Exodo 33
33
Ang Mando sang Ginoo sa mga Israelinhon sa Paghalin sa Bukid sang Sinai
1Ang#Gen. 12:7; Gen. 26:3; Gen. 28:13. Ginoo nagsiling kay Moises, “Halin ka sa sini nga lugar, upod sa mga tawo nga imo ginpagwa sa Ehipto, kag kadto sa duta nga akon ginsaad nga ihatag kay Abraham, Isaac, kag kay Jacob, kag sa ila mga kaliwat. 2Magapadala ako sing anghel nga magauna sa inyo. Tabugon ko ang mga Canaanhon, ang mga Amornon, ang mga Hethanon, ang mga Peresnon, ang mga Hevhanon, kag ang mga Jebusnon. 3Magakadto kamo sa duta nga maayo kag mapatubason. Pero indi ako mag-upod sa inyo, tungod kay kamo mga tawo nga matig-a sing ulo, kag basi kon ako magalaglag sa inyo sa dalanon.”
4Sang mabatian sang mga tawo ining masakit nga mga pulong, nagkasubo sila, kag wala sing isa sa ila nga naggamit sing mga alahas. 5Kay ang Ginoo nagsugo kay Moises, “Singgana ang mga tawo sang Israel, ‘Kamo mga tawo nga matig-a sing ulo. Kon mag-upod ako sa inyo, bisan sa malip-ot lang nga tion, pagalaglagon ko kamo sing bug-os. Karon, huksa ang inyo mga alahas, kag ako magapamat-od kon ano ang akon himuon sa inyo.’” 6Gani sa tapos sila makahalin sa Bukid sang Sinai, ang mga tawo sang Israel wala na magsuksok sang ila mga alahas.
Ang Tolda sang Presensya sang Ginoo
7Kinabatasan ni Moises ang pagkuha sang Tolda kag ang pagpatindog sini sa gwa sang kampo sa ulounhan. Iya ini ginhingalanan “Ang Tolda sang presensya sang Ginoo.” Ang bisan sin-o nga luyag magkonsulta sa Ginoo dapat sia maggwa sa kampo kag magkadto sa Tolda. 8Kon maggwa si Moises pakadto sa Tolda, ang tanan nga mga tawo nagatindog sa pwertahan sang ila mga tolda kag nagabantay kay Moises tubtob nga makasulod sia sa Tolda. 9Sa tapos makasulod si Moises sa Tolda, ang haligi nga panganod nagapanaog kag nagapundo sa pwertahan sang Tolda, kag ang Ginoo nagahambal kay Moises halin sa panganod. 10Kon makita sang tanan nga mga tawo ang haligi nga panganod sa pwertahan sang Tolda, nagaluhod sila. 11Ang Ginoo nagahambal kay Moises sing tampad, subong sang isa ka tawo nga nagahambal sa iya abyan. Dayon si Moises nagabalik sa kampo. Pero ang isa ka pamatan-on nga iya alagad, si Josue nga anak ni Nun, wala naghalin sa Tolda.
Ang Saad sang Presensya sang Ginoo sa Iya mga Katawhan
12Si Moises nagsiling sa Ginoo, “Matuod nga ikaw nagsiling sa akon nga pangulohan ko ini nga mga tawo pakadto sa sadto nga duta, pero wala ka magsiling sa akon kon sin-o ang imo ipadala upod sa akon. Nagsiling man ikaw, ‘Nakilala ko gid ikaw, kag ako nahamuot gid sa imo.’ 13Karon kon nahamuot ka sa akon, ginapangayo ko nga isugid mo sa akon ang imo mga ginaplano, agod nga magaalagad ako sa imo, kag magapadayon ako sa pagpahamuot sa imo. Dumdoma man nga ini nga pungsod imo ginpili nga mangin-imo.”
14Ang Ginoo nagsiling, “Ako magaupod sa imo, kag padag-on ko ikaw.”
15Si Moises nagsabat sa iya, “Kon indi ikaw mag-upod sa amon, indi kami pagpahalina sa sini nga lugar. 16Kay kon indi ikaw mag-upod sa amon, ano ang pagkahibalo sang bisan sin-o nga ikaw nahamuot sa imo mga tawo kag sa akon? Kon ikaw mag-upod sa amon, ako kag ang imo mga tawo manginpinasulabi sa tanan nga mga katawhan sa duta.”
17Ang Ginoo nagsiling kay Moises, “Himuon ko ang imo ginpangayo, tungod kay nahamuot gid ako sa imo, kag nakilala ko gid ikaw.”
18Si Moises nagpangabay, “Kon mahimo ipakita sa akon ang makasililaw nga kapawa sang imo presensya.”
19Ang#Rom. 9:15. Ginoo nagsabat, “Paagihon ko sa imo atubang ang bug-os ko nga katahom, kag ihambal ko sa imo atubang ang akon balaan nga ngalan. Ako amo ang Ginoo kag magakaluoy kag magakaawa sa akon ginpili.” 20Ang Ginoo nagpadayon, “Indi ko pag-ipakita sa imo ang akon nawong, kay wala sing tawo nga makakita sa akon kag mabuhi.” 21Nagpadayon pa gid sia sa pagsiling, “Tan-awa, may lugar diri sa tupad ko sa diin makatindog ka sa daku nga bato. 22Kon mag-agi ako kag magapakita sa imo sang akon makasililaw nga kapawa, ibutang ko ikaw sa gikab sang daku nga bato, kag tabunan ko ikaw sang akon kamot tubtob nga makaligad ako. 23Dayon kuhaon ko ang akon kamot kag makita mo ang akon likod, pero indi ang akon guya.”
Currently Selected:
Exodo 33: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
