JOB 42
42
Ang Pagtu-ad ni Job kag ang Pagbaton sa Iya
1Niyan si Job nagsabat sa Ginoo:
2“Nakahibalo ako nga mahimo mo ang tanan nga butang,
kag wala sang imo katuyoan nga mapunggan.
3‘Sin-o bala ini nga wala sing ihibalo nga nagalikum sing laygay?’#Job 38:2.
Busa namitlang ko ang wala ko mahangpi,
mga butang nga tama ka makatilingala sa akon, nga wala ko mahibaloi.
4‘Pamatii, kag magapamolong ako;
magapamangkot ako sa imo, kag pahayagan mo ako.’#Job 38:3.
5Nakabati ako nahanungud sa imo paagi sa palamatin-an sang idulungug,
apang karon ang akon mata nagatan-aw sa imo;
6busa nagakangil-ad ako sa akon kaugalingon, kag nagahinulsul sa yab-ok kag abo.”
7Sa tapus nga nakapamolong ang Ginoo sini nga mga polong kay Job, ang Ginoo nagsiling kay Elifaz nga Temanhon: “Ang akon kasingkal nagadabdab batok sa imo kag batok sa imo duha ka abyan; kay wala kamo makapamolong nahanungud sa akon sang butang nga matarung, subong sa akon alagad nga si Job. 8Busa karon kuha kamo nga sa inyo sing pito ka tinday nga baka nga lalaki kag pito ka carnero nga lalaki, kag kadto sa akon alagad nga si Job, kag magdolot nga sa inyo sing halad-nga sinonog; kag ang akon alagad nga si Job magapangamuyo tungud sa inyo, kay tungud sa iya batonon ko nga indi ako maghisayo sa inyo sono sa inyo kabuangon; kay wala kamo makapamolong nahanungud sa akon sang butang nga matarung, subong sang akon alagad nga si Job.” 9Gani si Elifaz nga Temanhon kag si Bildad nga Suhanon kag si Zofar nga Naamanhon naglakat kag naghimo sono sa ginsogo sang Ginoo sa ila; kag ang Ginoo nagbaton kay Job.
Ang Pagpahauli sang Kabuganaan ni Job
10Kag ginbaylohan sang Ginoo ang kabihagan ni Job,#Job 1:1-3. sang nagpangamuyo sia tungud sa iya mga abyan; kag ang Ginoo naghatag sing pilo sang kadamuon sang iya sang una. 11Niyan nagkadto didto sa iya ang tanan niya nga utud nga lalaki kag mga utud nga babayi kag tanan sila nga kilala niya sang una, kag nagkaon upud sa iya sa balay niya; kag nagkalisud sila sa iya kag naglipay sa iya nahanungud sang tanan nga malaut nga gindala sang Ginoo sa iya; kag ang tagsa ka tawo man naghatag sa iya sing isa ka bilog nga cuarta kag ang tagsatagsa sing isa ka singsing nga bulawan. 12Gani ginpakamaayo sang Ginoo ang kaolihi-an ni Job labi pa sang iya pamuno; kag sia may napulo kag apat ka libo ka carnero, anum ka libo ka camelyo, isa ka libo ka pares nga baka, kag isa ka libo ka asno nga babayi. 13Sia man may pito ka anak nga lalaki kag tatlo ka anak nga babayi. 14Kag ginhingalanan niya ang nahauna si Jemima; kag ang ikaduha si Kesia; kag ang ikatlo si Keren-hapuc. 15Kag sa bug-os nga duta wala sing nakita nga mga babayi nga subong kaayoayo sang babayi nga mga anak ni Job; kag ginhatagan sila sang ila amay sing panublion sa tunga sang ila mga utud nga lalaki. 16Kag sa tapus sini nagkabuhi si Job sing isa ka gatus kag kap-atan ka tuig, kag nakakita sang iya mga lalaking anak, kag sang iya mga lalaking apo, apat ka kaliwatan. 17Gani si Job napatay, nga tigulang kag puno sing mga adlaw.
Currently Selected:
JOB 42: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
