Jeemsi 2

1M suata, nama baai ale ta siaka ale ti Nyɔnɔwa Yeezu Kirisita waai ale ka zula meena nyɔnɔ la, ni kan luk a yaali nuruba gela abe ni basi ba gela.#2:1 Kaabka 19:15 2Ni dan tigsi chaab ayen ni puusi a te Wen ate nuruba baye a jam jo ni tigsika jigini, ate ba wanyi a jo jigsirɔ gatta ale su ligra nifelima ate ŋa a nyaksi, alege nwala mɛ jo garuk tii ale kan nala, 3ni dan te jigsirɔwa zula nna yegayega a weeni wa ayen, <<Nya kali maŋ jigi ale nna,>> alege weeni jajakka ayen wa, <<Cheŋ ga zaani denna,>> yaase <<Kali tɛŋ,>> 4nya kude a sak kama ayen ni a bo ka nuruba buusa dii nyiŋla, ni popolaŋa ka popola baata, ku an nala ate ni a luk chaaba. 5M dek suata, ni wom de. Wen lueri ka baai ate tɛŋzuk de nuruma a poli ayen ba ka ŋanjaksa la ayen ba jigsi ale ba siaka ale Wen, abe ba dɛ Wen naam buui ate wa puulim ayen wa pai a te baai ale a yaali wa la. 6Nama a nye ŋanjaksa ase ba daa nuruba la alege a zuli jigsirɔba baai ale a basi ate ni a nya ninam ale a dari ni a ta a cheŋ boteerɔba niŋ la. 7Bala ale biisi a kaasi yuei maŋ kaai ate Wen a te ni la.

8Ni dan a va Wen naamu sinsak ŋaai ate ba ŋmarisi Wen Gbaŋka po la nalimnyiini ayen, A yaali fi vaanchoa ase fi ale a yaali fidek diila. (Kaabka 19:18) 9Ni dan luk a yaali nuruba gela ale kan yaali ba gela, dila an nala. Kula nyɔnɔwa a tom ka wabiok. Wen Sinsaŋŋa abe le bek wa kama 10dii nyiŋla, waai a dan va wa sinsaŋŋa meena alege jam kaasi dinyi wa kaasi ka ŋa meena. 11Waai ale weeni ayen, Kan nye kaboŋ la, (Nyinika 20:14) mɛ ale weeni ayen, Kan ko nuru, (Nyinika 20:13) yɔgyɔgla de fi dan kan nye kaboŋŋa, alege a ko nuru, fi nye kaasi Sinsaŋŋa kama. 12Ku a fɛ kama ayen ti boro abe ti a poli ayen ti ka nuru baai ate Wen le pai wa sinsak ŋaai ale a vari nuruba a basi la, a bo ti buusa. 13Tama be dan kan basi ate ti boka a nye dila, Wen kan ta jiirim ale ti dii nyiŋla, ti an jam ta jiirim ale ti vaanchaaba. Jiirim nyɔnɔ kan chali yɔgsum ale Wen buusa boka.

14M suata, nuru waai a dan weeni ayen wa ta siaka ale Yeezu alege kan tom tuimaŋsa wa siaka nyiini an baga vari wa a basi, 15ase ni wanyi nin kan ta garuk a jo yaase ŋandiinta a dɛ, 16ate ni wanyi yaa nya wa a weeni wa ayen, <<Wen ale te fu garuk ale ŋandiinta,>> alege kan poom a poli nuruwa ale a yaali fi maarika diila, 17fi siaka ale Yeezu nyuenta ale boa? Dii nyiŋla waai a dan ta siaka ale Yeezu ale kan tom tuimaŋsa ku a sak se siak kala choa kpi kama la. Ka ka kiriya.

18Alege waai ale weeni ayen, <<Nuru wanyi ale a ta siaka, ate wa choa a tom tuimaŋsa.>> Mi ale weeni wa ayen, <<Sak mu nuru waai ale ta siaka ale Yeezu alege kan tom tuimaŋsa la. Mi ale tom tuimaŋsa a sak nuruba ayen mi ta siaka ale Yeezu kama.>> 19Fi ta siaka ayen Wen ka dinyi dekki a boro?#2:19 Teerika 6:4 Kula ka wensie. Chichirik baataŋa mɛ a ta siaka kama ayen Wen ka dinyi dekki a boro. Si a chali wa yɔgsum mɛ kama. 20Ni basi ate m weeni sak ni ayen ni ka betta, waai a dan ta siaka ale Yeezu alege kan tom tuimaŋsa, wa siaka kiri ale boa? 21Ni basi ate ti teeri ti kokpieŋka Abrayam wie. Wen jam wi wa kama ayen wayɔrisima nyɔnɔ. Wa yaa jam weeni wa ayen wa yik wa nidoabinni Aizik a ta cheŋ juijui ate ba a kaab la a ko te wa. Wa ale weeni wa dila la, kun beni ya alege ate Abrayam siak ayen wa ko wa te wa. 22Abrayam siaka ale wa tuimaŋa a jam ka bunyi. Wa ale nye diila a sak ti kama ayen wa sum ta siaka ale Naawen kama. 23Wie ŋaai ate ba ŋmarisi gbaŋka po la, ka wensie. Ba ŋmarisi weeni ayen, Abrayam ta siaka kama ale Wen. Ka dila nyiŋ ale soa ate Wen a wi wa ayen wayɔrisima nyɔnɔ (Piilimka 15:6) ate ba wi wa ayen Wen doa la. 24Yɔgyɔgla de ni be basi ate m weeni sak ni ayen ku a fɛ kama ayen waai ale ta siaka ale Wen la a tom ka tuimaŋsa. Be daa wa siaka nyiini ale basi ate wa a chim wayɔrisima nyɔnɔ, ka wa nyeka. 25Ku jam ka dila ale Arayab. Wa jam ka nidoa yaalik nna yegayega. Nuruba yaa jam nyini Izirali tɛŋka po a cheŋ ayen ba mak nya ba dachaasaŋa Jeriko demma. Ba ale jam la, Arayab yaa jam maari ba ate ba nya suik a chali bɛ. Wa nye maŋka de ale basi ate Wen basi ate wa nya varibasika ase Abrayam nye maŋka ale basi ate wa nya varibasika diila.#2:25 Josua 2, 6 26Ni basi ate m ŋman weeni sak ni ayen, ase nuru chiik a dan kan bo wa jigi ya, wa daa javuwa. Waai abe dan ta siaka ale Wen alege kan tom tuimaŋsa, wa siaka daa siak vuuwa, ka kpi kama.

Currently Selected:

Jeemsi 2: BWU

Highlight

Copy

Compare