ÀfaꞋa 20

Pɔ̂l gha a Màsèdonìà nè Akayà

1Mbɨ̀Ꞌɨ̀ èdziꞋ e bente a Efesɔ̀s tè fi la, Pɔ̂l tɔ bòt Yesò, è shu abua yɔb nê bɔ̀ me nɨ èngǎ̧ Mbɔ̧ɔ̧mà ngà nè mbì, mbɔ̂ ndàꞋnè àwɔb me ghǎ. Ndɔ̀Ꞌ abàꞋ və ale, nga àlaꞋ a Màsèdonìà. 2Tà me ghǎ, tà tsè èdziꞋ ko nyaŋ ndàꞋà mèngǎ̧ nɨŋ ndɔ̀ktè bòt Yesò. Ndɔ̀Ꞌ a edziꞋi mbɔŋ nga a àlaꞋ a Glɨ̂k, 3ntsèke èŋu yetat. È tsiꞋ àfɨꞋa tàa ntàŋka eghǎ a Silìà la, tà ye nê Bèjuê aà ntà̧aã ebùŋè àvi. Ale, tà tsiꞋi ekua akwèn ngà ntsè nè Màsèdonìà. 4Sopatà, waã Pȩlùs wu è wu wòt Belìà la, li ngà bɔ̂ tò. Bɔ li ngà mɨ̧̂ nè Àlistakùs bɔ̂ Sèkundùs bɔ dzə a Tèsàlonikà la, nè Gayɔ̀s wu tà dzə a Debì la, nè Tȩ̀kɨkùs bɔ̂ Tɨ̀lòfimùs wu bɔ dzəâ àbâ àlaꞋ a Esìà la, nè Tɔ̀màtià. 5Bòt baa e li ngà nè mbì, nchɨ̀Ꞌɨ̀ awa a Tloas. 6Èli bu bɔ̀ɔ njɨ̀a èghɨjɨ bu bɔ̀ɔ ntɔ̀ nê wu èghɨjɨ bled kà wua nkɔ̀Ꞌɔ la e li ntsè ba nyi a èbem ànkànuꞋ a Filìpȩ, èli e mè me tsè betà̧â̧ ba kwene ane yɔb a Tloas və, ba tò ba e tseke ane nkàb abàꞋ və.

Pɔ̂l lìà a mànga a Tloas

7È li ngu àlia mbì ane nkàb, ba bu̧u̧tè adzìꞋ yeamɔꞋ ejɨ èghɨjɨ Waã Mbɔ̧ɔ̧mà. Pɔ̂l è làꞋa èngǎ̧ Mbɔ̧ɔ̧mà abua bòt bu tè ngà ngu a èntɨ̧ɨ̧ ètsəꞋ, ndɨ̀ wu tà lè wu saꞋa atetsɔꞋ me ghǎ la. 8MèkaꞋà li ntàꞋa wu àtsəalob nè ègwet yu ba li ngu a èbèm la. 9Wakèsà kǒ èlen tò wu Yutikùs la ko nê ye wu adù̧ wundù ye tseke la. Mbɨ̀Ꞌɨ̀ Pɔ̂l nàa ndàꞋà la, kèlɔ ke me baãaã wakèsà wu ngà wuê nè mbì. AdzìꞋ me wù̧ù̧ne, tà lì tê ntsɔ̀Ꞌɔ̂, ndɔꞋɔ ane ntɨ̀a tetat a ègwet lob yaa ndèb a si. Bɔ me laꞋ nê bɔɔ ŋèꞋe atò, tà pfə tê ndɔ̀Ꞌ. 10Ka Pɔ̂l chu nga a si, sà̧à̧mè àvi a ègwet tò, mbà̧aã atò, nê, “Bɨ̀ ka mbɔ, tà bakà pfə.” 11Pɔ̂l ghɨ̀ ale, tà mè nkɔꞋ nga àtsəalob yu, mbòꞋa bled nkwet bɔ̂ bòt Yesò bu. Tà ghɨ̀ ale, tà me làꞋà bɔ̂ tò ba tè nyèm saꞋ tà me ghǎ. 12Bòt bu e nɨ̀ wakèsà wu tà yu̧u̧me la me ghǎ àpfəè. Bɔɔ̀ ngà ale mèntɨ̧ɨ̧ mɔb fi.

