Wok 39

Timo ruk pa jocway ri Were i wi migam

1Jokwoyo ruk pa jocway ri Were i wi migam gi yer rombo manyabululu, manyarangi ariŋo kodi m'obokere ma ruko ka jotiyo i Kabedo Maleŋ. Jokwoyo ri Aron paka Rwoth oyido omiyo Musa or.

2Jokwoyo law pa jocway ri Were i wi migam gi nanga mafoth; yer rombo manyabululu, manyarangi ariŋo, m'obokere kodi uzi ma rangi ma zahabu. 3Jocadho boke ma zahabu aka joŋado i uzi tic gine i yer rombo manyabululu, manyarangi ariŋo kodi m'obokere. 4Jotimo thondhe ario ma goki jo ri law pa jocway ri Were aka jokwoyo i bute ŋey wonyali tweyo. 5Thol m'okwoy maŋon gi gimoro acel oriw i law pa jocway ri Were i wi migam ŋey jowobedi acel gine, paka Rwoth oyido omiyo Musa or. 6Joyiko telin m'ilwoŋo ni onys aka jojengo i zahabu m'ocan; oyido ogor'iye nyingi wot Yakobo apar g'ario. 7Okethi jo i thol ma goki law pa jocway ri Were i wi migam cungo ri nonin apar g'ario ma Isiraili, paka Rwoth oyido omiyo Musa or.

Mugowa ma ketho giŋeyo mito pa Were

8Jotimo mugowa ma ketho giŋeyo mito pa Were gi ndijo paka ma law pa jocway ri Were i wi migam gi yer rombo manyabululu, ariŋo, m'obokere kodi nanga mafoth m'okwoy. 9Oyido thenge je rom aka odol kadirio, boro mere inci abuŋwen aka laco mere inci abuŋwen. 10Jocano bol aŋwen ma telin ma welo i iye. I bol marapena jocano tele m'obokere, tele manyatongweno, kodi tele manyarangi aremo. 11I bol mar'ario jocano tele manyarangi nam, tele manyabululu kodi diamondi. 12I bol mar'adek jocano tele m'obokere ma nyamicungwa, tele m'oruwo rangi matar g'akwaro, kodi tele manyarangi ariŋo. 13Aka i bol mar'aŋwen jocano telin manyarangi nam, tele m'obokere, kodi tele manyaboke pendi. Ocan jo i miango ma zahabu. 14Kisi tele kwoŋ telin apar g'ario me oyido ogor'iye nyingi wot Yakobo acel paka jonywole ŋey jowocungi ri nonin apar g'ario ma Isiraili. 15Ri mugowa ma ketho giŋeyo mito pa Were jotimo lijegere gi zahabu macil m'otudi p'adasa. 16Jotimo miangin ario gi petin ario aka joriwo petin ario i kisi sonda ario ma malo ma mugowa ma ketho giŋeyo mito pa Were. 17Jotweyo adasin ario ma zahabu m'otudi i petin ario, 18aka jotweyo gike ario man mar'adasin i miangin ario aka i nger me joriwo yuwaŋe i thondhe ma goki law pa jocway ri Were i wi migam. 19Jotimo petin ario gi zahabu aka joriwo i kisi sonda ario ma piny ma mugowa m'iketh'iye giŋeyo mito pa Were, i gike ma iye cegin gi law pa jocway ri Were i wi migam. 20Jotimo petin ario man gi zahabu to joriwo piny yuwaŋ thondhe ario ma law pa jocway ri Were i wi migam, cegin gi bwombe kodi i wi del m'okwoy. 21Jotweyo petin ma mugowa ma ketho giŋeyo mito pa Were i petin ma law pa jocway ri Were i wi migam g'adasa manyabululu, ŋey mugowa ma ketho giŋeyo mito pa Were wobedi malo aka del wokiri wolwogere paka Rwoth oyido omiyo Musa or.

Timo ruk pa jocway ri Were i wi migam man

22Kanzu m'iruko piny ma law pa jocway ri Were i wi migam otim gi yer rombo manyabululu kende. 23Hoŋ m'irwak'iye wi jo oridhi gi waya m'otudi ma cero go yec. 24Thoko rinda ma kanzu jokwoyo cal ma pomo gi yer rombo manyabululu, manyarangi ariŋo, m'obokere, kodi nanga mafoth. 25Jotimo bende olaŋere gi zahabu mangil aka joketho i dier cal ma pomo thoko. 26Kisi olaŋ oluwere gi cal ma pomo thoko rinda ma kanzu ma tic paka Rwoth oyido omiyo Musa or.

27Jotimo satere ri Aron gi wote, 28jungin, palere ma nanga mafoth, 29thol ma pier jo ma nanga mafoth kodi yer rombo manyabululu, manyarangi ariŋo kodi m'obokere m'okwoy paka Rwoth oyido omiyo Musa or. 30Aka jotimo sen ma sangaria maleŋ gi zahabu ngil, aka jondik'iye ni, “Leŋo ri Rwoth.” 31Jotweyo i junga g'adasa manyabululu paka Rwoth omiyo Musa or.

Cowo tic

32Ameno tic je ma Wema Maleŋ orumo. Joisiraili jotimo kisi gimoro paka Rwoth oyido omiyo Musa or. 33Jokelo bongi Musa Wema gi gigipiny mere, siragetere mere, miangin mere, yen ariwa mere, asu mere gi pende je. 34Giumo ma yer rombo m'owir m'obokere, giumo ma yer diel kodi nangin ma liero. 35Kakan ma Cikirok m'oketh'iye telin mapando ario, gute mere kodi giumo. 36Meza gi gigipiny mere kodi mugat maleŋ m'imiyo Were. 37Raŋaw tala ma zahabu mangil, talin mere gi gigipiny mere je, kodi mo ma talin. 38Migam ma zahabu, mo ma wiro, buban maŋwe kur kodi nangin ma liero i dhiot ma Wema. 39Migam ma ywel gi kicungwo mere ma ywel, gute gi gigipiny mere je kodi kalaya ma lwok gi pende je. 40Nangin ma liero ma diedipo, gute mere kodi pende je, nanga ma liero i waŋkac ma diedipo gi thondhe mere, loce ma Wema kodi gigipiny ma oro i Wema je. 41Ruk m'otimi mafoth ma jocway ri Were i wi migam joruko i Kabedo Maleŋ nangin maleŋ ri Aron jacway ri Were i wi migam gi wote. 42Joisiraili oyido jotimo tic je paka Rwoth owodho or ri Musa. 43Musa okaŋasa kisi gimoro aka oneno ni oyido jotimo je paka Rwoth oyido owodho or. Ameno omiyo jo silwany.

Currently Selected:

Wok 39: DHOCDC

Highlight

Copy