มัดทาย 20
20
อะหงุ่น หฮวีง เญย หว่า-เป๊ย
1“ทิน-ฮู่ง โหฒว เฒี้ยว กุ๊น เมี่ยน เซ ฮนั้ง เต้า อะหงุ่น หฮวีง เญย เฒี้ยว นอ. ลู่ง ดอม เฑี้ยว เญย, นิ่น ธ้วด มี่ง ล์อ เมี่ยน เถง นิ่น โหฒว อะหงุ่น หฮวีง เญย กง. 2เหธา กง-เมี่ยน ตี่ง เหฒียง ปุน หอบ เมี่ยน โพว-ทง ธี้ง เหยียด ฮนอย เญย กง-ฒิ่น, หฮวีง-เฒี้ยว ฯฒฯ พ้าย นิ่น บัว มี่ง วั้ว หฮวีง โหฒว กง.
3“ลู่ง ต้ม ดอม ดั้ว นอม เฒี่ยง โห่, หฮวีง-เฒี้ยว แอ๋ง มี่ง วั้ว เฮย ปวัด เต๋ย เมี่ยน โซ้ว เจี๊ยน วั้ว, ไม้ โหฒว หาย หญู่ง. 4นิ่น ฯฒฯ ก๊อง, ‘เม่ย บัว หย่า มี่ง เยีย เญย หฮวีง โหฒว กง ม่าะ! กง-ฒิ่น หอบ หฒุ บัวะ เหฒีย เยีย ฯฒฯ ปุน บัวะ วั้ว เม่ย บัว.’ นิ่น บัว ฯฒฯ มี่ง อ๊ะ.
5“ลู่ง เหฒียง อ๋าน เหฒียบ เหญ่ย นอม เฒี่ยง โห่, แอ๋ง เหธา เหฌี่ย อ๋าน ปัว นอม เฒี่ยง โห่, นิ่น ฟี่ ฮนั้ง เญย ล์อ เมี่ยน โหฒว กง. 6ลู่ง ม์าน-หฮมวัง เต๋ย, อ๊า ลั่ม ปยา นอม เฒี่ยง โห่, หฮวีง-เฒี้ยว แอ๋ง มี่ง วั้ว เฮย ปวัด เต๋ย เมี่ยน โซ้ว เจี๊ยน วั้ว. นิ่น ฯฒฯ ก๊อง, ‘เม่ย บัว เหว่ย หาย ติ่ว เฒี่ยง ฮนอย โซ้ว เจี๊ยน หน่าย เฮ่นๆ เญย, ไม้ โหฒว หาย หญู่ง?’
7“นิ่น บัว เตา, ‘เหว่ย หฒุ ไม้ ม่าย เมี่ยน ธี้ง เยีย บัว โหฒว กง.’
“หฮวีง-เฒี้ยว ฯฒฯ ก๊อง, ‘วั้ว หญู่ง, เม่ย บัว หย่า มี่ง วั้ว หฮวีง โหฒว กง ม่าะ!’
8“อ๊า ลั่ม หฮมวัง, หฮวีง-เฒี้ยว บั๋ว นิ่น เญย กุ๊น กง เมี่ยน, ‘เห่ว กง-เมี่ยน ต้าย คอย กง-ฒิ่น ปุน นิ่น บัว อ๊ะ. ต้ง ต้าย โหฒว ฆะฮ้า วั้ว เต๋ย อ๋อย หฒุ ปุน ด่าง. ต้าย ด่าง วั้ว เต๋ย อ๋อย หฒุ ปุน ฆะฮ้า.’#เลวี 19:13; หฑั่ม เล์ย-หลัด 24:15
9“ต้ง ปยา นอม เฒี่ยง โห่ หธีง ตุ๊ เจี์ย กอน โหฒว กง วั้ว เต๋ย ตุ๊ ปวั๊ง เหยียด ฮนอย เญย กง-ฒิ่น. 10ฮนั้ง หน่าย, ธี้ง ด่าง วั้ว เต๋ย หล่าย อ๋อย ตุ๊ เก้า ธั้ม. มป่า นิ่น บัว ฟี่ ฮนั้ง เญย ตุ๊ ปวั๊ง เหยียด ฮนอย เญย กง-ฒิ่น ฮนั้ง. 11นิ่น บัว ฒิบ กง-ฒิ่น มี่ง หย่า งบ หฮวีง-เฒี้ยว. 12นิ่น บัว ก๊อง, ‘ฆะฮ้า ต้าย วั้ว เต๋ย ขูง โหฒว ดุ นอม เฒี่ยง โห่ เญย กง ฮนั้ง นีอา. ญ่าน เม่ย หธ่อ ปุน เหธา เยีย บัว ฟี่ บัวะ เญย. เยีย บัว เฒี่ยง ฮนอย หฒุ หญุด พุย หย่า โหฒว กง เก้า โค้ว นิ่น บัว.’
