FILIPI, 4
4
O LE MATAUPU IV.
O le alofa o le ekalesia ia Paulo.
1O lenei, o‘u uso e, o e ou te alofa ma naunau i ai, o lo‘u fiafia ma lo‘u pale le au pele, ia faapea ona tumau o outou i le Alii. 2Ou te aioi atu ia Evotia, ou te aioi atu foi ia Sunetui, ia tasi lo la manatu, i le Alii. 3Ou te faatoga atu foi ia te oe, lo‘u fesoasoani faamaoni, ia e fesoasoani ia te i laua, o e na finau faatasi ma a‘u i le tala lelei, atoa ma Kelemene ma nisi uma e na galulue faatasi ma a‘u, ua i le tusi o le ola o latou igoa. 4Ia outou olioli i le Alii aua le aunoa; ou te toe fai atu, ia outou olioli. 5Ia iloa lo outou agamalu e tagata uma lava; ua lata mai le Alii. 6Aua ne‘i popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. 7O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.
8Le au uso e, o le toe upu lenei; o mea uma ua moni, o mea uma ua ta‘uleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foi o se isi amio lelei, po o se tasi mea e viia, ia outou manatunatu i ia lava mea. 9O mea foi ua a‘oa‘oina ai outou, ma outou talia, ma outou faalogo i ai, ma outou vaai mai ia te au, ia outou faia ia lava mea; ona ia te outou lea o le Atua e ona le manuia.
10A ua ou fiafia tele i le Alii, auā o ona po nei ua toe tupu mai ai lo outou manatunatu mai ia te au; sa outou manatunatu foi i ai, a ua le maua e outou se ala. 11Ou te le fai atu ona o le mativa, auā ua a‘oa‘oina a‘u ia to‘a filemu lo‘u loto i mea ua ia te au. 12Ua ou iloa le mativa, ua ou iloa foi le mauoa, o i mea uma lava ou te i ai, ma mea uma e oo ia te au ua a‘oa‘oina ai a‘u ia ou ma‘ona, ma ou fia ‘ai, ia faulai mai mea, ma ia oge mea. 13Ou te mafaia mea uma lava i le faamalosi mai o Keriso ia te au. 14A e ui lava i lea na outou agalelei, ina ua outou alolofa mai i lo‘u puapuaga. 15Ua outou iloa foi, outou Filipi e, o le amataga o le tala lelei, ina ua ou alu atu nai Maketonia, e leai se ekalesia na alofa mai ai ia te au i le mataupu o le foai mai ma le talia o mea, na o outou lava. 16Auā foi a o i Tesalonia a‘u, na outou avatu mea na ou mativa ai, ua atu tasi, ma le atu lua foi. 17E le ina ua ou saili se mea alofa, a ou te saili le fua e atili ai ona ta‘uleleia ai outou. 18A ua ia te au mea uma, ua tele lava, ua atoa mea ia te au, ina ua maua e a‘u mai ia Epaferoti o mea mai ia te outou, o mea manogi lelei, o le taulaga e talia ma le mālie i le Atua. 19A o lo‘u Atua e faaatoa e ia ia te outou mea uma e matitiva ai outou, e tusa ma le faulai o lona viiga, ia Keriso Iesu. 20Ia i le Atua lo tatou lava Tamā le viiga e faavavau faavavau lava. Amene.
21Ua ou alofa atu i le au paia uma o ia Keriso Iesu; o alolofa atu ia te outou le au uso uma ua ia te au. 22O alolofa atu ia te outou le au paia uma, a e sili lava i latou o i le aiga o Kaisara. 23Ia ia te outou uma lava le alofa tunoa o lo tatou Alii o Iesu Keriso. Amene.
Currently Selected:
FILIPI, 4: SOV
Highlight
Copy
Compare
Share
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
