Matayo 2
2
Wendo ma jowok yuwok ceŋ
1Munyo otiek nywolo Yesu i tindi ma Bethelehem, i Yuda i ndir ma Herode oyido kere, jorieko moro ma jofonjere kwoŋ micalin jowok yuwok ceŋ to jobino Yerusalem; 2aka jopenjo ni, “Nikune nyathi m'onywol bedo kere pa Joyuda? Waneno micala pere munyo owok yuwok ceŋ am'omiyo onyo wabino lamo go.” 3Munyo Kere Herode owinjo gime, obwok, aka kiri gi ji man je i Yerusalem. 4Go olwoŋo jotel pa jocway ri Were i wi migam je kodi jondiko kanyacel to penjo jo ni, “Ibino nywolo Kristo kune?” 5Jodwoko ni, “I tindi ma Bethelehem, i Yuda.” Me a gima jatuci wac Were ondiko ni,
6 #
Mika 5:1
“In Bethelehem, i piny pa Yuda,
iŋat'ikithin loyo i dier jodhum ma Yuda;
kole kwoŋin ama jatel bino wok'iye,
ma bino bedo jakwath pa Joisiraili.”
7Gikenyo Herode olwoŋo wendo ma jowok yuwok ceŋ no i romo manyaliŋliŋ, aka oŋeyo kwoŋ jo ndir won ma micala no omenyer'iye rijo. 8Gikenyo ooro jo Bethelehem gi wac me: “Kidhi win wirangi kama di nyathi no maber aka ka winwaŋo go wimiyan ŋeyo, ŋey abende abin alam go.” 9Gi wac me joeye kenyo, aka munyo oyido jowotho i royo, joneno micala ma ndir ca joneno yuwok ceŋ, m'otelo jo cuka otundo to cungo kama nyathi no oyido niye. 10Josangala swa, kendo jowinjo maber m'oasere munyo joneno micala no! 11Jodonjo i ot to joneno nyathi bongi Maria yokimere. Joguro congi gin piny jolamo go, to joyawo migowe pajo, to jocwayo mic: Zahabu, buban, kodi mo maŋwe kur.
12Were onyutho jo i lek nike jokiri jogik kendo pa Herode, riameno jodok yupiny pajo gi royo man.
Ringo i piny Misir
13Munyo jotieko kadho, malaika pa Rwoth omenyere ri Yozefu i lek munyo waco ni, “Ay malo ikwany nyathi gi yokimere wiringi i piny Misir, aka wibedi koro cuka anowaci riwin ndir ma dwoko. Herode larango nyathi no munyo mito neko.” 14Am'omiyo Yozefu oay malo okwanyo nyathi gi yokimere, to joay wor kidho yu Misir, 15#Hos 11:1kama go obed'iye cuka Herode otho. Meno omiyo gima jatuci wac Were owaco con otundo i kare ni, “Alwoŋo wodan wok Misir.”
Neko nyithindho maŋic
16Munyo Herode oneno ni jorieko ma jowok yuwok ceŋ jothumo rigo rieko, keme omako go to wodho or nike woneki woko nyithindho mayac je ma joromo oro ario gik cen, i Bethelehem kodi loka m'othenere gine. Otimo gino je cungo kwoŋ gima go oyido otieko ŋeyo kwoŋ ndir ma go openj'iye jorieko ca kwoŋ menyirok pa micala.
17Ameno gima Yeremia jatuci wac Were owaco otundo i kare ni,
18 #
Yer 31:15
“Derino winjere yu Rama,
derino ma ywak malith gi ndur.
Laker ywako nyithindho pere.
Kiyey wokwey cunye,
rupiri ongoye m'odoŋ.”
Dwoko wok Misir
19Munyo Herode otieko tho, malaika pa Rwoth omenyere ri Yozefu i lek yu Misir; 20aka owaco ni, “Ay malo ikwany nyathi gi yokimere widoki i piny Isiraili rupiri jom'oyido jorango neko go jotieko tho.” 21Am'omiyo Yozefu oay malo, okwanyo nyathi gi yokimere to jodok Isiraili.
22Munyo Yozefu owinjo ni Akelayo am'olunjo kom pa bamere Herode paka kere ma Yuda, lworo omako go dok kendo kenyo. Were omedo menyo rigo i lek, am'omiyo go okidho iy'adec ma Galili, 23#Mar 1:24; Luk 2:39; Yoh 1:45to gero peco pere i tindi ma Nazareth. Go otimo ameno ma miyo gima jatuci wac Were owaco wotundi ni, “Ibino lwoŋo go ni Janazareth.”
Currently Selected:
Matayo 2: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.