Exodo 38
38
Ang Paghimo sang Altar para Sunogan sang mga Dulot
(Exo. 27:1-8)
1Naghimo sia sing altar halin sa kahoy nga akasya para sunogan sang mga halad. Kwadrado ini, pito kag tunga ka tapak ang kalabaon, pito kag tunga ka tapak ang kasangkaron, kag apat kag tunga ka tapak ang kataason. 2Naghimo sia sing mga sungaysungay nga unay sa ibabaw sang apat ka mga pamusod sang altar. Ginhaklapan niya ini tanan sing bronsi. 3Ginhimo man niya ang tanan nga mga kasangkapan para sa altar: ang mga bulotangan sang abo, ang mga pala, ang mga batya, ang mga kaw-it kag ang mga bulotangan sang baga. Ginhimo niya ang tanan nga mga gamit halin sa bronsi. 4Naghimo sia sing parilyahan nga nahimo sa bronsi, kag ginbutang ini sa idalom sang sanipa sang altar, agod nga makalambot ini sa tungatunga sang altar. 5Naghimo sia sing apat ka dalagku nga mga sulosingsing kag gintakod ini sa apat ka mga pamusod sang bronsi nga parilyahan nga guloan sang mga yayungan. 6Naghimo sia sing mga yayungan halin sa kahoy nga akasya, kag ginhaklapan niya ini sing bronsi. 7Kag gingulo ini sa dalagku nga mga sulosingsing sa tagsa ka kilid sang altar, sa pagdala sini. Ginhimo niya ang altar nga guab sa sulod kag nahimo ini sa mga tapi.
Ang Paghimo sang Batya nga Bronsi
(Exo. 30:18)
8Naghimo#Exo. 30:18. sia sing batya nga bronsi, kag sang iya tulongtungan nga bronsi halin sa mga espeho sang mga babayi nga nag-alagad sa pwertahan sang Tolda sang presensya sang Ginoo.
Ang Bungbong para sa Tolda sang Presensya sang Ginoo
(Exo. 27:9-19)
9Para sa Tolda sang presensya sang Ginoo naghimo sia sang bungbong. Ang mga kurtina sa nabagatnan nga bahin nahimo sa mapino nga nagakunotkunot nga lino, singkwenta ka yarda ang kalabaon. 10Ang baynte ka mga haligi kag baynte ka mga sadsaran nga bronsi, may mga kaw-it nga yara sa haligi, kag may mga kalaw-itan nga nahimo sa pilak. 11Sa naaminhan nga bahin ang mga kurtina may singkwenta ka yarda ang kalabaon, nga natakod sa baynte ka mga haligi, nga may baynte ka mga sadsaran nga bronsi, nga may mga kaw-it sa haligi kag ang ila mga kalaw-itan nahimo sa pilak. 12Sa nakatundan nga bahin ang mga kurtina baynte singko ka yarda ang kalabaon, nga natukod sa napulo ka mga haligi nga may napulo ka mga sadsaran, nga may mga kaw-it sa mga haligi kag ang ila mga kalaw-itan nahimo sa pilak. 13Ang nasidlangan nga bahin sa diin yara ang pwertahan, ang bungbong baynte singko ka yarda ang kasangkaron. 14Sa isa ka bahin sang pwertahan ang may mga kurtina pito kag tunga ka yarda ang kasangkaron, nga may tatlo ka mga haligi kag tatlo ka mga sadsaran. 15Amo man ini sa pihak nga bahin, gani sa duha ka kilid sang pwertahan pasulod sa bungbong, may mga kurtina nga pito kag tunga ka yarda ang kasangkaron, nga may tatlo ka mga haligi kag tatlo ka mga sadsaran. 16Ang tanan nga mga kurtina sa palibot sang bungbong nahimo sa mapino nga nagakunotkunot nga lino. 17Ang mga sadsaran sang mga haligi nahimo sa bronsi, kag ang mga kaw-it, kag ang mga kalaw-itan, kag ang mga taklap sa mga uloulo sang mga haligi nahimo sa pilak. Ang tanan nga mga haligi sa palibot sang bungbong may mga kalaw-itan nga pilak. 18Ang kurtina sa pwertahan sang bungbong nabordahan. Nahimo ini sa delana nga asol, nga granate, kag pula kag mapino nga nagakunotkunot nga lino. Napulo ka yarda ang kalabaon sini, kag duha ka yarda kag tunga ang kataason, subong sang mga kurtina sang bungbong. 19Natakod ini sa apat ka mga haligi nga natungtong sa apat ka mga sadsaran nga bronsi. Ang ila mga kaw-it, ang mga taklap sa mga uloulo kag ang mga kalaw-itan nahimo sa pilak. 20Ang tanan nga mga palpal para sa Tolda sang presensya sang Ginoo kag para sa bungbong palibot nahimo sa bronsi.
Ang mga Metal nga Gingamit sa Tolda sang Presensya sang Ginoo
21Amo ini ang kadamuon sang mga metal nga gingamit sa Tolda sang presensya sang Ginoo, nga ginsudlan sang duha ka mga lapida nga bato kag sa sini nasulat ang Napulo ka Sugo. Ginlista ini suno sa sugo ni Moises kag ginhimo sang mga Levita, nga nag-obra sa idalom sang pagdumala ni Itamar, ang anak nga lalaki ni Aaron nga pari.
22Si Besalel, nga anak ni Uri, kag apo ni Hur sang tribo ni Juda, naghimo sang tanan nga ginsugo sang Ginoo kay Moises. 23Ang iya kabulig, amo si Oholiab nga anak ni Ahisamak, sang tribo ni Dan, nga isa ka manugsinsil, manugborda, manughabol sang delana nga asol, nga granate, kag pula, kag sang mapino nga nagakunotkunot nga lino.
24Ang tanan nga bulawan nga gingamit sa pag-obra sang balaan nga Tolda nagbug-at sing 2,195 ka libra suno sa opisyal nga talaksan. 25Ang#Exo. 30:11-16. pilak nga naisipan halin sa katilingban nagabug-at sing 7,550 ka libra suno sa opisyal nga talaksan. 26Ini#Mat. 17:24. nga kadamuon suno gid sa ginbayad sang tanan nga mga tawo nga nalista sa sensus, nga ang tagsatagsa nagbayad sang ginkinahanglan sa ila, suno sa opisyal nga talaksan. Ang kadamuon sang mga tawo nga nalista halin sa baynte ka tuig ang edad pa ibabaw 603,550 tanan. 27Ang 7,500 ka libra nga pilak gingamit sa paghimo sang 100 nga mga sadsaran sang balaan nga Tolda kag sang kurtina, setentay singko ka libra para sa isa ka sadsaran. 28Ang nabilin nga singkwenta ka libra nga pilak, ginhimo niya nga mga kaw-it sang mga haligi, taklap sa mga uloulo, kag mga kalaw-itan. 29Ang bronsi nga ginhalad sa Ginoo nagabug-at sing 5,310 ka libra. 30Halin sa sini ginhimo niya ang mga sadsaran para sa pwertahan sang Tolda sang presensya sang Ginoo, ang bronsi nga altar lakip ang iya bronsi nga parilyahan, kag ang tanan nga mga kasangkapan para sa altar, 31ang mga sadsaran para sa bungbong palibot, kag para sa pwertahan sang bungbong, kag ang tanan nga mga palpal para sa Tolda kag sa bungbong palibot.
Currently Selected:
Exodo 38: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
