lā si᷄m yi̍, Mɛ̄lɛ̄ka̍ Ya̍a̍wɛ̄ɛ̄ pi̍la̍ cho̍ sɔ̍ŋgā le̍ nya̍.”
15O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “Ɔ̍ɔ̄ le̍ sa̍bū ŋ̄ chō cha᷄ŋndo̍ le̍ mālāa̍ nāa̍ ya̍ chūa̍ wo̍? Di̍mu̍l wāŋnda̍ I̍sɔ̄lūɛ̄ī mā hīōū lāchī a̍ kɔ̄la̍ŋ. 16He̍e̍lu̍ ti̍nda̍ nu̍mndo̍, mā yūlū ndu̍ o̍ pēē mɛ̄ŋmā īhɛ᷄llo̍ chōo̍. Tē ā yūlū pɛ̍, mɛ̄ŋnda̍ŋ mā chō kīōlu̍ tɛ̍ɛ̄ŋ, mī mā pīɔ̄ūvi̍āŋ. Mī wāŋnda̍ I̍sɔ̄lūɛ̄ī a̍ ke̍e̍ku̍ o̍ lɛ̄ŋndē vēsɛ̍i̍le̍ŋ chōo̍ mā ta᷄ŋ. 17Ndu̍yɛ̍, I̍ cho̍ wāŋnda̍ I̍chi̍pī bōlle̍ kīndī mā tōl nda̍ kɔ̄ɔ̄lī. Ndu̍yɛ̍, nyɛ̄ ya̍ I̍ cho̍ tōsā a̍ māsāa̍ I̍chi̍pī, a̍ so̍vɛ̄i̍ya̍a̍ ndūa̍a̍, a̍ nyɛ̄lā ndɔ̄la̍ nya̍a̍na᷄ŋnda̍ su̍a̍a̍ ā nāŋ nda̍ŋ, a̍ so̍vɛ̄i̍ya̍a̍ sɔ̍ŋgā o̍ su̍a̍ā chōo̍ wa̍, ndu̍ cho̍ tōsā ni̍ mī sɔ̍la̍ bɛ̄ɛ̄le̍ŋ. 18Māsā bɛ̍ndōo̍ I̍chi̍pī ni̍, a̍ nyɛ̄lā ndɔ̄la̍ nya̍a̍na᷄ŋnda̍ su̍a̍ā ā nāŋ nda̍ŋ, o̍ ko̍ŋ kɔ̍ɔ̍lī, a̍ so̍vɛ̄i̍ya̍a̍ ndūa̍a̍ sɔ̍ŋgā o̍ su̍a̍a̍ chōo̍ wa̍, nyɛ̄ ya̍ I̍ cho̍ tōsā a̍ nda̍ wo̍, ndu̍ cho̍ tōsā ni̍ mī wāŋnda̍ I̍chi̍pī kpo̍u̍ a̍ ke̍ ya̍ bɛ̄ɛ̄le̍ŋ, mā sīna̍ māā ya̍ kpe̍e̍kpe̍i̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”
19O̍ ko̍ŋ kɔ̍ɔ̍lī, ki̍i̍la̍nɔ̍ Mɛ̄lɛ̄ka̍ wa̍ kɔ̄la̍ŋ wāŋnda̍ I̍sɔ̄lūɛ̄ī lāchī wo̍, mbō fāŋa̍ŋ I̍sɔ̄lūɛ̍i̍ya̍ lāchī mbo̍ mīīŋgu᷄ŋ nda̍ a̍ mākɔ̄ɔ̄. Ha̍la̍ īkpūŋgba̍ wa̍ nda̍ lāchī wo̍ bɛ̍ɛ̍, mbo̍ mīīŋgu᷄ŋ nda̍ a̍ mākɔ̄ɔ̄, mbo̍ sīm wāŋnda̍ I̍chi̍pī tɛ̍ɛ̄ŋ a̍ wāŋnda̍ I̍sɔ̄lūɛ̄ī. 20Mbo̍ wa̍ ni̍ko̍ wāŋnda̍ I̍chi̍pī tɛ̍ɛ̍ŋ a̍ wāŋnda̍ I̍sɔ̄lūɛ̄ī. Ha̍la̍ īkpūŋgbāa̍ ho̍ō ō wa̍ nyɛ̄ wa̍wo̍ŋndo̍ yɔ̄ŋgōo̍ le̍ wāŋnda̍ I̍sɔ̄lūɛ̄ī, kɛ̍ mbō tūsī nyu᷅mnda̍ŋ le̍ wāŋnda̍ I̍chi̍pī. Īchɔ̄l kōŋ pi̍i̍, wāŋnda̍ I̍chi̍pī ā nɔ̄la̍ mā sɔ̄ɔ̄ŋgu̍u̍ wāŋnda̍ I̍sɔ̄lūɛ̄ī i̍kɛ̍i̍ le̍.
