Kaabka 27
27
1Naawen yaa weeni Moosis ayen, 2<<Biisi te Izirali demma a weeni ba ayen, <Waai a dan puulim ayen wa pai nuruba a te Naawen a yaa te ŋanta a magsi nuruma, 3nidoa ale zaani bena pisiye a ta cheŋ bena pisiyuebi a chiim kpana ligra pisinu, a magsi chaab ale Tuka Viuku ligraŋa. 4Be dan ka nipok wa ligraŋa a chim pisita. 5Be dan ka waai ale zaani bena ŋanu a ta cheŋ bena pisiye, nidoa ligraŋa a chim ligra pisiye abe nipok a chim ligra pi. 6Be dan ka waai ale zaani chi yeŋ a ta a cheŋ bena ŋanu, ni basi ate nidoa ligra a chim kpana ligra ŋanu, abe nipok a chim kpana ligra ŋata. 7Dan ka waai ale nye se bena pisiyuebi yaase ŋa gaam di, nidoa ligraŋa a chim kpana ligra pi ale ŋanu abe nipok a chim kpana ligra pi. 8Ase waai ale puulim la a dan wobsa an baga a tuni ligra ŋaai ate ba dak la, wa pai nuruwa a sak kaabteerɔwa ate kaabteerɔwa yaa dak dii ate waai ale puulim la a baga a tuni.
9<< <Wa le puulim jabuui la dan ka duŋ ate ka magsi ase tiirim la a te Naawen, duŋ kala ate ba te Naawen la a ta tuilum kama. 10Wa kan pai duŋ naliŋ a tagri kaai ale kan nala yaase kaai ale kan nala a tagri kaai ale nala. Wa be dan pai duŋ a tagri ka choa, kala ale kaai ate wa pai tagri la ta tuilum kama. 11Jaabuui ate wa puulim la a dan daŋ, kaai ale kan magsi tiirim a te Naawen la, ba pai duŋka a te kaabteerɔwa, 12wa le nya ase ka nala yaase ka an nala. Ka le ka dii meena ate kaabteerɔwa a weeni la ka ka dila. 13Ka nyɔnɔwa a daa yaali ayen wa da tuesi duŋka, wa gum ka le ka diila ku po bunu du.
14<< <Nuru a dan pai wa yeri ase tuilum yeri la a te Naawen, kaabteerɔwa ale wa nya di nalimu ase di nala yaase di an nala. Kaabteerɔwa ale a weeni ayen di ka diila di ka dila. 15Nuru waai ale pai yenni te la a dan da tuesi di wa gum di le ka diila ku po bunu du, ate yenni a ŋman chim wa yeri.
16<< <Nuru waai a dan pai wa dɔkdem tɛŋ gela a te Naawen, di ale ka diila a magsi chaab ale ŋanbuura dii ale a magsi ka la. Kpana ligra pisinu a ga paari barli boorik. 17Wa dan pai wa tɛŋka a te ka Ŋmanpateka Beinni ba le dak di diila di ka dila. 18Alege wa dan pai tɛŋka a te ka Ŋmanpateka Beinni ŋaaŋnyiŋ, kaabteerɔwa ale wa nya ka le ka diila a magsi chaab ale bena dii ale tali ate ku ŋman paari Ŋmanpateka Beinni la, ate ka le ka diila wa yeeri a basi. 19Nuru waai ale pai tɛŋka a te la a daa yaali ayen wa da tuesi ka, wa gum ka le ka diila ku po bunu ate tɛŋka a ŋman chim wa tɛŋ. 20Ku be dan ka dii ate wa an baga a da tuesi tɛŋka, yaase wa pai da te waai, wa an baga a da a tuesi. 21Ba dan basi tɛŋka Ŋmanpateka Beinni, ka a chim ka tuilum tɛŋ, ase tɛŋ kaai ate ba pai a te Naawen la. Ka kaabteerɔma ale soa.
22<< <Ase nuru waai a dan pai tɛŋ kaai ate wa da a te Naawen alege ka daa wa dɔkdem tɛŋ po, 23Kaabteerɔwa ale nya ka le ka dii a ga paari Ŋmanpateka Beinni la, ate nuruwa a tuni ka le ka diila dai dila danni ase jabuui ale ta tuilum la a te Naawen. 24Ŋmanpateka Beinni tɛŋka a ŋman cheŋ waai jigi ate wa da la. 25Jaab meena diak a dak a magsi ka Tuka Viuku ligraŋa. Ligbieŋa dobrimu a chim ka magsika dobrim pisiye.
26<< <Waai a kan pai duŋ kaai ate wa duŋ a liŋ biagi a te Naawen, diila sila Naawen ale poom soa. Ka naab yaase posuk yoo ka Naawen ale soa. 27Ka dan ka duŋ kaai ale daŋ, ka le ka diila wa da tuesi a magsi ka diaka ale ka diila. Wa gum ka le ka diila ku po bunu du. Wa dan kan da tuesi ya, ba pai ka da a magsi ka diaka ale ka diila.
28<< <Alege jabuui ate nuru a soa ale pai te Naawen la, nuru yaase duŋ yaase dɔkdem tɛŋ ba baga a pai a da kama yaase ba da tuesi. Jaabuui ate ba pai te la a ta tuilum kama a te Naawen.
29<< <Nuru waai ale pai wadek a te kaasuŋ la, ba kan tuni tuesi wa. Ku a fɛ ate ba ko wa.
30<< <Jaab meena ale a nyini tɛŋ a bɛ la ŋan bie yaase tiisa yɔna, piika ka Naawen ale soa. Ku ta tuilum kama a te Naawen. 31Nuru waai a daa yaali ayen wa da tuesi wa piika, ku a fɛ ate wa gum ku po bunu. 32Piisaŋa ale duŋsa piika, duŋ kaai meena ate naapeerika a nya ale doari la a ta tuilum kama a te Naawen. 33Wa kan yeeri ja maŋ ŋan baata po yaase wa tagri. Wa be dan tagri, duŋka ale kaai ate wa tagri la meena a ta tuilum kama. Wa an baga a da a tuesi.> >>
34Sinsaŋŋa ale nna ate Naawen a te Moosis Sinai Guuku zuk a magsi Izirali demma.
Currently Selected:
Kaabka 27: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
