Kwan 28
28
Mic ma kisi ndelo
1Rwoth oluwo gi Musa ka waco ni, 2“Wodhi or ri Joisiraili, aka iwaci rijo ni joripo miyan mic paran ma cemo m'owaŋ gi mac, ma ŋwece kur mere mit i hongo ma ripo.”
3Waci rijo ni me mic ma cemo m'owaŋ gi mac ma joripo miyo Rwoth. Wot rombo ario ma jo oro acel ma jongoye gi ŋolo paka mic ma kisi ndelo. 4Wod rombo acel wilamiyo odikin, aka man mere wilamiyo othieno. 5Wiripo bende miyo kilo acel ma moko, m'onywow gi lita acel ma mo oliv. 6Me mic awaŋa ma kisi ndelo, m'iwaŋo gikululu, m'ocaki miyo gi got Sinai paka mic ma cemo, ma ŋwece kur mere sangala Rwoth. 7Mic ma vini m'iripo miyo gi wod rombo marapena ripo bedo lita acel, m'iripo konjo i Kabedo Maleŋ ri Rwoth. 8Wod rombo man iripo miyo othieno gi mic ma cemo kodi mic ma vini paka m'odikin. Wiripo miyo paka mic awaŋa, ma ŋwece kur mere sangala Rwoth.
Mic ma Sabato
9I ndelo ma sabato wiripo miyo wot rombo ario ma jo oro acel ma jongoye gi ŋolo, kilo ario ma moko m'onywow gi mo oliv paka mic ma cemo kodi mic ma vini. 10Me mic awaŋa ri kisi ndelo ma sabato, medo i wi mic awaŋa ma kisi ndelo kanyacel gi mic ma vini mere.
Mic ma ndelo marapena ma dwe
11Kisi ka dwe manyen cako, wiripo miyo Rwoth mic awaŋa ma rwath ario, wod rombo acel, kodi wot rombo abirio ma jo oro acel ma jongoye gi ŋolo. 12Wiripo bende miyo paka mic ma cemo moko m'onywow gi mo oliv ri kisi rwath, kilo adek ma moko, ri wod rombo kilo ario ma moko, 13aka ri kisi nyathi rombo ma jaoro acel, kilo acel ma moko. Mic awaŋa me obedo mic ma cemo, ma ŋwece kur mere sangala Rwoth. 14Mic ma vini labedo lita ario ri kisi rwath, lita acel g'adec ri wod rombo, kodi lita acel ri kisi wod rombo ma jaoro acel. Me cik ri mic awaŋa ri kisi ndelo marapena ma dwe ma oro gipi. 15Wiripo bende miyo wod diel ri Rwoth paka mic ma cwako reco medo i wi mic awaŋa ma kisi ndelo kodi mic ma vini mere.
Mic ma Kalima ma Kadho
16 #
Wok 12:1-13; Cik 16:1-2 K'apar g'aŋwen ma ndelo marapena wiripo miyo Rwoth mic ma Kalima ma Kadho. 17#Wok 12:14-20; 23:15; 34:18; Cik 16:3-8K'apar g'abic ma dwe ripo bedo kalima ma tero ndelo abirio ma wiripo camo mugat ma buthow. 18I ndelo marapena ma kalima wiripo cokere kanyacel lamo, aka wikiripi timo tic. 19Wiripo miyo mic awaŋa paka mic ma cemo ri Rwoth. Rwath ario, wod rombo kodi wot rombo abirio ma jo oro acel. Neni win nike jongoye gi ŋolo. 20Mic ma cemo labedo moko m'onywow gi mo oliv. Kilo adek ri kisi rwath, kilo ario ri wod rombo, 21kodi kilo acel ri kisi wod rombo ma jaoro acel. 22Wiripo bende miyo wod diel acel paka mic ma cwako reco, ma cwako reco pa ji. 23Wiripo miyo gigipiny me medo i wi mic awaŋa ma kisi ndelo odikin 24I nger acel wiripo miyo Rwoth mic ma cemo kisi ndelo, ma ndelo abirio, ma ŋwece kur mere sangala go. Wimiy gime medo kwoŋ mic awaŋa ma kisi ndelo kodi mic ma vini. 25I ndelo mar'abirio, wiripo cokere kanyacel lamo, aka wikiripi timo tic.
Mic ma kalima ma keco
(Jolevi 23:15-22)
26 #
Wok 23:16; 34:22; Cik 16:9-12 I ndelo marapena ma keco, ka wimiyo Rwoth mic ma cemo manyen i Kalima ma Keco, wiripo cokere kanyacel lamo, aka wikiripi timo tic. 27Wiripo miyo Rwoth mic awaŋa, ma ŋwece kur mere sangala go. Rwath ario, wod rombo kodi wot rombo abirio ma jo oro acel. 28Mic ma cemo mere ripo bedo moko m'onywow gi mo oliv, kilo adek ri kisi rwath, kilo ario ri wod rombo, 29kodi kilo acel ri kisi wod rombo ma jaoro acel. 30Wiripo bende miyo wod diel paka mic ma cwako reco, ma cwako reco pa ji. 31Wiripo miyo gigipiny me kodi mic ma vini medo i wi mic awaŋa ma kisi ndelo kodi mic ma cemo. Joripo bedo ma jongoye gi ŋolo.
Currently Selected:
Kwan 28: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