13“หฮวีง-เฒี้ยว ฯฒฯ เตา เต้า วั้ว เต๋ย กง-เมี่ยน. ‘โย์ว อ่า, เยีย ไม้ เฒ์ย เผียน เม่ย เหลาะ. เม่ย ไม้ เฒ์ย เหธา เยีย ก๊อง ตี่ง หฒิว กง-ฮนอย เญย กง-ฒิ่น ไฟ? 14ต้อ เจี๊ยน เม่ย เญย กง-ฒิ่น หฑวน อ๊ะ โอ่. ฆะฮ้า ธี้ง น้าย เต้า เยีย อ๋อย ปุน เหธา เม่ย ฟี่ บัวะ. 15เยีย กั้น เญย ญ่าน ไม้ เฒ์ย เซว่ย เยีย กั้น หล่ง? ปวัด เยีย โหฒว เฮญี้ยว หลง เม่ย เหมว่ย เจี๊ยะ ไฟ?’”
16เยซู แอ๋ง ก๊อง เซ้ด เมว์ย หว่า. “ฮนั้ง หน่าย, ฆะฮ้า วั้ว เต๋ย อ๋อย ตุ๊ เยียม วั้ว ด่าง. เยียม วั้ว ด่าง เญย อ๋อย หฒุ เยียม ฆะฮ้า.”#มัดทาย 19:30; มาโค 10:31; ลูกา 13:30
เยซู แอ๋ง ก๊อง ตะฟาม หฑุ่น นิ่น อ๋อย หฒุ ไต่
(เป๊ย หมั่ง มาโค 10:32-34; ลูกา 18:31-34)
17เยซู ยั่ง เจ๊า มี่ง เยลูซาเลม ฒี่ง วั้ว หฒั่น, นิ่น ต้อ นิ่น เญย เหฒียบ เหญ่ย เต้า ไซ-ก๋อ มี่ง เพียน เต๋ย ก๊อง บั๋ว นิ่น บัว, 18“หมวัง โอ่. บัว มี่ง เยลูซาเลม ฒี่ง. เถา วั้ว, ป้าม เมี่ยน เญย ตอน, ฯฒฯ หฒุ จิว ปุน ไซ เมี่ยน เปย๊ย เหธา หฌาว เล์ย เญย ฟิน-แซง. นิ่น บัว อ๋อย ตี่ง ไต๋ นิ่น, 19ฆะฮ้า เฒาะ นิ่น จิว ปุน จั๋น. จั๋น ฯฒฯ กวัด โตะ จั๊ด, หล่ง ปย๊า-ปิน เบ๊าะ, แอ๋ง เฒาะ นิ่น ตีง เหฒียบ หฑั่ง จ๋า. มป่า ฆะฮ้า ปัว ฮนอย, ทิน-ฮู่ง อ๋อย ปุน นิ่น นั่ง ต้าย.”
ยากอบ เหธา โยฮัน บัว เญย มา โท้ เญย หว่า
(เป๊ย หมั่ง มาโค 10:35-45)
20วั้ว หฒั่น เสเบดี เญย เอ๊า ต้อ นิ่น เญย อี เต้า ตอน ต้าย เยซู วั้ว, เกว่ย เหฌี่ย ป๋าย, โท้ เหยียด หญู่ง.
21เยซู หน่าย, “เม่ย อ๋อย หล่ง หาย หญู่ง?”
นิ่น เตา, “เฒี้ยว อ่า, โท้ เม่ย แล์ง เม่ย ตุ๊ โหฒว ฮู่ง เญย เฒี่ยง โห่ อ๋อย หฒุ ปุน เยีย เญย อี เต้า ตอน, เหยียด เต้า เฒว์ย เม่ย เญย บย่าว แหมง, เหยียด เต้า เฒว์ย หฒาย แหมง.”
22เยซู เตา วั้ว เต๋ย อี เต้า ตอน, “เม่ย บัว โท้ เญย เม่ย บัว ไม้ ฮิ้ว. เม่ย บัว ไฮ่ ฮบ ต้ง เยีย อ๋อย หฒุ ฮบ วั้ว นอม ฒ้าน#20:22-23 ฮบ น้าย นอม ฒ้าน เป๊ย อ๋อย หฒุ เสี่ยว โค้ว. เญย ไฟ?”
นิ่น บัว เตา, “เยีย บัว ไฮ่ ฮบ เญย.”
