Exodo 34
34
Ang Ikaduha nga mga Lapida nga Bato
(Deut. 10:1-5)
1Ang Ginoo nagsiling kay Moises, “Basbas ka sing duha ka mga lapida nga bato pareho sang nahauna, kag isulat ko sa sini ang mga pulong nga nasulat sa nahauna nga mga lapida nga bato nga imo ginbuka. 2Maghanda ka buas sa aga, kag magtaklad ka sa Bukid sang Sinai kag magpakigkita ka sa akon didto sa putokputokan. 3Wala sing bisan sin-o nga magtaklad upod sa imo, kag wala sing bisan sin-o nga makita sa bisan diin nga bahin sang bukid. Wala man sing mga karnero ukon mga baka nga pahalbon sa kunsaran sang bukid.” 4Gani nagbasbas si Moises sing duha ka mga lapida nga bato subong sang nahauna, kag aga pa gid sa madason nga adlaw nagtaklad sia sa Bukid sang Sinai nga nagadala sang duha ka mga lapida nga bato, suno sa ginmando sa iya sang Ginoo.
5Ang Ginoo nagpanaog nga nalipdan sang panganod, kag nagtindog upod sa iya didto, kag naghambal sang iya balaan nga ngalan, ang Ginoo.#34:5 ANG GINOO: Tan-awa ang 3:14, kag ang Lista sang mga Pulong. 6Ang#Exo. 20:5-6; Num. 14:18; Deut. 5:9-10. Ginoo nag-agi sa atubang niya kag nagsiling, “Ako ang Ginoo, ako amo ang Dios nga maluloy-on kag mainawaon, indi madali mangakig kag nagapakita sang daku nga gugma kag katutom. 7Nagatuman ako sang akon saad sa mga linibo nga mga kaliwatan,#34:7 sa mga linibo nga mga kaliwatan: ukonsa mga linibo. kag nagapatawad ako sang mga kalautan, kalainan, kag sala. Pero indi ko pagpabay-an kundi akon silutan ang mga kaanakan kag mga kaapuhan tubtob sa ikatlo kag ikaapat nga kaliwatan tungod sang mga kasal-anan sang ila mga ginikanan.”
8Si Moises dalidali nga nagluhod sa duta kag nagsimba. 9Nagsiling sia, “Ginoo, kon nahamuot gid ikaw sa akon, ginaampo ko nga mag-upod ka sa amon. Ining mga tawo matig-a gid sang ulo, pero patawara ang amon kalautan, kag kasal-anan, kag batuna kami subong imo kaugalingon nga mga tawo.”
Ang Kasugtanan Ginbag-o
(Exo. 23:14-19; Deut. 7:1-5; 16:1-17)
10Ang Ginoo nagsiling kay Moises, “Karon magahimo ako sing isa ka kasugtanan sa mga tawo sang Israel. Sa ila atubang magahimo ako sang gamhanan nga mga buhat nga wala pa gid mahimo sa bug-os nga duta, sa bisan diin nga pungsod. Ang tanan nga mga tawo nga kaupod nimo makakita kon ano ang dalagku nga mga butang nga himuon ko, ako ang Ginoo, tungod kay ako magahimo sang isa ka makakulogmat nga butang para sa inyo. 11Tumana ang mga sugo nga ihatag ko sa inyo karon nga adlaw. Sa atubang ninyo tabugon ko ang mga Amornon, ang mga Canaanhon, ang mga Hethanon, ang mga Peresnon, ang mga Hevhanon, kag ang mga Jebusnon. 12Tandaan ninyo nga indi kamo maghimo sing kasugtanan sa mga tawo sa pungsod nga inyo pagakadtuan tungod kay amo ini ang manginkabangdanan sang inyo kalaglagan. 13Sa#Deut. 16:21. baylo, inyo panggub-on ang ila mga altar, laglagon ninyo ang ila ginapakabalaan nga mga haligi, kag panapson ang mga simbulo sang ila diosa nga si Asera.
14“Indi kamo magsimba sa iban nga dios, tungod kay ako, ang Ginoo, maimon nga Dios. 15Indi kamo maghimo sing mga kasugtanan sa mga tawo sang pungsod, tungod kay kon magsimba sila sa ila mga dios kag magdulot sang mga halad sa ila, agdahon nila kamo sa pag-upod sa ila kag basi masulay kamo sa pagkaon sang mga kalan-on nga nahalad sa ila mga dios. 16Basi pangasaw-on sang inyo mga anak nga lalaki ang ila mga anak nga babayi, kag ini nga mga dumoluong nga babayi magaginawi subong sang malain nga mga babayi bilang bahin sang ila pag-alagad sa ila mga dios, kag magadala sang inyo mga anak nga lalaki sa pagpahilayo sa akon kag sa pag-alagad sa ila mga dios.