21O̍ ko̍ŋ kɔ̍ɔ̍lī, mi̍ Mūu̍sē yu̍lū tīnda̍ ndɔ̄ɔ̍ o̍ pēē mɛ̄ŋmā īhɛ᷄llo̍ chōo̍. Mɛ̄ɛ̍ o̍ yu̍lu̍, mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mi̍ hūēīyīī bɛ̄ndūe̍i̍ fūlā bā pāa̍le̍ŋ lē chāŋndo̍, mi̍ ī pīɔ̄ū pēē bɛ̍ndōo̍ ho̍ō tɛ̍ɛ̄ŋ kpa̍la̍. Mī mɛ̄ŋnda̍ŋ mā hēl vēllāa̍ vēllē. Īchɔ̄l kōŋ pi̍i̍ pi̍i̍, hūēīye̍ wa̍ hɔ̄ŋndo̍. Ī lo̍ hɔ̄ŋndo̍ ha̍a̍a̍, mi̍ ī vēēsīāā fo̍ndāŋ mɛ̄ŋnda̍ŋ mā wa̍ ko̍ŋ ndo̍ sɛ̍ɛ̍ŋ. 22Mɛ̄ŋnda̍ŋ mā wa̍ le̍nde̍ ma̍ he̍lāā māā lākpākī, mi̍ wāŋnda̍ I̍sɔ̄lūɛ̄ī a̍ ke̍e̍ku̍ ma̍ŋ tɛ̍ɛ̄ŋ o̍ lɛ̄ŋndē vēsɛ̍i̍le̍ŋ chōo̍. 23Ndu̍yɛ̍, wāŋnda̍ I̍chi̍pī bɛ̍ɛ̍ mɛ̄ɛ̍ nda̍ fūūlu̍u̍ lo̍ŋ, ma̍ tīsā nda̍ kɔ̄ɔ̄lī o̍ pēē ko̍ŋ tɛ̍ɛ̄ŋ a̍ sūa̍a̍ ndāa̍, a̍ nyɛ̄lā nyāāna᷄ŋnda̍ su̍a̍ā ndāa̍ ā nāŋ nda̍ŋ, a̍ wānāā ndāa̍ sɔ̍ŋgā o̍ su̍a̍ā chōo̍ wa̍, nda̍ kpo̍u̍ ma̍ tīsā I̍sɔ̄lūɛ̍i̍ya̍ kɔ̄ɔ̄lī o̍ pēē ko̍ŋ ni᷄ŋ. 24Kɛ̍, a̍ pāa̍le̍ si̍a̍āle̍ŋ ki̍nɛ̍i̍, Mɛ̄lɛ̄ka̍ Ya̍a̍wɛ̄ɛ̄ o̍ wa̍ o̍ pa̍ŋgēle̍ lēyīŋ ko̍ŋ ni᷄ŋ, a̍ o̍ ha̍la̍ īkpūŋgba̍ wa̍ ko̍ŋ kɔ̍la̍ŋ a̍ wāŋnda̍ I̍sɔ̄lūɛ̄ī yo̍ ni᷄ŋ, mbo̍ chā mi̍ wāŋnda̍ I̍chi̍pī wā I̍sɔ̄lūɛ̍i̍ya̍ tōlɔ̄ɔ̍ kɔ̄ɔ̄lī. O̍ ko̍ŋ, mi̍ Mɛ̄lɛ̄ka̍ tōsā mi̍ sīōōŋīī bɛ̄ndūe̍i̍ bīī wāŋnda̍ I̍chi̍pī ta̍u̍ ta̍u̍. 25Mbo̍ tōsā vɛ̄lɛ̄, mi̍ nyɛ̄lā nyāāna᷄ŋnda̍ su̍a̍ā ndāa̍ ā nāŋ nda̍ŋ lā hāū, lā ve̍ lɛ̍ lākɔ̄ le̍. O̍ ko̍ŋ, mi̍ wāŋnda̍ I̍chi̍pī a̍ dīmī āā, “Ŋ̄ fāŋa᷅ŋ wāŋnda̍ ha̍ā kɔ̄ɔ̄lī, mi̍ ŋ̄ mīīŋgu᷄ŋ. Kāni̍ fu̍u̍le̍, Mɛ̄lɛ̄ka̍ Ya̍a̍wɛ̄ɛ̄ pi̍la̍ cho̍ sɔ̍ŋgɔ̄ɔ̍ le̍ wāŋnda̍ I̍sɔ̄lūɛ̄ī ni̍.”
