NUMEROS 14
14
Ang Katawohan Nagaribuk batok sa Ginoo
1Niyan ang bug-os nga katilingban nagbayaw sang ila tingug; kag ang katawohan naghibi sadtong gab-i. 2Kag nagkumud batok kay Moises kag kay Aaron ang tanan nga katawohan sang Israel; nagsiling sa ila ang bug-os nga katilingban, “Kabay kuntani nga nagkalamatay kami sa duta sang Egipto! Ukon nagkalamatay kami kuntani sa sining kamingawan! 3Ngaa bala nga dinala kami sang Ginoo sa sining duta, sa pagpukan sa amon paagi sa espada? Ang amon nga asawa kag ang amon mga magamay manginbilihagon; indi bala labi pa kaayo sa amon nga magbalik sa Egipto?”
4Kag nagsilingay sila, “Maghimo kita sing pangolo, kag magbalik kita sa Egipto.” 5Niyan si Moises kag si Aaron naghapa sa atubangan sang bug-os nga pagtilipon sang katilingban sang katawohan sang Israel. 6Kag si Josue nga anak ni Nun kag si Caleb nga anak ni Jefone, nga upud sang mga naglampitaw sang duta, nagkusnit sang ila mga panapton, 7kag nagpamolong sila sa bug-os nga katilingban sang katawohan sang Israel, “Ang duta, nga amon ginlatas sa paglampitaw sa iya, tama gid kaayo nga duta. 8Kon ang Ginoo nahamuut sa aton, pasudlon niya kita sa sining duta kag ihatag ini sa aton, duta nga nagailig sing gatas kag dugus. 9Lamang, dili kamo magribok sa Ginoo;#Heb. 3:16. kag dili kamo magkahadluk sa katawohan sang duta, kay kalan-on sila nga sa aton; ang ila panagang ginkuha gikan sa ila, kag ang Ginoo upud sa aton; dili kamo magkahadluk sa ila.” 10Apang ang bug-os nga katilingban buut magbato sa ila.
Niyan ang himaya sang Ginoo nagpahayag sa layanglayang nga tiliponan sa tanan nga katawohan sang Israel. 11Kag ang Ginoo nagsiling kay Moises, “Tubtub pa bala san-o magatamay sa akon ini nga katawohan? Kag tubtub pa bala san-o nga indi sila magtoo sa akon, walay sapayan sang tanan nga tanda nga nahimo ko sa tunga nila? 12Laglagon ko sila sang kamatay kag indi ko sila pagpapanublion, kag himoon ko ikaw nga pungsud nga labi pa ka daku kag labi ka gamhanan sa ila.”
13Apang si Moises nagsiling sa Ginoo, “Niyan mabatian ini sang mga Egiptohanon, kay ginpataklad mo ini nga katawohan sa imo gahum gikan sa tunga nila, 14kag isugid nila ini sa mga pumuluyo sini nga duta. Nakabati sila nga ikaw, O Ginoo, yara sa tunga sini nga katawohan; kay ikaw, O Ginoo, makita sa nawung kag nawung, kag ang imo panganud nagadolog sa ibabaw nila, kag ikaw nagauna sa ila, sa haligi nga panganud sa adlaw kag sa haligi nga kalayo sa gab-i. 15Karon kon patyon mo ini nga katawohan subong sa isa ka tawo, niyan ang mga pungsud nga nakabati sang imo kabantugan magapamolong, 16‘Bangud nga ang Ginoo indi makasarang sa pagpasulud sini nga katawohan sa duta nga iya ginsumpa sa ila, busa ginpatay niya sila sa kamingawan.’ 17Kag karon, ginaampo ko sa imo, padakua ang gahum sang Ginoo sono sa ginpamolong mo, nga nagasiling, 18‘Ang Ginoo makuli sa pagpangakig, kag bungana sa malig-on nga paghigugma, nga nagapatawad sang kalautan kag paglalis, apang indi nga mas-a magpasaylo sang malalison, nga nagapaduaw sang kalautan sang mga ginikanan sa mga anak, tubtub sa ikatlo kag sa ikap-at nga kaliwatan.’#Ex. 20:5-6; 34:6-7; Deut. 5:9-10; 7:9-10. 19Ginaampo ko sa imo, patawara ang kalautan sini nga katawohan sono sa pagkadaku sang imo malig-on nga paghigugma, kag sono sa pagpatawad mo sini nga katawohan, kutub sa Egipto bisan tubtub karon.”#Ex. 32:11-14.
