Mateo 2
2
Baŋidib la ken yela
1Ba daa duꞌa Yesu Betilehem n be Juuda soꞌolim, naꞌab Herod saŋa la. Ka dap bane a baŋidib yi ya nyaꞌaŋ n kenn Jerusalem na 2n buꞌosid ye, “On ka ba duꞌa ye o niŋ Jew dim naꞌab la be yaani? Bozugo ti nye ne o nwadibil ya nyaꞌaŋ, lin zug ka ti kena ye ti puꞌus o.”
3Naꞌab Herod n daa wum la, li pak on ne Jerusalem dim wusa. 4Ka o buol Winaꞌam maalmaan kpeenmnam ne gbauŋmiꞌidib n buꞌosi ba wusa ye, “Yaani ka ba na ti duꞌa Kiristo la?” 5Ka ba yel o ye, “Betilehem n be Juuda soꞌolim, bozugo Winaꞌam nodiꞌesidib la da sobne ala ye,
6‘Yanam Betilehem dima,
Betilehem kane be Juuda soꞌolim la,
ye ya naꞌam kaꞌ bumbil Juuda naꞌanam sisooginee,
ye bozugo ya ni ka naꞌab na yi na
n gur on Winaꞌam nidib Israel dim.’ ”
7Ka Herod suꞌa buol baŋidib la n buꞌosi ba saŋkan ka nwadibil la daa nie, 8ka yeli ba ye, “Kem Betilehem n ia suꞌuŋa, ka ya yaꞌa nye biig la, yanam leb na ka m baŋ, ka mam me na keŋ n puꞌus o.”
9Ka ban wum naꞌab la yel la, ka ba keŋ. Ka nwadibil kan ka ba daa nye ya nyaꞌaŋ la, gaad ba tuon hale n paae ziꞌen biig la n be zinꞌisiꞌa la.
10Ban daa nye nwadibil la, ka ba sunya maꞌae. Ka ba maal sumalisim bedego. 11Ka ban kpenꞌ yin la n nye biig la ne o ma Meeri, ba igin teŋin n puꞌus o, ka yidig ba bunsuma la n tis o piini line a salima ne frankinsense ne mir.
12Ka Winaꞌam saꞌali ba zaansuŋ poogin ye ba da lem leb naꞌab Herod saꞌane. Alazug ka ba luak n leb kul ba meŋ teŋin.
Ba n zo keŋ Egipiti teŋin la yela
13Ka ban yi la, ka Zugsob malek nie o meŋ n paꞌal Josef zaansuŋin n yel o ye, “Duom n zaŋ biig la ne o ma n zo n keŋ Egipiti teŋin n zinꞌi anina n ti paae saŋkan ka m na yel uf siꞌel, bozugo naꞌab Herod na ti ied biig la ye o ku.”
14Ka Josef due yuꞌuŋ n zaŋ biig la ne o ma n keŋ Egipiti teŋin 15n zinꞌin anina hale ka Herod ti kpi. Lin na ke ka Zugsob la da yel ne o nodiꞌes noor siꞌem la niŋ ameŋa ye, “M buol m biribiŋi yi Egipiti teŋin la na.”
Naꞌab Herod n ke ka ba ku biis la yela
16Herod n daa baŋ ye baŋidib nwa zam o la, o sunf daa pelig hale. Ka o tum ye ba ku biribis bane be Betilehem ne teens bane kpiꞌe anina la, bane a yuma ayi bee bane pu paae ala wusa, wenne on buꞌos baŋidib n baŋ saŋa la.
17Ka Winaꞌam nodiꞌes Jeremia da yel siꞌem la niŋ ameŋa ye,
18“Ba wum soꞌ kukor Rama teŋin,
ka o kaasid ka fabin.
Li ane Rakel, n kaasid o biis la yela,
ka pu siakid belisigo
bozugo o biis kpi ne.”
Ba n yi Egipiti n leb na la yela
19Ka naꞌab Herod kuꞌum nyaꞌaŋ la, ka Zugsob malek daa nie o meŋ n paꞌal Josef zaansuŋin, Egipiti teŋin, n yel o ye, 20“Duom n zaŋ biig la ne o ma n leb Israel teŋin, bozugo bane da ied biig la ye ba ku o la, kpiya.”
21Ka o due n zaŋ biig la ne o ma n kul Israel teŋin. 22Ka Josef n daa wum ye Arkelaus n di o baꞌ Herod naꞌam Juuda ni la, o daa zotne dabiem ye o keŋ anina. Ka Josef zaansim nye ka li saꞌal o. Ka o yi anina n keŋ Galilee soꞌolim 23ka keŋ zinꞌin Nazaret teŋin, wen wuu Winaꞌam nodiꞌesidib la da yel siꞌem la niŋ ameŋa, ye, “Ba na buol o ye o ane Nazaret teŋ nid.”
Currently Selected:
Mateo 2: kus
Highlight
Share
Copy
Want to have your highlights saved across all your devices? Sign up or sign in
© 1996, Wycliffe Bible Translators, Inc. All rights reserved.