Забур 54
54
Дустунин маса гун
1Манидаррин чӀехидаз. Симер алай алатар патал. Давудан шиир.
2Аллагь! Ван хьухь зи дуьадин,
зи минетдикай чуьнуьх жемир,
3ван хьухь, жаваб це!
Фикирри атӀузва аман зи,
теспача хьанва зун
4душманрин ванцикай,
небгетри дарвиле туникай.
Абуру зал бедбахтвал гъана,
хъиле гьатна, душманвал ийизва захъ галаз.
5АтӀанва зи рикӀин аман;
Вегьенва зал ажалдин къургъари.
6КичӀевили, зурзуни зун дарвиле тунва,
къурхуди кьунва зун.
7За лагьана: «Сада заз лифрен лувар ганайтӀа!
Фидай зун лув гана, жагъидай динжвал;
8ингье яргъаз катдай зун,
кьурумда уьмуьр тухудай.
Макьамдин ара
9За тади къачудай жагъуриз са катдай чка
тӀурфандикай, чӀимелдикай яргъара».
10Ая абур теспача, я Агъа,
чара ая абурун чӀалар,
вучиз лагьайтӀа, заз аквазвайвал,
гьабурувай я шегьердавай зулуматни къалмакъал.
11Йифиз-юкъуз къекъвезва
абур вири патарихъай цлар тирвал шегьердин,
ам ацӀанва пис крарив, бедбахтвилив.
12Завал ава адан къене,
хиянатни зулумат куьчейрай
хъфизвач адан.
13ХкуьрнайтӀа душманди зи намусдик,
эхдай за.
Душманди зи вилик кьуру дамах авунайтӀа,
жедай завай далда кьаз.
14Амма ам вун я эхир,
заз барабарди,
зи дуст, зи кӀеви дуст.
15Вахъ галаз чна рикӀин суьгьбет авунай,
чӀехи кӀеретӀдихъ галаз
Аллагьдин КӀвализни фенай.
16Атурай ажал зи душманрин;
абур чан аламаз аватрай
агъа дуьньядиз –
чпин кӀвалера, рикӀера авай
писвилиз килигна.
17За лагьайтӀа, минетда Аллагьдиз;
Реббиди заз куьмекда.
18Няниз, экуьн береда ва нисиниз
за шикаят ийизва, гьарайзава,
Адаз зи ван къведа.
19Зун сагъ-саламат яз хуьда душманрикай,
гьикьван абур гзаф хьайитӀани.
20Даим яз ацукьнавай тахтуна
Аллагьдиз зи ван жеда,
абур Ада русвагьда,
куьз лагьайтӀа абуруз
дегиш жез кӀанзавач,
Аллагьдикай кичӀе туш.
Макьамдин ара
21Зи дустуни дустарал гъил хкажна,
ада чӀурна хьайи икьрар.
22Адан рахун чӀемедилай хъуьтуьл я,
амма рикӀе дяве ава,
адан гафар зейтундин чӀеминилай назик я,
амма абур къакъарай акъуднавай гапур я.
23Ихтибар ая жуван пар Реббидал,
мягькемарда Ада вун,
са чӀавузни тадач Ада
къуватдай физ гьахъ-михьидав.
24Вуна, Аллагь, вегьида абур
сурун фуруз;
ивикъичдизни тапархъандиз
чпиз ганвай йикъарин
са пай кьванни аквадач.
За, лагьайтӀа, Вак умуд кутазва.
Currently Selected:
Забур 54: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
