DEUTERONOMIO 10
10
Ang Ikaduhang mga Tapitapi nga Bato
(Ex. 34:1-10)
1“Sa sadtong tion nagsiling sa akon ang Ginoo, ‘Basbas ka sing duha ka tapitapi nga bato kaangay sang sa nahauna, kag tukad ka sa akon sa bukid, kag himo ka sing kaban nga kahoy. 2Kag isulat ko sa mga tapitapi ang mga polong nga didto anay sa nahaunang mga tapitapi nga imo ginboong, kag isulud mo sila sa kaban.’ 3Gani naghimo ako sing kaban nga kahoy nga acasia, kag nagbasbas sing duha ka tapitapi nga bato kaangay sang sa nahauna, kag nagtukad sa bukid nga may duha ka tapitapi sa akon kamut. 4Kag nagsulat sia sa mga tapitapi, sono sa nahaunang sinulat, sang napulo ka sogo nga ginpamolong sang Ginoo sa bukid gikan sa tunga sang kalayo sa adlaw sang pagtilipon; kag ginhatag sila sang Ginoo sa akon. 5Niyan nagbalik ako kag nagdulhog sa bukid, kag ginsulud ang mga tapitapi sa kaban nga akon nahimo; kag didto sila sono sa ginsogo sa akon sang Ginoo.” 6(Ang katawohan sang Israel nagpanlakatan kutub sa Beerot Bene-jaacan#10:6 Ukon ang mga bubon sang Bene-jaacan. tubtub sa Mosera. Didto napatay si Aaron,#Num. 20:28; 33:38. kag didto ginlubung sia; kag sa tal-us niya si Eleazar nga anak niya nagpanghikot sa pagkasacerdote. 7Kutub didto nagpanlakatan sila tubtub sa Gudgoda, kag gikan sa Gudgoda tubtub sa Jotbata, duta sang mga sapa sang tubig. 8Sa sadtong tion ginpain sang Ginoo ang kabikahan ni Levi#Num. 3:5-8. sa pagdala sang kaban sang katipan sang Ginoo, sa pagtindug sa atubangan sang Ginoo sa pag-alagad sa iya kag sa pagpakamaayo sa iya ngalan, tubtub sining adlaw. 9Busa si Levi walay bahin ukon panublion upud sa iya mga utud; ang Ginoo amo ang iya panublion, sono sa ginpamolong sa iya sang Ginoo nga imo Dios.)
10“Nagpabilin ako sa bukid, subong sang sa nahaunang tion, sing kap-atan ka adlaw kag kap-atan ka gab-i,#Ex. 34:28. kag ang Ginoo nagpamati sa akon sadtong tion man; ang Ginoo indi buut maglaglag sa imo. 11Kag ang Ginoo nagsiling sa akon, ‘Tindug ka, panlakatan ka una sa katawohan, agud magasulud sila kag magtag-iya sang duta, nga ginsumpa ko sa ila mga ginikanan nga ihatag sa ila.’
Ang Ginakinahanglan sang Dios
12“Kag karon, Israel, ano bala ang ginakinahanglan sa imo sang Ginoo nga imo Dios, kondi ang pagkahadluk sa Ginoo nga imo Dios, ang paglakat sa tanan niyang dalanon, ang paghigugma sa iya, kag ang pag-alagad sa Ginoo nga imo Dios sa bug-os mong tagiposoon kag sa bug-os mong kalag, 13ang pagbantay sang mga sogo sang Ginoo, kag sang iya mga palatukuran, nga ginsogo ko sining adlaw sa imo tungud sa imo kaayohan? 14Yari karon, iya sang Ginoo nga imo Dios ang langit kag ang langit sang mga langit, ang duta pati ang tanan nga yara sa iya; 15apang ang Ginoo nahamuut sa imo mga ginikanan sa paghigugma sa ila kag ginpili niya ang ila mga kaliwatan sa olihi nila, kamo labaw sa tanan nga katawohan, subong sang sa sining adlaw. 16Busa circuncidaha ang inyo mga tagiposoon, kag dili na kamo magtingkoyan. 17Kay ang Ginoo nga inyo Dios, amo ang Dios sang mga dios kag Ginoo sang mga ginoo, ang Dios nga daku, ang gamhanan, kag ang makakulugmat, nga walay pinilian#Binu. 10:34; Roma 2:11; Gal. 2:6; Efe. 6:9. sang mga tawo ukon nagabaton sing hamham. 18Nagahimo sia sing katarungan sa ilo kag balo nga babayi, kag nagahigugma sa manlulugayaw, sa paghatag sa iya sing kalan-on kag panapton. 19Busa higugmaa ninyo ang manlulugayaw; kay nanginmanlulugayaw kamo sa duta sang Egipto. 20Magkahadluk ka sa Ginoo nga imo Dios; mag-alagad ka sa iya kag magtapik ka sa iya, kag paagi sa iya ngalan magsumpa ka. 21Sia imo pagdayaw; sia imo Dios, nga naghimo tungud sa imo sining dalagku kag makakulugmat nga mga butang nga nakita sang imo mga mata. 22Ang imo mga ginikanan nagdulhog pa Egipto nga kapitoan ka tawo;#Gen. 46:27. kag karon ang Ginoo nga imo Dios naghimo sa imo subong sang mga bitoon sang langit sa kadamuon.#Gen. 15:5; 22:17.
Currently Selected:
DEUTERONOMIO 10: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
