Awit han Tulo nga Kalalaken-an 1

Nag-ampo ni Azarias

1Nagtikang hin paglakat palibot ha butnga han kalayo an tulo nga kalalaken-an, hira Ananias, Misael, ug Azarias,#1:1 ANANIAS, MISAEL, UG AZARIAS: Amo ini an unob nga mga ngaran nira Sadrac, Mesac, ug Abednego (kitaa ha Dan 1:6-7). samtang nagkakanta hira hin mga imno ngadto sa Dyos ngan nagdadayaw ha iya nga Ginoo. 2Niyan hinmadong ngan tinmindog hi Azarias ngan didto ha butnga han kalayo nag-ampo hiya ha dako nga tingog: 3“O Ginoo nga Dyos han amon kaapoy-apoyan, nagdadayaw ngan nagdadayeg kami ha imo; pagpasidunggan unta ha kadayonan an imo ngaran. 4Gindumara mo kami sugad han angay ha amon. Ha ngatanan nga butang nga imo ginbuhat ha amon, dayuday nga tangkod ka ha amon, ngan han paghukmi mo ha amon, dayuday ka nga waray pinalabi. 5Ginbuhat mo an matadong ngan gindad-an mo hin karat-an an Jerusalem nga baraan nga syudad han amon kaapoy-apoyan. Angay ha amon ito nga paghukom tungod han amon mga sala. 6Amon ka ginsupak, amon ka gintalikdan, ngan nabuhat namon an ngatanan nga mga sala. 7Waray namon pagbuhata an mga butang nga imo ginsugo ha amon. Kon ginsugot namon an imo mga balaod, mainuswagon unta kami, 8kundi yana angay ha amon an paghukom ngan kastigo nga imo gindara ha amon. 9Imo kami igintubyan ngadto hin matinalapason, madumot, ngan masupilon nga mga kaaway—ngadto hin labi kamahuka nga hadi ha kalibutan. 10Ngan yana naalohan kami ngatanan nga nagsisingba ha imo; makaarawod ha amon an pagbungat han amon mga baba.

11“Kundi tungod han kalugaringon mo nga dungog, ayaw gad pagbungkaga an imo ginsaaran ha amon ngan ayaw pagbayai kami ha kadayonan. 12Ayaw gad ighalot an imo pagkalooy ha amon. Tumana gad an imo mga saad kanda Abraham nga imo hinigugma, Isaac nga imo surugoon, ug Jacob nga amay han imo baraan nga mga tawo nga Israel. 13Imo iginsaad hin paghatag ha ira hin damo nga mga tulin sugad han kadamo han kabiton-an ha langit o han mga baras ha baybayon. 14Kundi yana, O Ginoo, gutiay na la kami kon itanding han iba nga mga nasod; bisan hain kami, makaarawod inin amon kamutangan tungod han amon mga sala. 15Ginbayaan kami nga waray hadi, waray mga manaragna o mga pangulo. Waray na kami usa nga Templo nga kakadtoan hin pagdara ngada ha imo hin mga halad nga tinubod, mga regalo, o insyenso, waray na dapit diin makakaghalad kami ha imo ngan malolooy ka ha amon. 16Kundi nadangop kami ha imo upod an mabinasolon ngan mapinaubsanon nga kasingkasing. Samtang nakikimalooy kami nga karawaton mo kami nga sugad hin kinmanhi kami dara in mga halad nga tinubod nga lalaki nga mga karnero ngan mga baka ngan yinukotyukot nga magtambok nga nati nga mga karnero. 17Karawata gad an amon pagbasol sugad nga amon halad nga tinubod yana nga adlaw, basi magsugot kami ha imo ha bug-os namon nga kasingkasing. Diri gud kaaalohan an bisan hin-o nga nasarig ha imo. 18-19Yana nagsasaad kami ha bug-os namon nga kasingkasing hin pagsugot ha imo, pagsingba ha imo, ngan pagdangop ha imo hin pag-ampo. Pagdumaraa kami nga maloloy-on ngan ayaw na kami ikadto hin kaarawdan. 20O Ginoo, talwasa kami pinaagi hin usa han imo mga milagro; pagpasidunggi an imo ngaran.

21“Dad-i hin kaarawdan ngan kaalo an ngatanan nga nagpakaraot ha amon. Kuhaa an ira kusog ug gahom ngan dugmoka an ira kabakod. 22Pahibaroa hira nga ikaw la an Ginoo ug Dyos nga naghahadi ka nga mahimayaon ha bug-os nga kalibutan.”

23Ginpalaga han mga surugoon han hadi nga naglabog han tulo nga kalalaken-an ngadto ha hudno an kalayo pinaagi hin pagsung-i hin lana, alkitran, uhot, ug kahoy. 24Naglarab an kalayo ngadto hin kahitaas nga 25 ka metros 25ngan naglarab pa ngani ha gawas ngan gin-ugtang an mga Babilonianhon nga nagkakatukdaw hirani han hudno. 26Kundi kinmunsad ngadto han kalayo in usa nga anghel han Ginoo, diin nakadto an tulo nga kalalaken-an. Iya iginpinid ha ligid an mga laga, 27sanglit inabat in matugnaw nga harupyoy nga nahuyop han kalayo ngan waray gud dapati hira han kalayo o makadaot ha ira ha bisan ano nga paagi.

Nagkanta an Tulo nga Kalalaken-an

28Didto ha sakob han hudno nagsarabat na liwat an tulo nga kalalaken-an hin pagkanta ha pagdayaw han Dyos:

29“Gindadayaw ka namon, O Ginoo

nga Dyos han amon kaapoy-apoyan.

30Pagpasidunggan ngan pagtahoron unta ha kadayonan

an imo harangdon ngan baraan nga ngaran.

31Pagkantahon unta in mga imno

ha paghimaya ha imo ha kadayonan

ngan pagdayawon unta ikaw nga baraan nga aadto hito nga Templo,

32diin nalingkod ka ha imo langitnon nga trono ha igbaw han mga kerubin

ngan natan-aw ka ngadto ha tuna han mga minatay.

Pagdayawon nga pagsidunggan ka unta ha kadayonan.

33Pagdayawon ka unta samtang nalingkod ka ha hadianon mo nga trono.

Pagkantahon unta in mga imno ha pagdayaw ha imo ha kadayonan.

34Pagdayawon ka unta didto ha kahitas-an.

Pagkantahon unta in mga imno ha pagdayaw ha imo ha kadayonan.

35“Pagdayawa an Ginoo, ngatanan nga binuhatan;