FAAALIGA, 2
2
O LE MATAUPU II.
O tusi i agelu a ekalesia o i Efeso, ma Semurana, ma Perekamo, ma Tuatira.
1Ia e tusi i le agelu a le ekalesia o i Efeso. O mea nei ua fai mai ai lē ‘u‘u i fetu e fitu i lona lima taumatau, o lē savali i totonu o tuugālemepa auro e fitu. 2Ua ou iloa i au galueaga, ma lou tiga, ma lou onosai, ina ua e le lavatia i e ua leaga; ua e tofotofo foi i e ua fai mai o aposetolo i latou, a e leai lava, ua e iloa foi o tagata pepelo i latou, 3ma ua e lavatia, ua ia te oe foi le onosai, ua e tautiga ona o lo‘u igoa, e te lei faavaivai lava. 4A ua ou iloa se mea ia te oe, ona ua e tuua o lou uluai alofa. 5O lenei, ia e manatua le mea na e paū mai ai, ma ia e salamo, ma e faia au uluai galuega; afai e leai, ona ou vave alu atu lea ia te oe, ou te aveesea lau tuugālamepa i le mea e tuu ai pe afai e te le salamo. 6A ua ia te oe lenei mea, ina ua e ‘ino‘ino i galuega a le au Nikalaitai, o a‘u foi ou te ‘ino‘ino i ai. 7O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, ou te avatua ia te ia e ‘ai i le laau o le ola o i totonu o le parataiso o le Atua.
8Ia e tusi foi i le agelu a le ekalesia o i Semurana, O mea nei ua fai mai ai lē muamua ma lē mulimuli, o le na oti, a ua ola mai, 9Ua ou iloa au galuega, ma lou puapuaga, ma lou mativa, (a ua e tamaoaiga,) ma le upu faifai a ē ua fai mai o Iutaia i latou, a e leai lava, a o le sunako o Satani i latou. 10Aua lava e te fefe i mea o le a e tiga ai. Faauta, o le a tuuina atu ni o outou e le tiapolo i le fale puipui, ina ia tofotofoina ai outou; e po agafulu foi e puapuagatia ai outou. Ia e faamaoni seia oo i le oti, ona ou avatu ai lea ia te oe o le pale o le ola. 11O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, e le afaina lava o ia i le oti faalua.
12Ia e tusi foi i le agelu a le ekalesia o i Perekamo, O mea nei ua fai mai ai le ua i ai le pelu e faatau maai ona itu ua maamaai lava, 13Ua ou iloa au galuega, ma le mea ua e nofo ai, o i ai le nofoālii o Satani, ua e taofi mau foi i lo‘u igoa, ma ua e le faafitia le faatuatua ia te au i ia ona po lava na i ai Anetipa o la‘u molimau o le na faamaoni, sa fasiotia o ia na ia te outou i le mea o nofo ai Satani. 14A ua ia te au ni nai mea ia te oe, ona ua ia te oe o e ua taofi i le mataupu a Palaamo, o le na a‘oa‘o ia Palako e tuu atu le mea e tausuai ai i luma o le fanauga a Isaraelu, ona ia aai i mea ua fāsia mo tupua ma ia latou faitaaga. 15E faapea foi ona ia te oe o e ua taofi i le mataupu a le au Nikalaitai; o le mea ou te ‘ino‘ino i ai. 16Ina e salamo ia; afai e leai, ona ou vave alu atu lea ia te oe, ou te tau foi ma i latou i le pelu ai lo‘u gutu. 17O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, ou te avatua ia te ia le manai lilo e ‘ai ai; ou te avatu foi ia te ia le maa sinasina, ua tusia foi i le maa le igoa fou, e le iloa e se tasi ua na o le ua maua.
18Ia e tusi foi i le agelu a le ekalesia o i Tuatira, O mea nei ua fai mai ai le Atalii o le Atua, o le e pei o le mumū o le afi ona mata, o ona vae foi e pei o le ‘apa pupula, 19Ua ou iloa au galuega ma lou alofa, ma lou auauna mai, ma lou faatuatua, ma lou onosai, ma au galueaga, ua sili mea mulimuli i mea na muamua. 20A ua ia te au ni nai mea ia te oe, ona ua e tuu pea le fafine o Iesepela, ua ta‘ua o ia e ia o le perofeta fafine, e a‘oa‘o ma faasese i a‘u auauna, ina ia faitaaga, ma aai mea ua fāsia mo tupua. 21Ua ou tuu atu foi ni ona aso ia salamo ai i lana faitaaga, a ua le salamo lava o ia. 22Faauta, o a‘u ou te lafo ia te ia i le moega, atoa ma e ua mulilulua ma ia, ina ia puapuagateleina, pe afai latou te le salamo i a latou galuega; 23ou te fāsia foi ana fanau ia oti; e iloa foi e ekalesia uma, o a‘u lava o lē suesue i manao ma loto; ou te avatua foi ia te outou taitoatasi e tusa ma a outou galuega. 24A ou te fai atu ia te outou, atoa ma nisi o i Tuatira, o e ua le i ai lenei mataupu, ma ua latou le iloa mea loloto a Satani, (pei ona ta‘ua e i latou,) Ou te le tuuina atu se isi avega ia te outou; 25a e peitai o le mea ua ia te outou ia outou taofi mau ai, seia ou alu atu. 26O lē manumalo foi, ma tausi i a‘u galuega seia oo i le gataaga, ou te avatua ia te ia e pule i nuu ese; 27e pule foi o ia ia te i latou i le tootoo uamea; e nutipalaina i latou pei o ipu a lē fai ipu omea, e pei o a‘u foi ona ou maua mai i lo‘u Tamā; 28ou te avatua foi ia te ia le fetu ao. 29O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.
Currently Selected:
FAAALIGA, 2: SOV
Highlight
Copy
Compare
Share
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
