Kwan 22
22
Kere ma Mowab lwoŋo Balam
1Joisiraili joay, aka joketho kambi i thim ma Mowab i thenge ma yuwok ceŋ ma Yordan ma ŋiyere gi Yeriko. 2Onyo Balak wod pa Zipor oneno kisi gimoro ma Joisiraili jotimo ri Joamor. 3Mowab obwok swa ri Joisiraili, aka oyido opoŋ gi lworo madwoŋ swa ri Joisiraili. 4Jomowab jowaco ri jodongo ma Midian ni, “Jome jolanaŋo woko kisi gim'othoko wan, paka dhiaŋ naŋo woko lum i samba.” Onyo Balak wod pa Zipor am'oyido obedo kere ma Mowab i hongo no. 5#Kwan 31:8; 2 Pet 2:15-16; Yud 1:11Balak ooro wolwoŋi Balam wod pa Bewor i Pethor, manitie i Yufrete, i lowo pa Amaw ka waco ni, “Nono moro obino wok i Misir, aka ji mere joywore kisi kamoro i lowo, aka jobedo cegin kodan. 6Riameno, mondo biye lam ran ji me, paka jotek loyan, poyi alanyalo kikengila jo t'ariemo woko jo i lowo. Kole an aŋeyo nike ŋat'imiyo silwany bedo jasilwany, aka ŋat'ikwoŋo bedo ŋat'olam.”
7Ameno jodongo ma Mowab kodi jodongo ma Midian joay gi pesa ma thieth i cingi jo, aka jobino bongi Balam to jowaco rigo mikwenda pa Balak. 8Balam odwoko jo ni, “Nindi win ka wor me, aka dikin, alamiyo win radwok paka Rwoth owaci ran.” Ameno jodongo ma Mowab jodoŋ bongi Balam. 9Were obino bongi Balam, aka openjo go ni, “Me cwo mene ma jonitie bongin?” 10Balam odwoko Were ni, “Balak wod pa Zipor kere ma Mowab ooro jo bongan ka waco ni, 11‘Nitie ka ji ma jobino wok i Misir, aka joywore kisi kamoro i lowo. Onyo biye ikwoŋ ran jo, poyi alanyalo lweny gi jo t'ariemo woko jo.’ ”
12Were owaco ri Balam ni, “Ikiripi kadho gi jo, aka ikir'ikwoŋ jono, kole jobedo josilwany.”
13Ameno Balam ocew odikin aka owaco ri jodongo ma Mowab ni, “Gik win i piny mewin, kole Rwoth k'oyeyan kadho gi win.” 14Ameno jodongo ma Mowab joay to jogik bongi Balak to jowaco rigo ni, “Balam okwero dwoko gi wan.”
15Balak ooro kendo jodongo kweth aka m'iworo loyo. 16Jobino bongi Balam to jowaco rigo ni, “Me apaka Balak wod pa Zipor waco, ‘Mondo ikir'iyey gimoro wogeŋin bino bongan, 17adieri alamiyin kemba madwoŋ, aka alatimo gim'inowaci ran je. Biye kwoŋ ran ji me.’ ”
18Balam odwoko ka waco ri ŋecin pa Balak ni, “Makada nende oyido Balak miyan ot pere m'opoŋ gi feza gi zahabu, oyido akinyali timo gima kalo ma dhok Rwoth Were paran otieko waco, timo gimathin kosa madwoŋ. 19Onyo mondo doŋ win ka wor me, paka jonica jotimo, ŋey anyal ŋeyo giman ma Rwoth nyalo waco ran.”
20Wor no Were obino bongi Balam to waco rigo ni, “K'inen cwo me jobino lwoŋin, ay ikadhi gi jo, to nyaka wac m'anowaci rin, meno am'inotim.” 21Ameno Balam oay odikin, otweyo punde pere, to kadho gi jodongo ma Mowab.
Balam, punda kodi malaika
22Nge pa Were oliel kwoŋbedo Balam oyido kadho, aka malaika pa Rwoth ocungo i royo paka jakwor pa Balam. Onyo Balam oyido gweyo punda gi ŋecin pere ario. 23Munyo punda oneno malaika ocungo i royo, g'abor i cinge, punda orwayo wok i royo to rwayo i dudi. Balam ogoyo punda wodwoki i royo. 24Kenyo malaika pa Rwoth ocungo i royo madiny i dier ndelin vini, gi kor ot i kisi thenge. 25Munyo punda oneno malaika pa Rwoth, oroc kwoŋ kor ot, to diyo tiendi Balam kwoŋ kor ot; aka Balam ogoyo punda kendo. 26Malaika pa Rwoth okadho yuwiye, to cungo kamadiny, m'ongoye kaluwo i kisi thenge racuc kodi racam. 27Munyo punda oneno malaika pa Rwoth, onindo piny i ŋangi Balam. Balam omako nge, to goyo punda gi luth pere. 28Kenyo Rwoth oyawo dhok punda to penjo Balam ni, “Aŋo m'atimo rin, m'igoyan didek me je?”
29Balam odwoko punda ni, “Kwoŋbedo itieko miŋan! Aka ka bedi oyido anitie g'abor i cingan, dinyo anekin pama me!”
30Punda owaco ri Balam ni, “Akibedo punda perin, m'itieko gweyo i kwo perin je tundo konon? Amaro terin ama?”
Balam odwoko ni, “Be.”
31Kenyo Rwoth oyawo waŋ Balam to neno malaika pa Rwoth ocungo i royo, g'abor i cinge, aka Balam okule piny, to podho gi nyime. 32Malaika openjo Balam ni, “Raŋo igoyo punda perin didek me je? Atieko bino paka jakwor, kwoŋbedo yo perin okom ruwaŋan. 33Punda onenan, aka owire kwoŋan didek. Kabedi k'owire kwoŋan, adieri pama dinyo anekin t'aweyo punda wokwo.”
34Kenyo Balam owaco ri malaika pa Rwoth ni, “Atieko timo reco, kole oyido akiŋeyo nike oyido icungo i royo geŋan. Onyo riameno, k'inen k'osangala in, aladok peco.” 35Malaika pa Rwoth odwoko Balam ni, “Kadhi gi cwo no, to luw nyaka gim'anowaci rin.” Ameno Balam omedere gi jodhum pa Balak.
Balak jolo Balam
36Munyo Balak owinjo nike Balam obino, owok romo gi go i Ar, tindi madwoŋ i malawa Arinon i kew gi Mowab. 37Balak openjo Balam ni, “Raŋo ikibino munyo alwoŋin marapena? Oyido iparo nike akinyal miyin kemba?”
38Balam odwoko Balak ni, “Atieko bino bongin pama, to anitie kune gi meni ma waco kada gimoro? Wac ma Rwoth okethi i dhokan, meno ama alawaco.” 39Ameno Balam okadho gi Balak, to jotundo i Kiriath Huzoth, 40kama Balak othum'iye dhiaŋ kodi rombo to miyo riŋo ri Balam kodi jodongo m'oyido jonitie gi go.
Balam tuco wac Were marapena
41Yawere mere odikin Balak otero Balam to kelo go malo i Bamoth Bal, kama Balam oyido nyalo neno adec moro pa Joisiraili.
Currently Selected:
Kwan 22: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
