2 CORINTO 1
1
Pag-abiabi
1Si Pablo, pinadala ni Jesu-Cristo sa kabubut-on sang Dios, kag si Timoteo nga aton utud.
Sa iglesia sang Dios nga yara sa Corinto,#Binu. 18:1. kaupud sang tanan nga balaan nga yara sa bug-os nga Acaya:
2Ang bugay sa inyo kag paghidait nga gikan sa Dios nga aton Amay kag kay Ginoong Jesu-Cristo.
Ang Kapipit-an ni Pablo
3Dayawon ang Dios kag Amay sang aton Ginoong Jesu-Cristo, ang Amay sang mga kalooy kag ang Dios sang tanan nga paglipay, 4nga nagalipay sa aton sa tanan naton nga kapipit-an, agud nga makalipay kita sa ila nga yara sa bisan anong kapipit-an, paagi sa paglipay nga ginlipay sang Dios sa aton. 5Kay subong nga nagaambit kita sing bugana sang mga pag-antus ni Cristo, amo man paagi kay Cristo nagaambit kita sing bugana sang paglipay. 6Kon kami ginapapiotan, ina tungud sa inyo kalipay kag kaluwasan; kag kon ginalipay kami, ina tungud sa inyo kalipay, nga inyo ginaagum sa inyo mapailubon nga pagbatas sang amo nga mga kaantusan nga amon man ginaantus. 7Malig-on ang amon nga paglaum sa inyo; kay kami nakahibalo nga sa naga-ambit kamo sang mga pag-antus namon, kamo magaambit man sang kalipay namon.
8Kay indi kami buut nga indi kamo makahibalo, mga kauturan, nahanungud sa kapipit-an nga naagum namon sa Asia;#1 Cor. 15:32. kay ginpabug-atan kami sing lakas, labaw sa amon ikasarang sa bagay nga wala na kami sing paglaum bisan sa pagkabuhi. 9Hoo, kami nagbatiag nga nabaton namon ang paghukom sang kamatayon; apang ini agud nga indi kami magsalig sa amon kaugalingon kondi sa Dios nga nagabanhaw sang mga patay; 10nagluwas sia sa amon sa tama ka makamamatay nga katalagman, kag magaluwas sia sa amon; sa iya nagalaum kami nga sia magaluwas liwat sa amon. 11Kamo man magbulig gid sa amon paagi sa inyo pangamuyo, agud nga madamu ang magpasalamat tungud sa amon bangud sang pagpakamaayo nga ginhatag sa amon nga sabat sa madamu nga pangamuyo.
Ngaa si Pablo Nagpabilin sa Malayo
12Kay ang amon pagpabugal amo ini, ang pagpamatuud sang amon kaisipan nga sa pagkabalaan kag pagkamaminatud-on sang Dios, indi sa kaalam nga unudnon kondi sa bugay sang Dios, nagagawi kami sa kalibutan, kag labi pa ayon sa inyo. 13Kay wala kami nagasulat sing iban nga mga butang sa inyo kondi ang mabasa ninyo kag makilala; nagalaum ako nga kilalahon ninyo sing bug-os, 14subong nga ginkilala ninyo sa bahin, nga kami amo ang pagpabugal ninyo subong nga kamo man amo ang amon, sa adlaw sang aton Ginoong Jesus.
15Bangud nga may pagsalig ako sini, buut ko nga magkara sing una sa inyo, agud nga makabaton kamo sing pilo nga kalipay; 16buut ako magduaw sa inyo sa akon pag-agi pa Macedonia,#Binu. 19:21. kag gikan sa Macedonia pabalik sa inyo kag pagpatigayonon ninyo ako sa akon panlakatan pa Judea. 17Sang pagbuut ko sini nagpakita bala ako sing pagkamabaylohon? Ginahimo ko bala ang akon mga buko kaangay sa kalibutanon nga tawo, nga handa magsiling Hoo kag Indi sa makaisa? 18Subong nga ang Dios matutum, ang amon polong sa inyo indi Hoo kag Indi. 19Kay ang Anak sang Dios, nga si Jesu-Cristo, nga ginwali namon sa tunga ninyo, ni Silvano kag ni Timoteo kag nakon,#Binu. 18:5. indi Hoo kag Indi; apang sa iya amo ang Hoo sing dalayon. 20Kay ang tanan nga saad sang Dios nakakita sang ila Hoo sa iya. Gani paagi sa iya ginamitlang ta ang Kabay pa, sa himaya sang Dios. 21Apang ang Dios amo ang nagapalig-on sa amon kaupud ninyo kay Cristo, kag nagsogo sa amon; 22sia nagbutang sang iya pat-in sa amon kag naghatag sang iya Espiritu sa amon mga tagiposoon subong nga kalig-onan.
23Apang ginatawag ko ang Dios nga saksi sa akon kalag—sa pagpalikaw sa inyo nagdumili ako sa pagkara sa Corinto. 24Indi nga nagahari kami sa inyo pagtoo; kondi nagapangabudlay kami kaupud ninyo sa inyo kalipay, kay sa inyo pagtoo malig-on kamo.
Currently Selected:
2 CORINTO 1: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
