Judith 10
10
Judiiti nín cá binannanliibi naapaal pu
1Judiiti nín kúuǹ ki yíiń Isirayeel Nimbɔtiu míǹ ki gbēeǹ ní ki sòon̄ tibɔti gbanti kɔkɔ ki dóòyee, 2ní u yíkì laakin u bàà dɔ̄ dicincibilee ní ki yíiń u-tɔntɔnliu unimpu ní ki kpákatì kudii kun poon u kàal̀ ŋwiŋŋuŋfikaa dal nì jiŋaalib yuntiŋuee. 3U nìn cúú kutuku un u bàà pēēyee ki pēetì ní ki lēē tikpiipuwan tin u lōōyee ki bíl̀. U nìn fùl̄ ní ki nyàab̄ ŋkpam min sɔ́fì tiŋanee ki ŋmītì. U nìn cāatì u-yikpiti ní ki nyàab̄ kiŋaabiki ki cúú ní ki dū jiŋaal wanti tin u nìn pèentí ŋyunti ŋun ní u-cal Manasee nìn bée ki pēeǹ. 4U nìn nyàab̄ anaataka ki táká, ki nyàab̄ tiléeŋkaal ki léeǹ, ki nyàab̄ abɔmbil nì kibɔmbiki ki fúuń, ki nyàab̄ falfatib ki túuń ní ki dū u-wannyɔkɔntikaati kɔkɔ ki nyɔ̄kɔntì u-ba ní ki nyáantì u-ba kí ŋmā kí dáaĺ bininjab bin kɔkɔ yaa wál̀-uee. 5U nìn nyàab̄ ndamam ntúun ki tīī u-tɔntɔnliu nì ŋkpam dibool. U nìn nyàab̄ ɔɔji yim nì asubikulim kalaau nì kpɔnɔb nì waagaasii. U nìn dū tíǹ gbanti kɔkɔ ki bóob́ tiŋan ní ki dūu túǹ u-tɔntɔnliu. 6U nìn nyáń ki cá Beetulii punyɔkɔki watil pú ní ki ká Oosiyasi nì kitiŋ kpilib Kabriisi nì Kaarmiisi niin bi yú ki cí. 7Bi nín ká u-nimbiin cúu kpántì nì u-bɔkutil mun kpántèe ní bi pàkā-u u-nyaaŋku pu ki bí yii: 8«Ti-naanjab Nimbɔtiu ń dàkà-si u-laŋŋaŋfitiiku á ŋmā kí ŋá tin a bɔ́ntì kí ŋée Isirayeel yab jilmau nì Jeerusaleem nyooti pu!»
9Ní u jáam̀ Unimbɔti ní ki bí-u yii: «Tīīmaan mara bí pìitī-mi kitiŋ punyɔkɔki. M làá nyā kí cùú ŋá tin ni sòon̄ nì mee.» Niinee ní bi tīī binaacimpɔmbi mara yii bí pìitī-u kii u nín lī puee. 10Bi nìn ŋá míǹ, ní Judiiti nyáń nì u-tɔntɔnliu. Kitiŋee nib nìn pée kpèé-u ní áli u dāa kpákatì dijool ki cūtìi pūntì ditantakal. Míǹ boonee ní baa ti wál̀-u.
11U nì u-tɔntɔnliu nìn pée còom̄ ní cáaa ditantakalin ki cá ní Asuur yab janjaliibi bin nìn bí ki kpèé niinee dɔ́miń ki túŋkì-bi. 12Bi nìn cúú-u ní ki bālifì-u yii: «Bilab jandi ní a bí ní? A nyánní la? A cá la ní?» Ní u kíí yii: «M sá Eebru yab sapɔɔŋwu ubɔ ní m sáǹ-bi, kun puee bi bíi bɔ́ntí kí dū bi-ba kí ŋá ni-ŋaan. 13M dɔ́miń kí ká ni-janjakpiliu Ooloofeerni kí tùkù-u ibaamɔn bɔti, ní kí dàkà-u nsan ŋun u ŋūǹ kí dī kí já kí fōō ajoon pu tiŋki kɔkɔ u-janjaliibi ubɔbɔ ń taa kpúee ní.»
14Bijanjaliibee nìn pílifì tin u sòon̄ee ní ki kpēē u-nimbiin. Bi nìn ká yii u ŋān̄ kunyaaŋŋu. Bi nìn bí-u yii: 15«A nín ŋá malaa ki kpákatìń ki dū a-ba ki dàkā ti-kpiliuee, a fīī a-ba ní. Kɔŋkɔnnee, nín̄ cá u-tantiun. Ti-kansikin biba làá céeǹ-si kí cáá-si kí cùnnì u-cee. 16A yaa bàn̄ u-nimbiinee, á taa fàŋkì. Ama á pée tùkù-u tin a sòon̄ nì ti nee, u làá ŋá-si tiŋan.»
17Bi nìn lēē bi-kansikin bininjab dilaataal ki kútì u nì u-tɔntɔnliu pu, ní bi céeǹ-u ki cáa cūnnì Ooloofeerni tantiu caŋin. 18Binib nìn kóoǹ an kɔkɔ pu ki kpáfì dinaapaalin, di sá yii bi nìn sòon̄ ki nāatì tɔb yii Judiiti dɔ́miń. Binib nìn dɔ́miń ki ŋá kulaguŋu ki māntìi tú-u. Ŋyunti gbantee úǹ nìn yú Ooloofeerni tantiu boon kí cí bí sòoǹ nì u u-bɔti. 19Bi nìn bí ki kpèé u-nyaaŋku ní ki pàkà Isirayeel yab u-pu, ní ki nìn sòoǹ ki tùkù tɔb yii: «Ŋma di ŋūǹ kí kpèè dinibul din cáá binimpoobi nee juti fámee? An kaa ŋān̄ bí yàntī Isirayeel yab ubɔbɔ ń nīn bí dimaŋfalin! Bin làá kíń kí nīn bí dimaŋfalinee dāa ŋūǹ kí ŋmàtiǹ kitiŋ kɔkɔ!»
20Bin kɔkɔ nìn dɔ̄ Ooloofeerni ceeyee nìn nyáń ki kpáaǹ u-janjakpilib kɔkɔ, ní bi cáá Judiiti ki kɔ́ǹ u-tantiun. 21Ooloofeerni nìn dɔ̄ u-dooŋu pu, sabɔrɔ un bi dū ŋŋaaman ki lùn̄ee taapu ki ŋùŋfī. Bi nìn dū sindaariya nì ataŋkpamɔnti ŋin bi yíì eemeeroodi nì ataŋkpamɔnti aba mun ki nyūntì-u. 22Bi nìn sòon̄ nì u Judiiti pu ní u nyáń ki yúl̀ u-tantiu nyɔkɔpu u-tɔntɔnliibi ŋúb́ animbil fitilab ki līī u-nyɔkɔpu. 23Ŋyunti ŋun Judiiti bāań u nì u-janjakpilib nimbiinee, ní bi-kɔkɔ bíi kpèé u-nimbiin nyaaŋku. U nìn tātìi dōoǹ dicincibil Ooloofeerni nimbiin, ama ní u-tɔntɔnliibi yáatì-u kitiŋ ki síiǹ.
Currently Selected:
Judith 10: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.