17“Indi#Exo. 20:4; Lev. 19:4; Deut. 5:8; 27:15. kamo maghimo sing mga dios gikan sa tinunaw nga metal kag simbahon ini.
18“Saulogon#Exo. 12:14-20; Lev. 23:6-8; Num. 28:16-25. ninyo ang Piesta sang Tinapay nga Wala sing Lebadora, suno sa ginsugo ko sa inyo. Magkaon kamo sang tinapay nga wala sing lebadora sa sulod sang pito ka adlaw sa bulan sang Abib, tungod kay amo ini ang bulan nga naggwa kamo sa Ehipto.
19“Ang#Exo. 13:2. tagsa ka panganay sang tawo ukon sang hayop mangin-akon. 20Pero#Exo. 13:13. inyo gawaron ang tagsa ka panganay sang inyo asno paagi sa pagbaylo sini sang isa ka karnero. Kon indi ninyo ini paggawaron, lunggoon ninyo ang iya liog. Inyo gawaron ang tagsa ka panganay nga anak nga lalaki.
“Wala sing isa nga magpalapit sa akon nga wala sing dala nga halad.
21“Mag-obra#Exo. 20:9-10; 23:12; 31:15; 35:2; Lev. 23:3; Deut. 5:13-14. kamo sa sulod sang anom ka adlaw, pero indi kamo mag-obra sa ikapito nga adlaw, bisan pa tig-alarado ukon tig-alani.
22“Saulogon#Lev. 23:15-21; Num. 28:26-31; Lev. 23:39-43. ninyo ang Piesta sang Tig-alani, sa pagsugod ninyo ani sang nahauna nga patubas sang trigo, kag saulogon man ninyo ang Piesta sang Pagtipon sang mga Patubas sa katapusan sang tuig.
23“Makatlo sa isa ka tuig ang tanan ninyo nga mga lalaki dapat magpalapit sa pagsimba sa akon, ang Ginoong Dios sang Israel. 24Sa tapos ko matabog ang mga pungsod sa atubang ninyo, kag mapasangkad ko ang inyo kadutaan, wala sing may magtinguha sa pag-agaw sang inyo duta sa tion sang pagsaulog ninyo sang tatlo ka mga piesta.
25“Indi#Exo. 12:10. kamo maghalad sang tinapay nga may lebadora kon magdulot kamo sing sapat sa akon. Indi kamo magbilin tubtob sa masunod nga aga sang bisan ano nga bahin sang sapat nga naihaw sa Piesta sang Pascua.
26“Dalhon#Deut. 26:2; Deut. 14:21. ninyo ang labing maayo sang nahauna nga patubas sang inyo duta sa balay sang Ginoo sa tagsa ka tuig.
“Indi ninyo paglutoon ang kordero ukon tinday nga kanding sa gatas sang iya inang.”
27Ang Ginoo nagsiling kay Moises, “Isulat ini nga mga pulong, tungod kay sa sini nga mga pulong magahimo ako sing kasugtanan sa imo kag sa Israel.” 28Nagpabilin si Moises didto upod sa Ginoo sa sulod sang kwarenta ka adlaw kag kwarenta ka gab-i, nga wala magkaon ukon mag-inom. Ginsulat niya sa mga lapida nga bato ang mga pulong sang kasugtanan, ang Napulo ka Sugo.
Si Moises Nagdulhog sa Bukid sang Sinai
29Sang#2 Cor. 3:7-16. pagdulhog ni Moises halin sa Bukid sang Sinai nga nagadala sang Napulo ka Sugo, wala sia makahibalo nga ang iya nawong nagasilak bangod kay nagpakighambal sia sa Ginoo. 30Si Aaron kag ang tanan nga mga tawo nagtulok kay Moises, kag nakita nila nga ang iya nawong nagasilak, kag nahadlok sila magpalapit sa iya. 31Pero gintawag ni Moises si Aaron kag ang tanan nga mga pangulo sang katilingban kag nagkadto sila sa iya. Dayon si Moises naghambal sa ila. 32Sa tapos sadto, ang tanan nga mga tawo sang Israel nagpalapit kay Moises, kag iya ginhatag sa ila ang tanan nga mga sugo nga ginhambal sang Ginoo sa iya didto sa Bukid sang Sinai. 33Sa tapos si Moises makahambal sa ila, gintabunan niya ang iya guya sang kunop. 34Kon magsulod si Moises sa Tolda sang presensya sang Ginoo sa pagpakighambal sa Ginoo, ginakuha ni Moises ang tabon sa iya guya. Kon maggwa na sia, ginasugid niya sa mga Israelinhon ang tanan nga ginsugo sang Ginoo sa iya nga isiling, 35kag ila makita nga ang iya guya nagasilak. Dayon iya tabunan liwat ang iya guya tubtob sa iya madason nga pagpakighambal sa Ginoo.
Currently Selected:
Exodo 34: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