Pɔ̂l lɔ̀Ꞌɔ a Tloas ngà a Miletùs

13Ba li nyǐ a èbem taꞋà ànkànuꞋ tè ngà ngu àpfəèa Asɔ̀s è wu àdziꞋ yu bàa gha enɨ a Pɔ̂l abot la. Tà li shu awa nê bà kwene ane zi abot nkàà nê tà li ngua nga eghȩ̀ȩ̀ne àka. 14ÀfɨꞋa tà kwene ane ya a Asɔ̀s la, ba nɨ atò ndzi a èbem ànkànuꞋ yu me ghà ne àpfəèa Màtilìn. 15NdɔꞋɔ abàꞋ və, ètsəꞋ e mè tsi, ba tse àlaꞋ a Chɨɔ̀s. ÈtsəꞋ e mè me tsi, ba nyi àlaꞋ a Samɔ̀s, è me wu ane àli akwèn ba bɔ̂ nyi Miletùs. 16Pɔ̂l li taŋke tsè a ngèt Efesɔ̀s mbɨ̀Ꞌɨ̀ ye tsòke àfɨ̀Ꞌ àbâ àlaꞋ a Esìà. Tà li ngua ntèmna enyi a Jèlusalèm ka àlia èghɨjɨ Pentekɔ̀s aa kùꞋu.

Pɔ̂l làꞋnè bɔɔjuŋ a Efesɔ̀s

17Pɔ̂l li ntsèke a Miletùs, ntsɔ̀tè ntu̧ a Efesɔ̀s nê bɔɔjuŋ bu a chɔsì la è kɨꞋɨ ndzè àvi. 18ÀfɨꞋa bɔ kɨꞋɨ la, tà shu abua yɔb nê, “Bɨ ko ndɨ e ndi ntàꞋa tseke ba nɨ̧̀ ba mè ntàꞋa ghɨ̀ mènəè ebùꞋu ane àlia mbì am àbâ àlaꞋ a Esìà la. 19E ndi ngua ngɨ̀à àfàꞋ am mbɨ̀Ꞌɨ̀ wɔ̀fàꞋ Mbɔ̧ɔ̧mà àfɨ̀Ꞌ àko nè mèsi, kà wua ŋèꞋa tèkwȩ taã a ègwet. È ghɨ̀ è wu àfɨ̀Ꞌ àko, Bèjuê ko e taꞋa ŋa ngoꞋ abua am, e mbɔ̂ me ghɨ̌ àfàꞋ yu nga wuê nè mbì. 20Bɨ ko nê, ngule ànəê àko betsiꞋa a tɨŋe awɨ̧ e ndi è ka laꞋa abua yɨ̧ àsà̧aã èwen nè lob tɨ̧ la, a ntsě. 21E ndi səèŋkè ètû̧ Bèjuê, nè bòt kà wu Bèjuê nê, bɔ̀ waꞋa mènəè kàbɔ̀ŋ mɔb, nkuŋe a Mbɔ̧ɔ̧mà, mè ndzì mèntɨ̧ɨ̧ mɔb ane Yesò Klistò Lefɨ̀Ꞌ wa.

22“Maa ghǎ a Jèlusalèm àfɨ̀Ꞌ yaa mbɨ̀Ꞌɨ̀ e ghɨ mbɨꞋɨ̀ Fo Mbɔ̧ɔ̧mà è shu la, mbɔ̂ è nka lem nko àghɨa nga ghɨ̌ ane yaã abàꞋ və la. 23Mâ ko wuê nê, Fo Kèfə nàà shu am a èbem àpfəèà nɨ̧ àgème mâ tsè la nê è nko na lob tèfȩ nè ngoꞋtsə tèa nchɨ̀Ꞌà am la. 24A batè ngu ale, ka è nka tsi nɨ mbɨ̧̀ yaã ane àghɨa ko, mbɨ̀Ꞌɨ̀ epaate àfaꞋa Yesò Lefɨ̀Ꞌ li ŋa abua am nê è ngɨa la. ÀfaꞋa mbɔŋ wu ndɨ màa tsɔ̀te Ntu̧ Ntsɔ̧̀ ndɨ Mbɔ̧ɔ̧mà nàa ngɨ̀à ntsɔ̧̀ adù̧ bòt bi la.