Ang Silot sang Dios sa Israel
(Deut. 1:34-46)
20Niyan ang Ginoo nagsiling, “Napatawad ko, sono sa imo polong; 21apang sa pagkamatuud gid, sa nagakabuhi ako, kag subong nga ang himaya sang Ginoo magatugub sang bug-os nga duta, 22bangud nga tanan yadtong tawo nga nakakita sang akon himaya kag sang akon mga tanda nga ginhimo ko sa Egipto kag sa kamingawan, apang nagsulay sa akon sini nga makapulo kag wala magpamati sa akon tingug, 23sa pagkamatuud indi sila makakita sang duta nga ginsumpa ko sa ila mga ginikanan; kag wala sing bisan sin-o sa ila nga nagtamay sa akon nga makakita sini.#Heb. 3:18. 24Kondi ang akon alagad nga si Caleb, bangud nga may tuhay nga espiritu sa iya kag nagsonod sing bug-os sa akon, sia pasudlon ko sa duta nga iya ginkadtoan, kag ang iya mga kaliwatan magatag-iya sini.#Jos. 14:9-12. 25Karon, ang mga Amaleknon kag ang mga Canaanhon nagapuyo sa nalupyakan, buwas balik kamo kag magtaliwan kamo pa kamingawan sa dalanon pa Dagat nga Mapula.”
26Kag ang Ginoo nagpamolong kay Moises kag kay Aaron, 27“Tubtub pa bala san-o magaantus ako sini nga katilingban nga malaut nga nagakumud batok sa akon? Nabatian ko ang mga pagkumud sang katawohan sang Israel, nga ila ginakumud batok sa akon. 28Isiling sa ila, ‘Sa nagakabuhi ako,’ nagasiling ang Ginoo, ‘subong sang napamolong ninyo sa akon mga idulungug’ amo ang himoon ko sa inyo: 29ang inyo mga bangkay magakapukan sa sini nga kamingawan;#Heb. 3:17. kag ang tanan nga naisipan sa inyo, sono sa bug-os ninyo nga kadamuon, kutub sa duha ka pulo ka tuig kag pa ibabaw, nga nagkumud batok sa akon, 30indi kamo makasulud sa duta nga nahanungud sa iya nagsumpa ako nga akon kamo papuy-on sa iya, luwas si Caleb nga anak ni Jefone kag si Josue nga anak ni Nun. 31Apang ang inyo mga magamay, nga ginsiling ninyo nga manginbilihagon, sila pasudlon ko, kag magakilala sila sang duta nga inyo ginsikway. 32Apang nahanungud sa inyo, ang inyo mga bangkay magakapukan sa sini nga kamingawan. 33Kag ang inyo mga anak magamanugpahalab sa kamingawan sing kap-atan ka tuig,#Binu. 7:36. kag magaantus sang inyo mga pagkamakihilawason, tubtub nga mapapas ang inyo mga bangkay sa kamingawan. 34Sono sa kadamuon sang mga adlaw sang paglampitaw ninyo sang duta, bisan kap-atan ka adlaw, sa tagsa ka adlaw isa ka tuig, magaantus kamo sang inyo mga kalautan, bisan kap-atan ka tuig, kag makilala ninyo ang akon pagbiya.’ 35Ako, ang Ginoo, nagpamolong; sa pagkamatuud ini himoon ko sa bug-os sini nga katilingban nga malaut nga naghimbon sing tingub batok sa akon: sa sini nga kamingawan mapapas sila, kag didto magakalapatay sila.”
36Kag ang mga lalaki nga ginpadala ni Moises sa paglampitaw sang duta, nga nagbalik kag nagpakumud sang bug-os nga katilingban batok sa iya tungud sa pagdala sing malaut nga sugid batok sa duta, 37yadto gid nga mga lalaki nga nagdala sing malaut nga sugid nahanungud sa duta, nagkalapatay sa kalalat-an sa atubangan sang Ginoo. 38Apang si Josue nga anak ni Nun kag si Caleb nga anak ni Jefone nabilin nga buhi, sadto nga mga lalaki nga nagkadto sa paglampitaw sang duta.
39Kag si Moises nagsugid sini nga mga polong sa tanan nga katawohan sang Israel, kag ang katawohan naglalaw sing tama. 40Kag nagbangon sila sing aga pa, kag nagtukad sa putokputokan sang bukid, nga nagasiling, “Yari karon, yari kami diri, kag magataklad sa duug nga ginsaad sang Ginoo; kay nakasala kami.” 41Apang si Moises nagsiling, “Ngaa bala karon ginalalis ninyo ang sogo sang Ginoo, sa ginatan-aw nga ini indi mag-uswag? 42Dili kamo magtaklad kay ang Ginoo wala sa tunga ninyo, agud nga indi kamo malaglag sa atubangan sang inyo mga kaaway. 43Kay didto ang mga Amaleknon kag ang mga Canaanhon yara sa atubangan ninyo, kag magakapukan kamo sa espada; bangud nga nagtalikod kamo gikan sa pagsonod sa Ginoo, busa ang Ginoo indi mag-upud sa inyo.” 44Apang nagpangahas sila sa pagtukad sa putokputokan sang bukid, wala sing sapayan nga ang kaban sang katipan sang Ginoo, kag si Moises, wala maggowa gikan sa dologan. 45Niyan nagdulhog ang mga Amaleknon kag ang mga Canaanhon nga nagpuyo sa sadto nga bukid, kag ginlaglag sila kag ginlagas, tubtub sa Horma.
Currently Selected:
NUMEROS 14: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