23เยซู บั๋ว นิ่น บัว, “เยีย ฮบ เญย ฒ้าน เม่ย บัว หฒะเก้ง อ๋อย หฒุ ฮบ. มป่า เยีย ไม้ ม่าย เล์ย พ้าย หาย เต้า เฒว์ย เยีย เญย บย่าว แหมง ไฟ หฒาย แหมง. เยีย เญย เตีย หลิ่ว เล์ย เหฒียง ปุน หาย เต้า เฒว์ย, วั้ว เต๋ย ฯฒฯ ตุ๊ เฒว์ย อ๊ะ.”
24วั้ว เต๋ย เหฒียบ เต้า ไซ-ก๋อ ไฮ์ ลิ์ว น้าย เต๋ย สี่ ฯฒฯ เฉีย เจี์ย ไห่ น้าย เต๋ย อี มั์ว. 25เยซู เห่ว นิ่น บัว เหยียด ฒู้ง ต้าย ฑ่อย หย่า ก๊อง, “เม่ย บัว ฮิ้ว ตุ๊ จั๋น ม่าย ต้ม เจียน กุ๊น นิ่น บัว. โหฒว โฮล เญย วั้ว เต๋ย ม่าย หลี่ง หัด นิ่น บัว.#ลูกา 22:25-26 26มป่า เม่ย บัว ไม้ หอบ หฒุ ฮนั้ง หน่าย. หาย เต้า อ๋อย ตุ๊ โหฒว โฮล, วั้ว เต้า อ๋อย หฒุ โหฒว เม่ย บัว เญย โปว.#มัดทาย 23:11; มาโค 9:35; ลูกา 22:26 27หาย เต้า อ๋อย โหฒว โฮล เจี๋ย, วั้ว เต้า อ๋อย หฒุ โหฒว เม่ย บัว เญย โน่ว. 28ฮนั้ง เยีย, ป้าม เมี่ยน เญย ตอน นอ, เยีย ไม้ เฒ์ย ต้าย อ๋อย เมี่ยน ฟู-สู เยีย. เยีย ต้าย ฟู-สู เมี่ยน หย่า เซี้ย เยีย เญย แหม่ง เหว่ย หฒัวะ เมี่ยน ธั้ม หฑวน.”
เยซู หฒ่อ หลง อี เต้า มฒีง แม่ง เญย เมี่ยน
(เป๊ย หมั่ง มาโค 10:46-52; ลูกา 18:35-43)
29เยซู เหธา นิ่น เญย ไซ-ก๋อ บัว ธ้วด เยลีโค ฒี่ง วั้ว หฒั่น, ม่าย เมี่ยน ธั้ม เญย กัน เจี๊ยน เยซู มี่ง. 30ม่าย อี เต้า มฒีง แม่ง เญย เมี่ยน เฒว์ย เจี๊ยน เจ๊า-เฮลน ไฮ์ ก๊อง เยซู ยั่ง น้าย ติ้ว เจ๊า เจี๋ย. นิ่น บัว ฯฒฯ เห่ว, “เฒี้ยว,#20:30 ม่าย เต๋ย โล์-ฮนอย โซว ไม้ ม่าย เฒี้ยว น้าย โจ๋ว หว่า. ดาวิด เญย เฒ้ย-ฟุน อ้า! ค้อ-เลี่ยน เยีย บัว ม่าะ!”
31หฒวัง เมี่ยน เหม นิ่น บัว, บั๋ว นิ่น บัว ไม้ ตู๋ง โค โล. มป่า นิ่น บัว จา เห่ว เก้า บุย, “เฒี้ยว, ดาวิด เญย เฒ้ย-ฟุน อ้า! ค้อ-เลี่ยน เยีย บัว ม่าะ!”
32เยซู ฯฒฯ ตี้ง เจี๊ยน เห่ว นิ่น บัว ต้าย, หน่าย นิ่น บัว, “เม่ย บัว อ๋อย เยีย เถง หาย หญู่ง เม่ย บัว?”
33นิ่น บัว เตา, “เฒี้ยว อ้า! โท้ ปุน เยีย บัว เญย มฒีง ไฮ่ หมั่ง ตุ๊ ปวัด.” 34เยซู ค้อ-เลี่ยน ไห่ ฯฒฯ ฮลัว นิ่น บัว เญย มฒีง. นิ่น บัว เลี่ยม เฒ่ย ไฮ่ หมั่ง ตุ๊ ปวัด, ฯฒฯ กัน เจี๊ยน เยซู มี่ง หมี่ อ๊ะ.
Currently Selected:
มัดทาย 20: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
