Exodo 39
39
Ang Paghimo sang mga Bayu para sa mga Pari
(Exo. 28:1-14)
1Naghimo sila sing malahalon nga mga bayu nga asol, nga granate kag pula nga delana agod isuksok sang mga pari kon sila mag-alagad sa Balaan nga Duog. Naghimo sila sang mga bayu para kay Aaron subong pari suno sa ginsugo sang Ginoo kay Moises.
2Naghimo sila sang bestidora nga halin sa mapino nga nagakunotkunot nga lino; asol, granate, kag pula nga delana; kag sa bulawan nga hilo. 3Ginsalsal nila ang bulawan sa pinanid nga manipis, gingihaygihay nila ini nga daw mga hilo kag ginsamay sa delana nga asol, nga granate, kag pula; kag sa mapino nga nagakunotkunot nga lino nga nabordahan. 4Naghimo sila sing mga terante nga naangot sa naibabaw nga bahin sang bestidora agod sarang ini mahugot. 5Ang paha nga hinabol sing matahom unay sa sini, kag pareho gid sini ang gingamit nga mga materyal sa pag-obra sang bestidora. Ini nahimo sa bulawan nga hilo; delana nga asol, nga granate kag pula kag sa mapino nga nagakunotkunot nga lino, suno sa ginsugo sang Ginoo kay Moises. 6Naghimo sila sing malahalon nga mga bato nga kornalina, kag gintakod ini sa mga balayan nga bulawan. Ginsinsilan ini sang maayo sang mga ngalan sang dose ka mga anak ni Israel. 7Gintakod nila ini sa mga terante sang bestidora, subong mga bato sa pagdumdom sang mga anak ni Israel, suno sa ginsugo sang Ginoo kay Moises.
Ang Paghimo sang Hapin sa Dughan
(Exo. 28:15-30)
8Ginhimo nila ang hapin sa dughan nga nabordahan sing matahom subong sang bestidora. Ginhimo nila ini sa bulawan nga hilo; delana nga asol, nga granate, kag pula; kag sa mapino nga nagakunotkunot nga lino. 9Ginhimo nila ini nga kwadrado kag ginpilo sing doble, siyam ka pulgada ang kalabaon, kag siyam ka pulgada ang kasangkaron. 10Gintakdan nila ini sing apat ka kubay sang malahalon nga mga bato: sa nahauna nga kubay rubi, topasio, kag karbunklo, 11sa ikaduha nga kubay esmeralda, sapiro, kag diamante; 12sa ikatlo nga kubay, hasinto, agate kag ametista; 13kag sa ikaapat nga kubay, berilo, kornalina, kag haspe. Gintakod ini sa mga balayan nga bulawan. 14May dose ka malahalon nga mga bato, nga ginsinsilan sang ngalan sang mga anak ni Jacob, agod sa pagrepresentar sang dose ka mga tribo sang Israel. 15Naghimo sila sing kulintas nga puraw nga bulawan nga linubid para sa hapin sa dughan. 16Naghimo sila sing duha ka mga balayan nga bulawan kag duha ka mga singsing nga bulawan, kag gintakod nila ang duha ka mga singsing sa duha ka mga pamusod nga naibabaw sang hapin sa dughan. 17Gintakod nila ang duha ka mga linubid nga bulawan sa duha ka mga singsing, 18kag gintakod ang duha man ka mga punta sang linubid nga bulawan sa duha ka mga balayan, kag sa sini nga paagi gintakod ini sa atubangan nga terante sang bestidora. 19Naghimo sila sing duha ka mga singsing nga bulawan kag gintakod ini sa idalom nga mga pamusod sang hapin sa dughan, sa sulod nayon nga sidsid sang bestidora. 20Naghimo pa gid sila sing duha ka mga singsing nga bulawan kag gintakod ini sa idalom nga bahin sa atubangan sang duha ka mga terante sang bestidora, malapit sa sidsid kag sa ibabaw sang matahom kag hinabol nga paha sang bestidora. 21Gintabid nila sang asol nga lubid ang mga singsing sang hapin sa dughan kag ang mga singsing sang bestidora, agod nga ang hapin sa dughan mapahamtang sa ibabaw sang paha kag indi mapalos, suno sa ginsugo sang Ginoo kay Moises.
