2 CORINTO 4

1Busa, sa may amon kami sining pagpangabudlay sa kalooy sang Dios, wala kami nagapakaluya. 2Nasikway namon ang makahuluya kag natago nga mga paagi; nagadumili kami sang pagdaya ukon sang pagsimbog sang polong sang Dios, kondi tungud sa kahayagan sang kamatooran nagapakilala kami sang amon kaugalingon sa kaisipan sang tagsa ka tawo sa atubangan sang Dios. 3Kag bisan ang aton maayong balita natabonan, natabonan ini sa ila nga nagakawala. 4Sa ila bagay ang dios sining kalibutan nagbulag sang mga painoino sang mga dimatinoohon, agud nga indi sila makakita sang kapawa sang maayong balita sang himaya ni Cristo, nga amo ang larawan sang Dios. 5Kay wala namon ginawali ang amon kaugalingon, kondi si Cristo Jesus subong nga Ginoo, kag kami subong nga inyo mga ulipon tungud kay Jesus. 6Kay ang Dios nga nagsiling, “Ang kapawa magsilak gikan sa kadudulman,”#Gen. 1:3. amo ang nagsilak sa aton mga tagiposoon sa paghatag sang kapawa sang pagkilala sang himaya sang Dios sa nawung ni Cristo.

Ang Pagkabuhi paagi sa Pagtoo

7Apang may amon sining bahandi sa mga suludlan nga duta, agud nga ang tama nga pagkadaku sang gahum mangin-iya sang Dios kag indi sa amon kaugalingon. 8Ginaipit kami sa tagsa ka luyo, apang wala mapioti; ginapalibog, apang wala mawad-i sing paglaum; 9ginahingabut, apang wala mapatumbayai; ginapanglampusan, apang wala malaglag; 10nga nagadala sa amon lawas sa gihapon sang kamatayon ni Jesus, agud nga ang kabuhi man ni Jesus mapahayag sa amon mga lawas. 11Kay kami nga nagakabuhi ginapanugyan gihapon sa kamatayon tungud kay Jesus, agud nga ang kabuhi man ni Jesus mapahayag sa amon unud nga mamalatyon. 12Gani ang kamatayon nagahikot sa amon, apang ang kabuhi sa inyo.

13Sanglit kami may amo nga espiritu sang pagtoo subong sa iya nga nagsulat, “Nagtoo ako, kag gani naghambal ako,”#Sal. 116:10. nagatoo man kami, kag gani nagahambal man kami, 14nga nakahibalo nga ang nagbanhaw kay Ginoong Jesus magabanhaw man sa amon upud kay Jesus kag ipaatubang kami kaupud ninyo sa iya. 15Kay ang tanan nga butang tungud sa inyo, agud nga ang bugay nga ginapabugana sa madamu kag madamu pa nga katawohan magpabugana sang pagpasalamat, sa himaya sang Dios.

16Gani wala kami nagapakaluya. Bisan ang amon tawo nga sa gowa nagakadunut, walay sapayan ang sa sulud nagabag-o adlawadlaw. 17Kay ang amon mamag-an nga kapipit-an nga sa malip-ot nga tion nagaaman sa amon sing dayon nga kabug-aton sang himaya labaw sa tanan nga mapaanggid, 18bangud nga wala kami nagatolok sa mga butang nga makita kondi sa mga butang nga dimakita; kay ang mga butang nga makita umalagi, apang ang mga butang nga dimakita nagapadayon.

Currently Selected:

2 CORINTO 4: ABHIL82

Highlight

Copy

Compare