25“Mâ ghȩ̀ȩ̀ne a kètsìà wɨ̧ bɨ̀agème ndàꞋà ndɨ Kèfɔ̧̀ Mbɔ̧ɔ̧mà nàa la. Ka nè àfɨ̀Ꞌ yaa, mâ ko nê wòt ane yɨ̧ ka li me pfə e mě ye am a. 26È wu ale, e ngua shua abua yɨ̧ laane wàà nê, bɨ ghɨ̀à ndɨ Mbɔ̧ɔ̧mà nàa liime awɨ̧ la, àyu a ye awɨ̧. È ntsě èsaꞋa am. 27Ngu nê ànəa ako Mbɔ̧ɔ̧mà nàa nkwaꞋta eghɨ̀ kâ e shu awɨ̧ la a ntsě. 28Bɨ̀ me lɨ̀ŋkè àwɨ̧ bɨ̀ambɔŋ nè bòt bu Fo Kèfə è zì àwɔb a tèkitebu tɨ̧ la ntsɔ̧̀. Bɨ̀ me lɨ̀ŋke a chɔsì Mbɔ̧ɔ̧mà mbɨ̀Ꞌɨ̀ mbaabà nàa mbààba njɨ̀ ti la. Waã Mbɔ̧ɔ̧mà li mpfə ka ngɨ̀ bòt mbɔŋ e tsiꞋi èbe Mbɔ̧ɔ̧mà. 29Mâ ko nê, maa me ghɨ̀ tê sà àwɨ̧, bòt ko mbɨ̀Ꞌɨ̀ ngwitenyà̧ e nyi a kètsìà wɨ̧ ka bɔ̀ ka wu sa wòt ane yɨ̧. 30Àfɨ̀Ꞌ àko aa li nkùꞋ, bòt ko e lɔ̀Ꞌɔ a kètsìà wɨ̧ fɨte mènəè è shu mbɨ̀Ꞌɨ̀ etsòkè àtsəa bɔkatè Yesò bu. 31È wu ale, bɨ̀ me ko awɨ̧ ntsɔ̧̀ mèa nkù̧ù̧ta na e nde laꞋa èngǎ̧ Mbɔ̧ɔ̧mà abua waa waa ane yɨ̧, ètsəꞋ nè nèngû̧ ane èngùꞋ yetat nè mèsi àghɨ am la.

32“Àfɨ̀Ꞌ yaa, mâ zì àwɨ̧ a tèkitebu Mbɔ̧ɔ̧mà me shu̧u̧te nê èngǎ̧ tò wu àa nyɨ̀Ꞌta ndɨ tàa nkɔ̀ŋkà bɔbȩ la è ghɨa bɨ̀ me kweele. Taa ko lɔ̀ktè awɨ̧ e mě ŋà àwɨ̧ èlɔ̂t wu tà paŋe abua bòt bi bàgème la. 33E mbakà ghòꞋnè àghɨa wòt, ka wuê silbà, kò goêl, kò ndǐ wòt leꞋ. 34Bɨ̀ambɔŋ e ko nê mâ nɨ èbu bɔ̧ baa nɨŋ fàꞋ njû̧ àghɨ àgème ba bòt bɔ̧ bàgème è le wua nkɨ̀ŋkà la. 35Mâ nyɨꞋtè àwɨ̧ ane balu̧ bàgème ndɨ ba bɔ̂ ndɨ bàa me fàꞋà nyaŋ mbɨ̀Ꞌɨ̀ me tɨŋe bòt kà ye ayɔb la, nkwàꞋte ànəa Yesò Lefɨ̀Ꞌ zìambɔŋ li shuê la, nê, ‘MèngùꞋte naa ne màŋa tè ntse a mànɨa.’ ”

36AfɨꞋa Pɔ̂l e paa èngǎ̧ vi la, tà tèm tènjûŋ ti a si bɔ̂ tò ba bàgème e tsaꞋte a Mbɔ̧ɔ̧mà. 37Bɔ lɔ̀Ꞌ me màꞋà èbu bɔb a tèkwȩte Pɔ̂l, elàꞋne atò, mèsi chu àghɨ a waa waa ane yɔb. 38Ànəê yu tà laꞋnê, bɔ̀ ka li me pfə etsi ye avi la, a tàꞋa saa awɔb. Bɔ nɨ atò ngà ntsaa a èbem taꞋà ànkànuꞋ yu.

Currently Selected:

ÀfaꞋa 20: mnf

Highlight

Copy