2 Corinthiens 13

Tin Pɔɔl kpáafì Kɔranti yabee

1Ntataatiim ní m dòoń ni-cee nee. An ŋmàn̄ Unimbɔti gbɔŋku poon yii: «Binib bili kii bita seerau di cáá mbaamɔn#13.1 Kpèè Ditee 19.15, Maat 18.16, 1 Tiim 5.19, Eebru 10.28..» 2M cáá tibɔti kí kpāafì bin bin nìn ŋá ikpitee nì bin kɔkɔ kíǹee. M nín nìn dɔ́miń ni-cee nliliitiimee, m nìn lī-tì ní ki gíti bíi bùsī ki lì díǹ m-kpátam ni-cee. M nín làá dāan̄ min nee, m làá ŋá an nín máaǹ puee ní, maa làá kpèè ubɔ nimbiin. 3Kii ni nín là kí ká kudaaŋŋu yii Kriisitoo di dì m-pu ki sòoǹee, ni làá lafun ká. Kriisitoo dàkà u-pɔŋŋu ni-kansikin, ama waa sá kiwɔfii. 4Tiŋman, u dū u-ba ki ŋá kii uwɔfee ní bi kpáá-u ndɔpuntikaa pu, ama Unimbɔti pɔŋŋu yāntì u bí dimaŋfalin. Ti nì u nín ŋá ubaantee puee, ti mun bí iwɔfin ní, ama u-puee ti cáá dimaŋfal. Nì Unimbɔti pɔŋŋu puee ti bí dimaŋfalin ki tīī-ni.

5Ní cɔ̄ŋkìmaan ni-ba kí kpèè ni yaa lafun fōō Yeesu Kriisitoo ki kíí tiŋman. Ní kpèè ni-ban tiŋan, naa ká yii u bí ni-naaa? U bí ni-ni, asee ni nín cɔ́ŋkì ki kpēēyee, ni yaa ká yii naa fōō-u ki kíí baba. 6Míǹ ní ni làá béé yii ti mun cɔ́ŋkì ti-ba ní ki béè yii ti sá Kriisitoo tɔntɔnliibi tiŋman. 7Ti mèé Unimbɔti ni-pu ní taa ŋá ikpiti iba. An kaa sá kí dàkà ti-ba yii ti túń ditummɔntiil, ama ti là ní nīn ŋáań tiŋan báà bi yaa bíi sòoǹ ki bíiĺ timbi. 8Kun puee taa cáá mpɔn kí dūú já nì ibaamɔn, ti cáá mpɔn kí dūú tūtuǹ ibaamɔn ní. 9An mɔ̄ǹ-ti ŋyunti kamaa timbi yaa bí iwɔfin, nimbi ń nīn pɔ̄ɔ̄yee pu. Ti mèé Unimbɔti ni-pu yii ní nīn sá binimbɔtinooliibi tiŋman pu yab. 10Kun pu m bí ndan ki ŋmà-nee di sá maa là ḿ dāá bàń ni-cee kí dū mpɔn ŋun ti-Dindaan tīī-mee kí wɔ́b́-ni. Mpɔn gbantee sá ḿ dūú tūtuǹ-ni ni-nimbɔtinóotam ń cù nyɔkɔpu ní, an kaa sá kí dūú nàan̄-ni.

11Nnabiyaamu, tin m làá dū kí kàan̄ nee sèé: ní nīn cáámaan dipɔɔpindi, ni-nimbɔtinóotam ń nīn sá tiŋman pu yal kí nīn tìì tɔb kunyannyaau, kí nīn pēē kinyɔkɔ nì ŋgbansɔŋfi poon. Unimbɔti un sá dineendi nì ŋgbansɔŋfi daanee làá nīn bí ni-cee.

12Ní jāam̀maan tɔb kí kpàl̄ tɔb nnabiyaamin.

Unimbɔti nikitil din bí dooyee jáaḿ-ni.

13Ti-Dindaan Yeesu Kriisitoo ŋanti nì Unimbɔti neendi nì u-Fam nín cāabìń nnyɔɔpee ŋuŋyee ń nīn bí ni-kɔkɔ cee#13.13 Yeesu Kriisitoo... Unimbɔti... Circir Fam: dūú ŋmàntī nì Maat 28.19, Eef 2.18, 1 Peet 1.2..

Currently Selected:

2 Corinthiens 13: BASSARDC

Highlight

Copy

Compare