Ang Paghimo sang Iban nga mga Bayu para sa mga Pari
(Exo. 28:31-43)
22Naghimo man sila sing sutana nga hinabol. Ini nagalabaw sa bestidora nga nahimo sa puro nga delana nga asol. 23Ang liab sang sutana subong sang liab sang kamesita. Ang palibot sang liab naapurohan sing hinabol, agod nga indi ini magisi. 24Sa iya sini naidalom nga sidsid ginhimuan nila sing granada nga delana nga asol, nga granate, kag pula, kag mapino nga nagakunotkunot nga lino. 25Naghimo man sila sing mga kampanilya nga puraw nga bulawan, kag ginpanakod ini sing bal-utbal-ut sa mga granada sa palibot sa naidalom nga sidsid. 26May kubay sang mga kampanilya kag sang mga granada sa palibot sang naidalom nga sidsid sang sutana nga gingamit sa pag-alagad subong nga pari, suno sa ginsugo sang Ginoo kay Moises.
27Naghimo man sila sing mga bayu sa nahabol nga mapino nga lino para kay Aaron kag sa iya mga anak, 28sang turban, sang mga gora, sang mga karsonsilyo nga nahimo sa mapino nga lino kag nagakunotkunot, 29sang wagkos nga nahimo sa mapino nga lino nga nagakunotkunot, kag delana nga asol, nga granate, kag pula, nga nabordahan, suno sa ginsugo sang Ginoo kay Moises. 30Naghimo sila sing adorno nga puraw nga bulawan, balaan nga tanda sang paghalad kag ila ginsinsilan sang masunod nga mga pulong, “Nahalad sa Ginoo,” pareho sang pagsinsil sang selyo. 31Ginhigot nila ini sang lubid nga asol sa atubangan sang turban, suno sa ginsugo sang Ginoo kay Moises.
Ang Pagtapos sang Obra
(Exo. 35:10-19)
32Sa katapusan, ang tanan nga obra sa Tolda sang presensya sang Ginoo natapos gid man. Ang mga Israelinhon naghimo sang tanan suno sa ginsugo sang Ginoo kay Moises. 33Gindala nila kay Moises ang Tolda, kag ang tanan sini nga mga kasangkapan, ang mga kaw-it, ang mga dingding nga tapi, ang mga baral, ang mga haligi kag ang mga sadsaran; 34ang tabon nga panit sang mga karnero nga lalaki nga ginlugom sa pula; ang tabon nga nahimo sa maayo nga panit, ang kurtina nga nagalipon; 35ang Kaban sang Kasugtanan nga nasudlan sang mga lapida nga bato, ang iya mga yayungan, kag ang takop; 36ang lamisa kag ang tanan sini nga mga kasangkapan, ang tinapay nga nahalad sa Dios; 37ang kandelirohan nga puraw nga bulawan, ang iya mga suga, kag ang tanan sini nga mga kasangkapan, kag ang lana para sa mga suga; 38ang altar nga bulawan; ang lana nga inughaplas; ang mahamot nga insyenso; ang kurtina sa pwertahan sang Tolda; 39ang altar nga bronsi kag ang bronsi nga parilyahan sini, ang mga yayungan, kag ang tanan sini nga mga kasangkapan; ang batya kag ang iya tulongtungan; 40ang mga kurtina para sa bungbong kag ang mga haligi, kag mga sadsaran; ang kurtina sa pwertahan sang bungbong kag ang mga banting sini; ang mga palpal sang Tolda; kag ang tanan nga mga kasangkapan sa pag-alagad sa Tolda; 41ang mga bayu nga malahalon nga ginagamit sang mga pari sa Duog nga Balaan, ang balaan nga mga bayu para kay Aaron nga pari, kag ang mga bayu para sa iya mga anak kon mag-alagad sila subong mga pari. 42Ang mga Israelinhon naghimo sang tanan nga bulohaton suno sa ginsugo sang Ginoo kay Moises. 43Gin-usisa ni Moises ang tanan nga mga butang nga ila ginhimo, kag iya nakita nga ginhimo nila ini tanan suno sa ginsugo sang Ginoo. Gani ginbendisyunan sila ni Moises.
Currently Selected:
Exodo 39: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
