2 CORINTO 3

Mga Manughikot sang Bag-ong Katipan

1Nagasugud bala kami liwat sa pagdayaw sang amon kaugalingon? Ukon nagakinahanglan bala kami, subong sa ginahimo sang iban, sing mga sulat sang pagdayaw ayon sa inyo, ukon gikan sa inyo? 2Kamo amo ang amon sulat sa pagdayaw, nga nasulat sa inyo mga tagiposoon, nga kilalahon kag basahon sang tanan nga tawo; 3kag nagapahayag kamo nga kamo isa ka sulat ni Cristo nga ginpanghikot namon, nga nasulat indi sa tinta kondi sa Espiritu sang buhi nga Dios, indi sa mga tapitapi nga bato#Ex. 24:12. kondi sa mga tapitapi nga unud sang mga tagiposoon sang tawo.

4Amo ini ang amon pagsalig paagi kay Cristo ayon sa Dios. 5Indi nga kami sangkol sa amon kaugalingon sa pag-isip sang bisan ano subong nga gikan sa amon gid; kondi ang amon pagkasangkol gikan sa Dios, 6nga naghimo sa amon nga sangkol nga mga alagad sang bag-ong katipan,#Jer. 31:31-34. indi sang nasulat nga kasogoan kondi sang Espiritu; kay ang nasulat nga kasogoan nagapatay, apang ang Espiritu nagahatag sing kabuhi.

7Karon kon ang pagpanghikot sang kamatayon, nga natigib sa bato, nag-abut nga may himaya sa bagay nga ang mga anak sang Israel indi makatolok sing dayon sa guya ni Moises tungud sang himaya sini,#Ex. 34:29. nga nagakawala, 8ngaa indi bala magmahimayaon pa ang pagpanghikot sang Espiritu? 9Kay kon ang pagpanghikot sang katagudilian may himaya, labi na gid ang pagpanghikot sang pagkamatarung nagalabaw sa himaya. 10Sa pagkamatuud, sa sining bagay, ang may himaya anay nanginwalay himaya gid, bangud sang himaya nga nagalabaw sini. 11Kay kon ang nagtaliwan may himaya, labi na gid nga may himaya ang nagapadayon.

12Sanglit nga may amo kami nga paglaum, kami masidla gid, 13indi subong kay Moises, nga nagtabon sang iya guya#Ex. 34:33. agud nga ang mga anak sang Israel indi makakita sang katapusan sang nagakawala nga himaya. 14Apang ang ila mga painoino nagtig-a; kay tubtub karon nga adlaw, sa pagbasa nila sang daan nga katipan, nagapabilin ang amo nga tabon nga wala mabayaw, bangud nga ini makuha lamang paagi kay Cristo. 15Hoo, tubtub karon nga adlaw kon ginabasa si Moises ang tabon yara sa ila mga painoino; 16apang kon ang tawo magaliso sa Ginoo makuha ang tabon. 17Karon ang Ginoo amo ang Espiritu, kag diin ang Espiritu sang Ginoo, didto ang kahilwayan. 18Kag kita tanan, sa guya nga walay tabon, nga nagatolok sang himaya sang Ginoo, ginabalhin sa iya kaangay gikan sa isa ka himaya pa himaya; kay ini gikan sa Ginoo nga amo ang Espiritu.

Currently Selected:

2 CORINTO 3: ABHIL82

Highlight

Copy

Compare