1-Каринфвийриз 2

Павел Каринфдиз идалай виликни атун

1Стхаяр-вахар, зун куь патав атана Аллагьдин сирдикай лагьай чӀавуз, зи гафар я иервилелди, я са кьетӀен камалдалди тафават авайбур тушир. 2Куь арада аваз, за Иса Месигьдилай, Вични хашуниз янавайдалай, гъейри, мад са затӀни чир тахьун кьетӀна. 3Зун куь патав зайиф яз, гьуьрметдивди ва рикӀик зурзун кваз атанай. 4-5Куь иманди инсандин камалдал ваъ, Аллагьдин къуватдал бине кьун патал, зи хабарни зи вяз инсандин камалдалди алакьардай гафарикай ваъ, Руьгьдин къуват аквадайвал субут авуникай ибарат я.

Аллагьдин камалдикай

6Чна камалдикай руьгьдин рекьяй чранвайбурун арада хабар гузва, амма им и дуьньядин ва чеб фад-геж са затӀни туширвилиз элкъведай и дуьньядин гьукумдаррин камал туш. 7Ваъ, икьван чӀавалди далдадик кумаз хьайи, амма дуьнья халкь тахьанмаз, лап сифтедилай чи баркалла патал тайинарнавай Аллагьдин камалдикай рахазва чун. 8И дуьньяда гьукум гъиле авайбур а камалдин гъавурда акьунач, масакӀа тиртӀа абуру баркалладин Ребби хашуниз ядачир. 9Амма кхьенва:

«Аллагьди Вич кӀандайбуруз вуч гьазурнаватӀа

вилиз акунач,

япуз ван хьанач,

я рикӀелни атанач» # Яшай 64:4. .

10И кар Аллагьди Руьгьдин куьмекдалди чаз ачухарна, вучиз лагьайтӀа Руьгьди вири затӀар тупӀалай ийизва, Ада гьакӀни Аллагьдин деринарни чирзава. 11Инсандин къеневайди, адак вичик квай руьгьдилай гъейри, мад низ чизва? Гьа саягъда Аллагьдин къеневайдини, Аллагьдин Руьгьдилай гъейри, садазни чизвач.

12Чаз гьатайди и дуьньядин руьгь ваъ, чаз Аллагьди багъишнавай кьван виридан гъавурда чун акьун паталди ганвай, Аллагьдилай атанвай Руьгь я. 13Идакай чна инсандиз хас камалдин гафаралди ваъ, Руьгьди чаз чирнавай гафаралди лугьузва. Чна руьгьани гьакъикъатар чаз Руьгьди чирзавай гафаралди ачухарзава. 14Руьгь авачир инсанди Аллагьдин Руьгьдилай къвезвайди кьабулзавач. Ада им ахмакьвал яз гьисабзава ва адавай гъавурда акьаз жезвач, вучиз лагьайтӀа идакай анжах Руьгьдалди веревирд ийиз жеда. 15Руьгь авай инсандивай виридакай веревирд ийиз жеда, адакай вичикай са касдивайни веревирд ийиз жедач, 16вучиз лагьайтӀа кхьенва:

«Нивай жеда Аллагьдиз тарсар гуз?

Вуж агакьда Аллагьдин акьулдив?» # Яшай 40:13.

Чаз лагьайтӀа, Месигьдин акьул ава.

Currently Selected:

1-Каринфвийриз 2: ЛезПК

Highlight

Copy