COLOSAS 2

Mga Bahandi sang Kaalam kag Ihibalo

1Kay buut ko nga inyo mahibaloan kon daw ano kadaku ang akon pagpanikasug tungud sa inyo, kag tungud sa ila sa Laodicea, kag tungud sa tanan nga wala makakita sang akon nawung, 2agud nga ang ila mga tagiposoon mapabakud sa ginahiusa sila sa gugma, sa pag-agum sang tanan nga kamanggaran sang malig-on nga paghangup kag pagkilala sang tinago sang Dios, nga amo si Cristo, 3nga sa iya natago ang tanan nga bahandi sang kaalam kag ihibalo. 4Ini ginasiling ko agud nga walay bisan sin-o nga magpatalang sa inyo sa polong nga makabuluyok. 5Kay bisan wala ako nagaupud sa inyo sa lawas, apang sa espiritu yara ako sa inyo, nga nagakalipay sa pagtan-aw sang inyo kahusay kag kalig-on sang inyo pagtoo kay Cristo.

6Busa sa bagay nga ginbaton ninyo si Cristo Jesus nga Ginoo, maggawi kamo sa iya, 7nga nakapanggamut kag natukud sa iya kag napalig-on sa pagtoo, subong sang gintudlo sa inyo, nga nagabugana sa pagpasalamat.

Kabug-osan sang Kabuhi kay Cristo

8Andam kamo nga walay maglimbong sa inyo paagi sa filosofia kag daya nga walay pulus, sono sa tawohanon nga pinalatonlaton nga sugid, sono sa nahauna gid nga pagtolon-an sang kalibutan, kag indi sono kay Cristo. 9Kay sa iya nagapuyo sing lawasnon ang bilog nga kabug-osan sang pagka-Dios, 10kag napun-an kamo sing kabuhi sa iya, nga amo ang olo sang bug-os nga pagdumala kag pagbulut-an. 11Sa iya man gincircuncidar kamo sang circuncision nga wala paghimoa sang mga kamut, sa pag-uba sang lawas sang unud sa circuncision ni Cristo; 12kag nalubung kamo kaupud niya sa bautismo, diin ginbanhaw man kamo kaupud niya paagi sa pagtoo sa pagpanghikot sang Dios, nga nagbanhaw sa iya.#Roma 6:4. 13Kag kamo, nga patay sa inyo mga paglapas kag dicircuncision sang inyo unud, ginbuhi sang Dios upud sa iya,#Efe. 2:1-5. nga napatawad niya kita sang aton tanan nga paglapas, 14nga napanas niya ang mando nga sinulat sa mga pagsolondan nga batok sa aton; ini ginkuha niya, nga ginalansang ini sa cruz.#Efe. 2:15. 15Ginhuklasan niya ang mga punoan kag mga kagamhanan kag ginpakita niya sila sing dayag, nga nagadaug sa ila sa iya cruz.

16Busa walay tawo nga maghukom sa inyo nahanungud sa kalan-on kag sa ilimnon ukon nahanungud sa piesta ukon sa lati ukon sa adlaw nga inugpahuway.#Roma 14:1-6. 17Ini sila amo ang landong lamang sang magaabut; apang ang lawas iya ni Cristo. 18Walay tawo nga magpasayup sa inyo, nga nagapilit sa pagpaubus sang kaugalingon kag pagsimba sa mga manugtunda, nga nagatindug sa mga palanan-awon, nga ginpahabok sa walay katarungan sang iya hunahuna nga unudnon, 19kag wala nagakapyot sing malig-on sa Olo, nga gikan sa iya ang bug-os nga lawas, nga ginsagud kag nabilog paagi sa mga lutalutahan kag mga kaangtan, nagatubo sa pagpatubo nga gikan sa Dios.#Efe. 4:16.

20Kon napatay kamo upud kay Cristo sa mga nahauna nga pagtolon-an sang kalibutan, ngaa bala nagakabuhi kamo subong nga iya pa kamo sang kalibutan? Ngaa bala nagapasakup kamo sa mga pagsolondan, 21“Dili mag-uyat, Dili magtilaw, Dili magtandug” 22(nahanungud sa tanan nga butang nga nagakawala sa ginagamit sila), sono sa mga sogo kag mga pagtolon-an sang mga tawo? 23Ini sila matuud may dagway sang kaalam sa pagpatubo sing makugi nga pagsimba kag pagpaubus sang kaugalingon kag pagsakit sang lawas, apang walay kapuslanan ini sila batok sa pagpatuyang sang unud.

Currently Selected:

COLOSAS 2: ABHIL82

Highlight

Copy

Compare