Kaabka 25

1Naawen yaa weeni Moosis Sinai Guuku zuk ayen, 2<<Weeni Izirali demma ayen ba dan jo tɛŋ kaai ate mi ayen m te ba la, tɛŋka dek a duak a vuusi. 3<Ni bori ni laŋka bena ŋayuebi a che ni ŋantaŋa abe ni yɔrisi kadukka tiisaŋa. 4Alege bein dii ale a saari ŋayopɔi la, tɛŋka duak vuusi, Vuusum bein a te Naawen, ni kan bori laŋka yaase ni yɔrisi kadukka tiisaŋa. 5Ni kan che yaase ni ŋari ŋan baai ate ni an bori ya yaase ni gbesi ti sii yɔna ate ni an vuk ya. Tɛŋka a duak bein dila a vuusi. 6Bein dii ale a saari ŋayopɔiwa la ka Vuusum bein, ate ŋandiin tii ale a nyini badek a bɛ la nama dek ale soa, ale ni yɔmma, ale tuimtomdisaŋa ale baai ale kan bo le ni a beni la, 7ale ni yeri duŋsaŋa ale gɔi duŋsaŋa. Jaabuui meena ale a bɛ tɛŋka zuk ni baga a dɛ kama.

8<< <Chiini Vuusum bena ŋayopɔi naŋtuok nɔi buyopɔi ate ŋa meena nye se Vuusum bena pisinaansi ale neok la. 9Vuusum bena pisinaansi ale neokku po chiisa siyopɔiwa po ka daa pi dai basi ate ba peeri damunsa jigi meena. Vɔŋteka juisika dai ale la, ba peeri damunsaŋa tɛŋka meena. 10Bein dii ale a saari pisinu la, ni gaari bein dila a te mu. Ni mooli varibasika a te waai meena tɛŋka meena. Ka Ŋmanpateka Bein ate waai meena a ŋman tuesi wa ŋanta abe yɔm pilim ŋman ba dɔkdem jigi. 11Bein dii ale a saari pisinu la, ka Ŋmanpateka Bein a te ni. Ni kan bori, ni be kan che yaa ni ŋari ŋan baai ale nyini badek la, yaase tiisaŋa yɔna. 12Ka Ŋmanpateka Bein a te ni, di be ka tuilum bein a te ni. Ni dɛ ŋan baai nyiini ate ni a che yaa ni a ŋari ni tattaŋa po la.

13<< <Ŋmanpateka Bein jaab meena pilim cheŋ wa nyɔnɔwa jigi.

14<< <Waai a dan pai tɛŋ a da a te waai yaase wa da tɛŋ nyini waai jigi, ni kan nye yam gebi chaaba. 15Da tɛŋka fi tɛŋka denɔwa jigi a magsi chaab ale Ŋmanpateka Beinni a jam paari diipo ate fi a da la. Wa da te fu a magsi chaab ale bena dii ale tali ate ku paari cheka yaase ŋarika la. 16Benaŋa a dan piisi, dak ligraŋa a zuak, alege benaŋa a dan kan piisi ya kan dak zuak, dii nyiŋla wa le pai dii a da a te fu la ka ŋantaŋa ale soa dii du la. 17Ni kan nye yam a gebi chaab ŋanta. Ni a chali ni Wenni. Mi ale Naawen ni Wenni.

18<< <Ni va m ŋmarisika abe ni kpesi a chali m buusaŋa ate ni bo tɛŋka po nalimnyiini. 19Ate tɛŋka a nye ŋandiinta ate ni dɛ a chak abe ni bo du nalimnyiini. 20Ni le bek ayen, <<Ti ti dɛ ka boa bena ŋayopɔiwa po ase ti nin kan bori yaase ti che ŋanta?>> 21M le basi ate niauŋ a jam ate bena ŋayuebiwa po ŋantaŋa a nye yega a magsi bena ŋata dɛka. 22Ni dan boro a bori bena naanika po, ni le diem a dɛ ka ŋandiin kpaksaŋa. Ni be ni kasim a dɛ ka bala ate ni ga che bena neokku po ŋantaŋa.

23<< <Ni kan deri pai tɛŋka a da ate ka ŋman ka tuesika, dii nyiŋla tɛŋka ka mi ale soa. Ni ka nicham ka po, ni an soa ka. 24Ni dan pai jaab a boro a da ni te waai ale liŋ soa jaamu la suik ate wade niŋ a da.

25<< <Ni tɛŋka waai a dan jaŋ a pai wa ŋantaŋa gela a da, wa mabiik kaai ale moata wa a jam a da tuesi. 26Wa dan kan ta waai ate wa a da ate wadek a jam nya a tara wa ŋman da. 27Wa nya jaamu tuilum ale ka dii a magsi bena diila a yaa tuni saari a te waai ate wa pai da te la, a yaa pilim tuesi. 28Alege wa dan kan baga a nya ŋanta a tuni a tuesi wa le pai jabuui da te la a wari ka nuruwa jigi a paari Ŋmanpateka Beinni. Ŋmanpateka Beinni ŋaaŋnyiŋ wa le ta ŋmani ate wa yaa ga tuesi.

