MGA SALMO 5
5
Pangamuyo nga Apinan
Sa pangolong manuglanton: sa mga lantoy. Salmo ni David.
1Lingga, O Ginoo, ang akon mga polong;
talupangda ang akon pagpamalandong.
2Pamatii ang tingug sang akon pagtuaw,
Hari ko, kag Dios ko,
kay sa imo nagapangamuyo ako.
3O Ginoo, sa kaagahon magapamati ka sang akon tingug;
sa kaagahon paagisuron ko ang akon pangamuyo sa imo, kag magabantay.
4Kay ikaw indi Dios nga may kahamuut sa pagkamalaut;
ang malaut dili magpuyo upud sa imo.
5Ang bugalon dili magtindug sa imo itololok;
ginadumtan mo ang tanan nga nagahimo sang kalautan.
6Laglagon mo ang tanan nga nagapamolong sing kabutigan;
ang Ginoo nagakangil-ad sang tawo nga makidugoon kag malimbongon.
7Apang ako sa kabugana sang imo malig-on nga paghigugma
magasulud ako sa imo balay,
magasimba ako nayon sa imo balaan nga templo
sa kahadluk sa imo.
8Tuytuyi ako, O Ginoo, sa imo pagkamatarung
bangud sang akon mga kaaway;
tadlonga ang imo dalanon sa akon atubangan.
9Kay wala sing katutum sa ila baba;
ang ila kasudlan malaut gid,
ang ila totonlan bukas nga lulubngan,
sa ila dila nagaologolog sila.#Roma 3:13.
10Tagudilii sila, O Dios;
papukana sila bangud sa ila kaugalingon nga mga laygay;
sobola sila sa kadamuon sang ila mga paglapas,
kay nagsumpung sila sa imo.
11Apang magkasadya ang tanan nga nagadangup sa imo,
magsinggit sila gihapon sa kalipay;
bangud nga nagaapin ka sa ila,
sila man nga nagahigugma sang imo ngalan magmalipayon sa imo.
12Kay ikaw magapakamaayo sang matarung;
O Ginoo, likupan mo sia sing kaayohan subong nga may taming.
Currently Selected:
MGA SALMO 5: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
