MGA SALMO 2
2
Ang Paghari sang Ginhaplas sang Ginoo
1Ngaa bala ang mga pungsud nagasingkal,
kag ang mga katawohan nagahimbon sing butang nga wala sing pulus?
2Ang mga hari sang duta nagapahamtang sang ila kaugalingon,
kag ang mga manuggahum nagahilisapul sing tingub,
batok sa Ginoo kag sa iya hinaplas,#Binu. 4:25-26. nga nagasiling,
3“Bugrason ta ang ila mga gapus,
kag ipilak gikan sa aton ang ila mga pisi.”
4Ang nagalingkod sa kalangitan magakadlaw;
ang Ginoo magauligyat sa ila.
5Niyan magapamolong sia sa ila sa iya kasingkal,
kag gamohon sila sa iya tama nga kaakig, nga nagasiling,
6“Napahamtang ko ang akon hari
sa ibabaw sang akon balaan nga bukid nga Sion.”
7Magasugid ako sang mando:
ang Ginoo nagsiling sa akon, “Ikaw akon anak,
sini nga adlaw nangin-amay mo ako.#Binu. 13:33; Heb. 1:5; 5:5.
8Pangayoa sa akon, kag ihatag ko sa imo ang mga pungsud nga panublion nimo,
kag ang kaukbungan sang duta nga imo kaugalingon.
9Boongon mo sila sa bilogon nga salsalon,#Bug. 2:26-27; 12:5; 19:15.
ipus-ang mo sila kaangay sang suludlan sang maninihon.”
10Busa karon magpakaalam, O kamo nga mga hari;
magpatudlo, kamo nga mga hukom sang duta.
11Alagda nga may kahadluk ang Ginoo,
kag magkalipay nga may pagkurug.
12Haluki ang anak nga lalaki, basi nga maakig sia, kag mawala kamo sa dalanon;
kag ang iya kasingkal magadabdab sing madali.
Bulahan ang tanan nga nagadangup sa iya.
Currently Selected:
MGA SALMO 2: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
