2 Corinthiens 12

Aleedaka ŋin Pɔɔl kée

1Míǹ puee ḿ nīn lámintáa! An kaa tútúǹ-ni. M làá tùkù-ni tin ti-Dindaan lēē ki dàkā-mi ki yāntì m béèyee. 2M nyí kijapaai kiba, u nóó Kriisitoo. An nìn yōoǹ-u ki cáa jɔ́m̀ kutagbɔŋu yilpu yilpu fɔ́ŋŋŋ Unimbɔti cee dibindi diba kpá saalku sèé. (Ama maa nyí yii u nìn jɔ́m̀ nì u-wuntaaa, an kaa sá nì u-wunti, Unimbɔti baba di nyí.) 3Tiŋman m nyí yii kijapaayee nìn jɔ́m̀ áli Unimbɔti Beelin#12.3 yilpu Beelin: kpèè Luuki 23.43.. (Ama maa nín nyí yii an yaa nìn sá nì u-wuntaaa, an yaa kaa sá nì u-wunti, see Unimbɔti di nyí.) 4Niin ní u gbìl̄ tibɔti tin unil kaa ŋūǹ kí fàtīí gíiǹ-tì kí lèe, kaa máaǹ kí dū-tì kí tùkù ubɔ muee. 5An japaakee pu ní m máaǹ kí nīn lámintí, kaa sá man m-ba pu. M yaa làá tí lāmintàaa, see m-wɔfii pu. 6M yaa bàà là kí pàkà m-bee, maa bàà sámaan uwaati, m bàà sòoǹ ibaamɔn ní. Ama maa là kí pàkà m-ba, kun puee maa là binib ń dàkafì m-pu ŋkpaamin bi nín wāĺ m ŋáań tiŋyee nì tin bi gbìl̄ m sòoǹee pu.

7Kí wàatī ḿ taa dū tin Unimbɔti yāntì m béè an kaa bí dimaafilee kí ŋá dilambilee, ní u dū iween iba ní ki ŋá m-wunti pu. Iweenee sá kii Sitaan tuuŋŋuee ní ki gbáà-mi, án nín làá ŋá pu ḿ taa nín̄ cáá dilambilee#12.7 Dūú ŋmàntī nì Gala 4.13-15.. 8Ŋfunyɔm mita ní m mēē ti-Dindaan iween gbanti pu, yii ú lēē-i m-pu. 9Ní u kíí-mi yii: «M-ŋanti tin m ŋáań-see ŋmāntì-si, kun puee sii wɔfii pu ní man dì ki dàkà m-pɔŋŋu.» Míǹ puee an mɔ̄ǹ-mi ḿ nīn pàkà m-ba m-wɔfii pu, án nín làá ŋá pu Kriisitoo pɔŋŋu ń nīn tūǹ m-pu ditundee. 10An pu ní m-wɔfii bɔti mɔ̄ǹ-mi. Bi nín sìí-mi puee, nì falaa un m jīǹee, nì bi nín páb̀-mi puee, nì dinimbinaamandi din m kāntée, Kriisitoo pu ní tíǹ kɔkɔ bàń m-pu míǹ, kun puee iwɔfi yaa kɔ́-mee, míǹ ní m kāntí mpɔn.

Pɔɔl bíi yáliŋkí Kɔranti yab pu

11M yaa bíi sòoǹ kii uwaatee, nimbi di yāntì m sòoǹ míǹ, di sá yii nimbi di bàà máaǹ kí sòoǹ kí mɔ̄tì m-pu. Báà m yaa kaa bí tibanaaa, ni-kpambamɔntiŋee kaa jítiǹ-mi tiba nì tiba poon. 12Maamaacib nì tidaandi tin Unimbɔti pɔŋŋu yāntì m ŋá nì kimɔtii tikɔkɔ poon ni-ceeyee dàkà yii m sá Yeesu kpambal. 13Ba ní m ŋá ki tīī Kriisitoo nikitiŋ ŋin kíǹee ní kaa ŋá ki tīī nimbi. Tin baba maa yāntì ní ŋá kí tīī-mee di sá ni nín kaa kpíiǹ-mee, an puee ní dū m-yìntitam kí pɔ̄-mi!

14M tí bɔ́ntì kí dāan̄ ni-cee ntataatiim. Nimbi di kaa làá nīn yì m-jītam, di sá yii nimbi ní m là, kaa sá ni-nimbiliŋ. Kun puee an kaa sá mbiyaamu di kpīintí bibaatiibi, ama bibaatiibi di kpīintí mbiyaamu. 15Mamee, an mɔ̄ǹ-mi ḿ dū tin kɔkɔ m cááyee kí kúntí ni-pu kí kpáaǹ m-ba kí tūtuǹ-ni. Man yaa néeń nimbi míǹ tikpilee, nimbi kaa làá nīn néeń-maaa?

16Nimbi ni-ba, ni làá ká yii maa sá digìńdi ki tīī-ni, ama biba lì yii an sá nciin ní m ŋá kí ŋmàtiǹ-ni kí jī. 17M dī bin m túnní ni-ceeyee ubɔ pu ki jíń-ni tibaaa? 18Man nín dū Tiiti nì kinabiki kiba ki tú bí cù ni-ceeyee, bi jíń ni-wanti tibaaa? Man nì Tiiti landɔkɔŋu sá mbaanti ní, ní ti-ŋáaǹtam mun mbaantiim.

19An yaa yíì ni pée kíĺ ki dàkafī dooooyee yii ti là ní nīn yíì-ti binimɔntiibee pu ní m sòoǹ míǹ? Aayee, kaa sá míǹ. Ti sòoǹ min Kriisitoo lèe ní Unimbɔti nimbiin. Nnabineeŋkaamu, tin kɔkɔ ti sòoǹ nì nee, an sá kí tūtuǹ-ni ní cù nyɔkɔpu nnimbɔtisan poon ní. 20M fàŋkí yii ḿ taa láa bàń ni-cee kí ká-ni min poon maa bàà lèe, ni mun ń ká man min poon naa bàà lèe. Maa là kí bàń kí ká-ni kujaau nì kináŋ nì diŋuul nì timɔn nì asiibil poon. Maa tí là kí bàń kí ká ni sòoǹ fám fám nì dilambil ki bí fìkil fikil poon. 21M fàŋkí yii m-dāantam ni-ceeyee, m-Nimbɔtiu ń taa sìntīǹ-mi taapu ni-cee ḿ sɔ̄ bin nìn ŋá ikpiti ki gbíntì ki ŋúb́ bi-bimbikpitim, tijɔkɔndi nì tilaakpaalee pu.

Currently Selected:

2 Corinthiens 12: BASSARDC

Highlight

Copy

Compare