29<< <Fi yeri dan bo tɛŋka po ate parik a gilim tɛŋka, ate fi pai yenni a da, fi ta ka bein yeŋ dekki ate fi pilim tuesi di. 30Wa dan kan baga a ŋman tuesi alege ate beinni a nueri, yenni ale bo tɛŋka po ate parisa a gilim ka waai ale da la ale wa bisa ale kasim soa di. Ŋanta Ŋmanpateka Beinni wa kan ta ŋmani. 31Alege yie ŋaai ale bo tɛŋ kpaŋsa ate parisa an gilim la, ni nya ase ka tɛŋ kaai ale lak doa. Ba ŋman baga a tuesi kama. Se ba ta cheŋ Ŋmanpateka Beinni.

32<< <Livaima a kasim ta suik kama a da a tuesi ba yeeŋa Livai tɛŋsaŋa po, ate ba soa la. 33Livaima ale soa ŋan baai la, ba ŋman baga a da kama. Yie dii ate ba pai a da tɛŋ kaai po ate ba ta la, ba ŋman pai yenni a te Ŋmanpateka Beinni, dii nyiŋla yeeŋa ale bo Livaima tɛŋsaŋa la ka ba ale soa Izirali demma po. 34Alege tɛŋ sii ale ta wuuk ate ba tɛŋsaŋa a soa la, ba kan pai da, ka ba ale kasim soa dula.

35<< <Ni tɛŋka nuru waai a dan wobsa an baga a maari wa dega a bo le ni, ni maari wa ase ni le a maari nichaanɔ yaase waai ale diema ayen wa goa ale ni magadek diila. Ate wa baga a bo le ni. 36Ni kan bek a yaali jabuui wa jigi ya, alege ni a chali ni Wenni, ate ni tɛŋka denɔ a baga a kasim a bo ale ni. 37Ni kan pai ligra a peem a te wa a yaali viila yaase ni pai ŋandiinta a da te wa a yaali nyuenta. 38Mi ale Naawen ni Wen dii ale ta ni nyini Ejipiti a nyini ayen m pai Keenan tɛŋka a te ni abe m chim ni Wen.

39Ni tɛŋka nuru a dan wobsa a pai wadek a da te ni, ni kan basi ate wa a tom ase yɔma la. 40Ni a nye ase waai ate ni pai wa ase tuimtomdik la yaase waai ale diem bo ale ni la. Se wa tom a te ni a ga paari Ŋmanpateka Beinni. 41Ate ni yaa basi wa le wa bisaŋa ate wa ŋman cheŋ wadek dɔkku jigi ale wa kokpieŋsaŋa ŋantaŋa jigi. 42Dii nyiŋla Izirali demma ka mi yɔm, baai ate mi a ta ba nyini Ejipiti a nyini. Ba kan pai ba a da ase yɔm la. 43Ni kaa nya ba zuk ale gaasa, alege ni a chali ni Wenni.

44<< <Ni yɔmma, nidoaba ale nipooba a magsi ba nyini ka tɛŋ sii ale gilim ni la. Ni da ni yɔmma tɛŋ sila po. 45Ni baga a da baai ale diem maa bo ale ni la kama ale baai ate ba dɔkku a biak ni tɛŋka po la, ate ba chim ni nuruba ate ni soa ba. 46Ni baga a pai ba kama a te ni bisaŋa ate ba a soa ba ate ba chim yɔm ba boka po meena, alege ni kaa nya ni Izirali dem chaama zuk ale gaasa.

47<< <Ase nichaanɔ yaase waai ale diem bo ale ni la a dan jigsi alege ate ni tɛŋka denɔ a chim jajak a pai wadek a da te nichaanɔwa buuni, 48wa ta suik kama ate ba da a tuesi wa, wa le pai wadek a da la ŋaaŋnyiŋ. Wa mabisaŋa wanyi a baga a da a tuesi wa kama. 49Wa ko suok yaase wa ko suok biik yaase wa le waai ale ka zi yem la a baga a da tuesi wa kama. Yaase wa dan nya wadek wa baga a da a tuesi wadek kama. 50Wa ale waai ale da wa la a piilim a chiini benaŋa a nyini bein dii ate wa pai wadek a da la a ga paari Ŋmanpateka Beinni. Lig ŋaai ate ba tuni a yeeri wa la a magsi ka nuru ate ba pai wa ate wa a tom ate ba a tuni wa la bena ŋala meena. 51Bena yega a dan tali, ku a fɛ ate wa tuni ligra yega a magsi ŋaai ate ba tuni a te wa la. 52Be dan ka bena maga ale tali ate ku paari Ŋmanpateka Beinni, wa chiini ŋa a tuni a magsi a yeeri wadek. 53Ba a nye wa ase waai ate ba a pai wa bein, bein la. Ku a fɛ ate ni nya ku zuk ate wa nyɔnɔwa a kaa nya wa zuk ale gaasa.

54<< <Alege ba dan poom kan da tuesi wa suitaŋa de po, wa le bisaŋa ba basi ba Ŋmanpateka Beinni po, 55diila Izirali demma ka mi ale soa ba ase m yɔm la. Ba ka m yɔm, baai ate m ta nyini Ejipiti a nyini. Mi ale Naawen ni Wenni.

Currently Selected:

Kaabka 25: BWU

Highlight

Copy

Compare