Kaabka 24
24
1Naawen yaa weeni Moosis ayen, 2<<Weeni Izirali demma ate ba ta kpaam buui ale nye nna cheri ate ba ŋmiak a ta nyini kpaam tiib yɔna po a magsi bolim zeuŋtaŋa la ate bolimu a kasim a de. 3Tuka viuku ponni po garuk panni ŋaaŋ Aaron basi ate zeuŋtaŋa a kasim a dɛ Naawen niŋ a nyini junɔi a ga paari saluik daa meena. Ŋmarisika de a magsi ka nama ale ni gaŋsaŋa meena kauk kuui meena ate ni a boro la. 4Wa yik zeuŋtaŋa ale bo cheri ligmɔniŋka jazaanimu zuk a nye a magsi daa meena.
5<<Pai zom naliŋ a nye borobotta pi ale tiye. Pai zom chin nɔi a nye boroborok kunyi meena. 6Dueni ti vuta buye bunyi, tiyuebi bunyi mɛ tiyuebi cheri ligmɔniŋka jazaanimu zuk Naawen niŋ. 7Vuuku kunyi pai ŋan baai nyum ale masa la a dueni du ate ku sak ayen mi ale soa a magsi boroboroku. Ku ka tiirim ate ba ju a te Naawen. 8Boroboroku de a dueni Vuusum dai meena, Izirali demma nyiŋ. Ka nɔiyeŋ kaai ale kasim boro a cheŋ. 9Ka Aaron ale wa nidoabilisaŋa ale soa. Ba dɛ jigi dii ale ta tuilum, dii nyiŋla bu ŋmasi chim ka tuilum juka tiirim buui ale nyini Naawen jigi. Ku kasim ka wa charuk.>>
10Izirali nipok ale wa chorɔ Ejipiti denɔ biik ale nyini a ga nye kpaliŋ ale Izirali denɔ. 11Izirali nipowa biika yaa biisi kaasi Naawen Yuenni ate ba yaa ta wa jam Moosis jigi. Wa mawa yuei jam le Selomit. Dibri ale nyini Dan dɔkku po la lie ale wa. 12Ba yaa lik biika tara ale a limisi ayen Naawen a basi ate ba seba wa le a yaali ayen ba nye diila.
13Naawen yaa weeni Moosis ayen, 14<<Ni ta waai ale lɛ la a nyini nuruma boka jigini a nyini cheŋ peelim. Baai meena ale ka seerɔba a wom la a pai ba nisimaŋa a vi wa zukku alege ate nuruma meena a yuk wa ale tana. 15Weeni Izirali demma ayen, <Waai a dan lɛ wa Wenni ba le yik wa, 16waai ale a lɛ Naawen yuenni la ku a fɛ ate ba ko wa. Nuruma meena a yuk wa a ko. Wa ka nichaanɔ yoo tɛŋ biik yoo wa dan lɛ Yuenni, ku a fɛ ate ba yuk wa ko.
17<< <Waai a dan ko nurubiik, ku a fɛ ate ba ko wa mɛ. 18Waai a dan ko waai duŋ ku a fɛ ate wa tuni ku nyɔnɔwa ale duŋ vuk. 19Nuru waai a dan te wa vaanchoa tuem, wa le nye diila ba nye wa mɛ dila. 20Waai dan wɛ waai jigi ba wɛ wa mɛ dula, wa dan nye waai num dii ba nye wa mɛ dila, wa dan nye waai nyin wari ba nye wa mɛ dila. Wa le te nwala tuem diila ba nye wa mɛ dila. 21Nuru waai a dan ko waai duŋ, wa tuni ka, alege nuru waai a dan ko nurubiik ba ko wa mɛ. 22Sinsak yenaŋa ate fi a te nichamma ale tɛŋ bisaŋa. Mi ale Naawen ni Wenni.> >>
23Ate Moosis yaa biisi te Izirali demma ate ba yaa ta waai ale lɛ Naawen la a nyini nuruma boka jigini a yuk ko. Izirali demma yaa nye dii ate Naawen a weeni Moosis.
Currently Selected:
Kaabka 24: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