26O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Mūu̍sē āā, “Yu̍lu̍ ba᷅ nūmndo̍ o̍ pēē mɛ̄ŋmā īhɛ᷄llo̍ chōo̍ mī mɛ̄ŋnda̍ŋ mā mūūli̍āŋ mī mā kūmbū I̍chi̍pīāŋnda̍, a̍ nyɛ̄lā nyāāna᷄ŋnda̍ su̍a̍ā ndāa̍ ā nāŋ nda̍ŋ, a̍ so̍vɛ̄i̍ya̍a̍ ndāa̍ ku̍ā a̍ la̍ŋ nda̍ kpo̍u̍.” 27Mi̍ Mūu̍sē yu̍lū bā ndɔ̄ɔ̍ o̍ pēē mɛ̄ŋmā īhɛ᷄llo̍ chōo̍. Mɛ̄ɛ̍ pāa̍le̍ŋ lē sɛ̄, mi̍ mɛ̄ŋnda̍ŋ mā mīīŋgū māā pāāndū. Mi̍ wāŋnda̍ I̍chi̍pī a̍ ki̍ndi̍ ki̍ndī le̍ nyāānɔ᷄ŋndo̍, kɛ̍ ā nɔ̄la̍ le̍. Mi̍ Mɛ̄lɛ̄ka̍ Ya̍a̍wɛ̄ɛ̄ mi̍i̍sūū nda̍ o̍ pēē ko̍ŋ ni᷄ŋ. 28Mi̍ mɛ̄ŋnda̍ŋ mā mīīŋgū o̍ fōōfōla̍ pa̍a̍ndūla̍ŋ, mi̍ mā kɛ̄ɛ̄yā yɛ̍ndɛ̍kɛ̍kɛ̍. O̍ ko̍ŋ kɔ̍ɔ̍lī, nyɛ̄lā nyāāna᷄ŋnda̍ su̍a̍ā ā na̍ŋ nda̍ŋ ni̍, a̍ wānāa̍ ku̍ā o̍ nyɛ̄lā lāŋ chōo̍ wa̍, a̍ so̍vɛ̄i̍ya̍ I̍chi̍pī a̍ to᷅l I̍sɔ̄lūɛ̍i̍ya̍ kɔ̍ɔ̍lī wa̍, nda̍ kpo̍u̍ mā lō o̍ pēēlo̍, ō pīlɛ̍ bɛ̍ɛ̍ fu̍la̍ le̍. 29Kɛ̍, wāŋnda̍ I̍sɔ̄lūɛ̄ī nda̍, mɛ̄ŋnda̍ŋ mā lo̍ mā hēlāā le̍nde̍ o̍ kpēŋgo᷄ŋ vēllāa̍ vēllē māā lākpākī, ma̍ kēēkū tɛ̄ɛ̄ŋ o̍ lɛ̄ŋndē vēsɛ̍i̍le̍ŋ chōo̍.
30Mɛ̄ɛ̍ nu̍a̍ā, Mɛ̄lɛ̄ka̍ Ya̍a̍wɛ̄ɛ̄ ba̍ŋa̍ I̍sɔ̄lūɛ̍i̍ya̍ wāŋnda̍ I̍chi̍pī o̍ bā pāa̍le̍ le̍ŋ ni̍. Ndu̍yɛ̍, mi̍ I̍sɔ̄lūɛ̍i̍ya̍ ā chā wāŋnda̍ I̍chi̍pī ā vīlɛ̍i̍ya̍ o̍ pīo̍o̍ kɔ̄ŋgɔ̍. 31Ndu̍yɛ̍ mɛ̄ɛ̍ wāŋnda̍ I̍sɔ̄lūɛ̄ī a̍ chē nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ a̍ wāŋnda̍ I̍chi̍pī a̍ kpāāya̍ ndɔ̄ bɛ̍ndōo̍ wo̍, mi̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ ī bīī nda̍. Ma̍ dūāū tīīnda᷄ŋ ndāa̍ o̍ ndu̍ ni̍ŋ, a̍ o̍ bu̍ɛ̍ī ndɔ̄ɔ̍ Mūu̍sē.
Currently Selected:
Ɛ̍sɔ̍dɔ̍ɔ̄ 14: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
