NUMEROS 12
12
Si Miriam kag si Aaron Nagahambal batok kay Moises
1Si Miriam kag si Aaron nagpamolong batok kay Moises bangud sang babaying Cushanon nga iya ginpangasawa, kay nakapangasawa sia sing babaying Cushanon; 2kag sila nagsiling, “Kay Moises lamang bala nagpamolong ang Ginoo sa pagkamatuud? Wala bala sia magpamolong sa aton man?” Kag nabatian ini sang Ginoo. 3Karon ang lalaki nga si Moises tama gid kamapainubuson, labi pa sa tanan nga tawo nga yara sa kadaygan sang duta. 4Kag sa gilayon nagsiling ang Ginoo kay Moises kag kay Aaron kag kay Miriam, “Gowa, kamo nga tatlo, pakadto sa layanglayang nga tiliponan.” Kag naggowa sila nga tatlo. 5Kag ang Ginoo nagpanaug sa haligi nga panganud, kag nagtindug sa ganhaan sang layanglayang, kag nagtawag kay Aaron kag kay Miriam; kag naggowa sila nga duha. 6Kag sia nagsiling, “Pamatii ang akon mga polong: Kon may manalagna sa tunga ninyo, ako nga Ginoo nagapakilala sa iya sa palanana-won, nagapakighambal ako sa iya sa damgo. 7Indi subong sini ang akon alagad nga si Moises; matutum sia sa bug-os kong balay.#Heb. 3:2. 8Sa baba kag baba nagapakighambal ako sa iya, sing maathag gid, kag indi sa mga paktakon; kag nakita niya ang dagway sang Ginoo. Niyan ngaa bala wala kamo mahadluk sa paghambal batok sa akon alagad nga si Moises?”
9Kag ang kaakig sang Ginoo nagdabdab batok sa ila, kag nagtaliwan sia; 10kag sang naghalin ang panganud gikan sa ibabaw sang layanglayang, yari karon, si Miriam nag-aroon, subong kaputi sang nieve. Kag si Aaron nagtolok kay Miriam, kag yari karon, nag-aroon sia. 11Kag si Aaron nagsiling kay Moises, “O, ginoo ko, dili kami pagpasangti sing sala bangud nga nakahimo kami sing binuang kag nakasala kami. 12Dili igtugut nga sia manginsubong sang isa nga patay, nga naupud na ang katunga sang iya unud sang paggowa niya sa tiyan sang iya iloy.” 13Kag si Moises nagtuaw sa Ginoo, “Ginapakilooy ko sa imo, O Dios, ayoha sia.” 14Apang ang Ginoo nagsiling kay Moises, “Kon ang iya amay nagdupla lamang sa iya nawung, indi sia bala mahuya sing pito ka adlaw? Ipabukot sia sa gowa sang dologan#Num. 5:2-3. sing pito ka adlaw, kag sa tapus sina dalhon sia liwat sa sulud.” 15Gani si Miriam ginbukot sa gowa sang dologan sing pito ka adlaw; kag ang katawohan wala maglakat tubtub nga nadala si Miriam sa sulud. 16Sa tapus sina naglakat ang katawohan gikan sa Hazerot, kag nagpahamtang sing dologan sa kamingawan sang Paran.
Currently Selected:
NUMEROS 12: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
