JOB 41
41
1“Makuha mo bala ang Leviatan#41:1 Ukon ang buaya.#Sal. 74:14; 104:26; Isa. 27:1. sa taga,
ukon mapasalup mo bala ang iya dila sa pisi?
2Makatuhog ka bala sang iya ilong sing pisi,
makapalapus ka bala sing taga sa iya sulang?
3Magapakilooy bala sia sing madamu sa imo?
Magapamolong bala sia sa imo sing mga polong nga mahomok?
4Magapakigkatipan bala sia sa imo
agud nga kuhaon mo sia nga alagad sa gihapon?
5Magahampang ka bala sa iya subong sang pispis,
ukon higtan mo bala sia nga sa imo kadalagahan?
6Magabaligya bala sa iya ang mga kabon sang mga mangingisda?
Pahatpahaton bala nila sia sa mga manugbaligya?
7Makapadulut ka bala sa iya panit sing mga salsalon nga may salait,
ukon sa iya olo sing mga sibat sa isda?
8Dakpa sia;
dumduma ang inaway; dili ka na maghimo sang amo!
9Yari karon, ang paglaum sa iya walay pulus;
mapukan ang isa sa pagkakita lamang sa iya.
10Wala sing tama kabangis nga mangahas sia sa pagtublag sa iya.
Sin-o bala niyan ang makatindug sa atubangan nakon?
11Sin-o bala ang nakahatag sing una sa akon, agud nga bayaran ko sia?#Roma 11:35.
Ang bisan ano nga yara sa idalum sang bug-os nga langit akon.
12“Ako indi maghipus nahanungud sang iya mga tiil,
ukon sang iya gamhanan nga kusug, ukon sang iya matahum nga lawas.
13Sin-o bala ang makauba sang iya nagowa nga panapton?
Sin-o bala ang magasulud sa iya mga sulang?
14Sin-o bala ang makabukas sang mga gawang sang iya nawung?
Sa palibut sang iya mga ngipon yara ang kakugmat.
15Ang iya mabakud nga mga himbis amo ang iya bugal,
nga nagaduutay subong nga napat-inan sing hugut.
16Ang isa malapit gid sa isa
nga ang hangin indi makaagi sa tunga nila.
17Nagatambihay sila;
nagatapikay sila sa bagay nga indi sila mapabulag.
18Ang iya mga pagpusnga nagapagowa sing kapawa,
kag ang iya mga mata kaangay sang mga ilalakub sang kaagahon.
19Gikan sa iya baba nagagowa ang nagadabdab nga mga sulo;
ang mga igpat sang kalayo nagakirab.
20Gikan sa boho sang iya mga ilong nagagowa ang aso,
subong sang nagaindakal nga kolon kag nagakasonog nga mga bagaas.
21Ang iya ginhawa nagapakalayo sang mga uling,
kag gikan sa iya baba nagagowa ang dabdab.
22Sa iya liog nagapuyo ang kusug,
kag nagasaut sa atubangan niya ang kakugmat.
23Ang mga labit sang iya unud nagatalapik,
malig-on sila sa iya kag indi mationg.
24Ang iya tagiposoon malig-on subong sang bato,
malig-on subong sang naidalum nga bato sang galingan.
25Kon magtukhayaw sia ang mga gamhanan nahadluk;
bangud sa kakugmat nagasalimoang sila.
26Kon lab-on sia sang isa sing espada, indi ini makadulut;
bisan ang bangkaw, ang sumbiling, ukon ang tagad.
27Ginakabig niya ang salsalon subong sang dagami,
kag ang saway subong sang gabok nga kahoy.
28Ang mga baslay indi makapapalagyo sa iya;
ang mga bato sa labyog nagakahimo nga mga ginalaban sa iya.
29Ang mga bakulo ginakabig niya nga daw ginalaban;
nagakadlaw sia sa hagunus sang sumbiling.
30Ang naidalum niya nga mga bahin kaangay sa matalum nga mga bika;
ang agi niya daw iya sang ligis sang linas sa lunang.
31Ginapabukal niya ang kadadalman kaangay sang kolon;
ginahimo niya ang dagat kaangay sang kolon sang ihalaplas.
32Ginapahining niya ang banas sa olihi niya;
ang isa magahunahuna nga ang kadadalman ubanon.
33Wala sing kaangay sa iya sa duta,
nga ginhimo nga wala sing kahadluk.
34Ginatolok niya ang tagsa ka butang nga mataas;
hari sia sa tanan nga anak sang bugal.”
Currently Selected:
JOB 41: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
