Yohana 3
3
Yesu kodi Nikodemo
1Nitie nyatoro ma nyinge Nikodemo, jatel pa Joyuda, m'obedo Jafarisayo. 2Ŋato obino bongi Yesu Wor acel to waco rigo ni, “Jafonji, waŋeyo paka ibedo jafonji ma Were am'ooro. Ongoye ŋata nyalo timo gir'aura m'itimo kwanyo woko ka Were nitie gine.” 3Yesu odwoko ni, “Adieri awaco rin, ongoye ŋata nyalo neno Ker pa Were kwanyo woko k'onywole madirio.” 4Nikodemo openjo ni, “Nyalere nedi ŋat'otieko dwoŋ nywolirok kendo? Kole go kinyal donjo i iy min kendo ŋey wonywol go madirio!” 5Yesu odwoko ni, “Adieri awaco rin, ongoye ŋata nyalo donjo i Ker pa Were kwanyo woko ka olimo nywolirok ma pi kodi ma Cuny. 6Gima del onywolo bedo ma del, aka gima Cuny onywolo bende bedo ma cuny. 7Ikir'ibedi gi dhier ni awaco rin ni, ‘Iripo nywolirok madirio!’ 8Kole koyo kudho yuthenge m'omito je; wiwinjo derino mere, to wikiŋey kam'owok'iye kosa kama com'iye.” Meno bende apaka ŋat'onywol ma cuny cale. 9To Nikodemo omedo openjo ni, “Gime nyalere nedi?” 10Yesu odwoko ni, “In i jafonji madwoŋ ma Isiraili gipi, am'ikuya gime? 11Adieri awaco rin, waluwo gima waŋeyo, aka wawaco gima watieko neno to ongoye moro kwoŋ win ma yeyo jolo mikwenda mawan. 12K'inen wikiyey k'awaco riwin gigipiny ma piny ka; onyo winonyali nedi yeyo k'awaco riwin gigipiny ma polo? 13Aka ongoye moro m'otieko kidho i polo kwanyo woko Wod Dhano m'obino i piny wok i polo.”
14 #
Kwan 21:9
“Aka paka Musa oŋawo thwol ma nyweny wi yath moro i thim, apaka bende ibino ŋawo Wod Dhano malo. 15Ameno nyaka dhano je ma yeyo go bino bedo gi kwo makirum. 16Kole Were omaro piny tektek to miyo Wode acel g'acel, ni nyatoro je ma yeyo go wokiri wotho to wobedi gi kwo makirum. 17Ato Were k'ooro Wode i piny ka nike wothum ri piny banja, to ni piny wonyali limo both kwoŋ go ayino. 18Ongoye moro je ma yeyo Wod Were m'ibino thumo rigo banja, to moro je ma kiyey ama otiek thumo rigo banja ni oloyo go con kwoŋbedo k'oketho yeyo i nyingi Wod Were acel kende. 19Me apaka thumo banja bedo: Lero obino i piny to ji jomaro mudho ayino kapa lero, rupiri jotimo gigipiny mareco. 20Aka moro je ma timo gigipiny mareco meno odak lero aka kibin kama dilero, rupiri kimiti ni tim pere mareco wonyuthere kamaler. 21To ŋata timo gim'otire bino kama dilero, ŋey lero wonyuthi nike go otimo tic pere munyo winjo Were.”
Yesu kodi Yohana
22Rumacen Yesu kodi jofonjirok pere jokidho iy'adec ma Yuda to cowo kenyo hongo moro gi jo munyo batisa ji. 23Yohana oyido bende batisa ji i Ayenon, cegin gi Salim, rupiri pi oyido nitie kenyo kweth. Ji oyido jokidho bonge hongo je wobatisa jo. 24(Gime otimere mafodi k'otwey Yohana.)
25Jofonjirok pa Yohana megi jocako piem kodi Jayuda moro kwoŋ lonyo manyadini. 26Gikenyo jobino bongi Yohana to jowaco rigo ni, “Jafonji, dhano m'oyido nitie kodin loka meca ma Yordan m'iluwo kwoŋe, pama batisa ji aka dhano je onyo kidho bonge!” 27Yohana odwoko ni, “Ongoye dhano manyalo bedo gi gimoro kwanyo woko ka Were am'omiyo go. 28#Yoh 1:20Wiwegi wibedo jokony paran, ni awaco ni, aŋat'akibedo Kristo, to ooran telo yuwiye ayin.”
29“Jamweha ama mweha bedo apere; jakony pa jamweha cungo ruŋete to ciko ithe wowinji gima timere, aka go sangala swa k'owinjo dwondi jamweha. Meno bende apaka kisangala paran onyo oromo. 30Go ripo medo ŋeyirok kareno ŋeyirok paran mojere woko.”
Ŋata wok malo i polo
31Ŋata wok malo i polo ama loyo ji je; ŋata wok i piny ka meno dhano ma piny ka, aka luwo kwoŋ gigipiny ma piny ka. To ŋata wok i polo loyo ji je. 32Go luwo kwoŋ gima go otieko neno gi winjo, to ongoye ŋata jolo mikwenda pere. 33To ŋat'otieko jolo mikwenda pere otieko niaŋo ji gi ranen nike Were obedo jar'adieri. 34Ŋata Were ooro, luwo wac pa Were, rupiri Were miyo go Cuny Maleŋ m'opoŋ ma k'obuyo. 35#Mat 11:27; Luk 10:22Were Baba omaro Wode aka oketho gimoro je i cingi go. 36Ŋata yeyo Wode nitie gi kwo makirum; ŋata kiwinji Wode k'olimi kwo, to keme pa Were ama bino tundo rigo.
Currently Selected:
Yohana 3: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.