1-Каринфвийриз 3

Иман гвайбурун кӀватӀал пайи-паяр хьун

1Гьа икӀ, стхаяр-вахар, завай квев Аллагьдин Руьгь квай инсанрив хьиз рахаз жезвачир, амма квев зун цӀуру гунагькар тӀебиатдин гьукумдик квай инсанрив хьиз, Месигьдихъ иман авунин рекье бицӀекар яз амайбурув хьиз рахаз хьанай. 2Чирвал яз за квез кӀеви тӀуьн ваъ, нек ганай, вучиз лагьайтӀа квелай кӀеви тӀуьн кьабулиз алакьзавачир, квелай гилани а кар алакьзавач, 3гьикӀ лагьайтӀа, куьн виликдай хьиз гунагькар тӀебиатдин гьукумдик кума. Куь арада пехилвални гьуьжетар амай кьван гагьда куьн виликан инсанар яз амукьзавачни кьван? Ва куьне куьн и дуьньядин инсанри хьиз тухузвачни кьван? 4Сада: «Зун Павелан терефдар я» ва муькуьда: «Зун – АпӀаласан терефдар я» лугьузвайла, куьн амайбурулай квелди чара жезва кьван? 5АпӀалас вуж я кьван? Павелни вуж я кьван? Абур Аллагьдиз къуллугъзавайбур я, абурун куьмекдалди куьне Месигьдихъ иман авуна. Абурукай гьар сада чпиз Реббиди ая лагьай тайин кар ийиз хьана. 6За цана, АпӀаласа яд гана, амма чӀехи авурди Аллагь я. 7Гьавиляй я цазвайдини, я яд гузвайдини са затӀни туш, авайди анжах цайиди чӀехи ийизвай Аллагь я. 8Цазвайдани яд гузвайда ийизвайди са кар я, гьар сада вичин зегьметдин паюнай гьакъини къачуда. 9ГьикӀ лагьайтӀа, чун кьведни Аллагьдихъ галаз са кар ийизвайбур я, куьн чун паталди Аллагьдин ник я, Адан имарат я.

10Аллагьди заз ганвай берекатдив кьурвал, за, камал авай устӀарди хьиз, бине эцигна, са масада эцигунин кар давамарда. Гьар сад вичи гьикӀ эцигзаватӀа килиграй. 11Садавайни эцигнавай бинедилай гъейри маса бине эцигиз жедач, а бине Иса Месигь я. 12И бинедал инсандивай къизилдикай, гимишдикай, багьа къашарикай, кӀарасдикай, алафдикай ва я самарикай эцигиз жеда, 13ни гьикӀ эцигнатӀа малум жедай югъни алукьда. А юкъуз вири цӀалди синагъ ийида, гьар садан кӀвалахдин ери цӀу къалурда. 14Эцигнавай затӀ чукӀун тавуртӀа, эцигайдав вичин гьакъи агакьда; 15кайитӀа, адан гьакъи квахьда. Ам вич лагьайтӀа, цӀукай хилас хьайиди хьиз, хилас жеда.

16Куьн Аллагьдин кӀвал тирди ва квек Аллагьдин Руьгь квайди квез чизвачни кьван? 17Са ни ятӀани Аллагьдин кӀвал чукӀурайтӀа, ам вич Аллагьди чукӀурда, вучиз лагьайтӀа Аллагьдин кӀвал пак я, Адан кӀвал лагьайтӀа, ам куьн я.

18Куьне куьн алцурармир, квекай са ни ятӀани вичихъ и дуьньядин фагьумрай камал ава лагьана фикирзаватӀа, ам рикӀивайни камал авайди хьун патал «ахмакь» хьун лазим я. 19ГьикӀ лагьайтӀа, и дуьньядин камал Аллагьдин вилерай ахмакьвал я. ИкӀ кхьенва: «Ада камал авайбур абурун чпин амалдарвиливди кьазва»#Аюб 5:13., 20ва мад: «Камал авайдан фикирар анжах челек-фелек тир чӀал Реббидиз чизва»#Забур 93:11.. 21Гьавиляй инсанралди дамахармир. Вири куьбур я: 22кӀандатӀа Павел ва я АпӀалас ва я Кифа ва я и дуьнья, уьмуьр ва я ажал ва я алай вахт ва я къвезмай вахт хьурай – вири куьбур я, 23куьн лагьайтӀа, Месигьдинбур я, Месигьни – Аллагьдинди.

Currently Selected:

1-Каринфвийриз 3: ЛезПК

Highlight

Copy