Amos 9

1Mi nya ka Nyɔnɔwa ale wa za kuŋkuŋku gauŋ a weeni ayen, <<Nak Nyɔnɔwa yenni zaŋŋa ŋmanni ale nyubini a choa. Ŋa ale lo nuru baai ale bo yenni po la meena zuk. Baai ale a tali la m le ko ba ale gebik. Ba waai a kan cheŋŋi. Ba wanyi mɛ a kan chali bɛ. 2Ba dan poom a tu vie a paari kpiluŋ a ga suk dula, mi ale cheŋ a ga yik ba dula. Ba dan chali a jueli wenŋmazuk, dula ate mi ale kasi ba a lɔnsi tɛŋ. 3Ba dan jueli Karmel guuku, mi ale yik ba meena a ta ba siŋ tɛŋ. Ba dan suk badek nyakpiemu tɛŋ dula mi ale basi ate waab a dom ba. 4Ba dachaasaŋa ale yik ba ta ga basi badek tɛŋ po ate m le te ba ko ba. M kan maari ba. M za m kaasi ba kama. M le pai biem nina a nya ba alege daa nalimmoa.>>

5Nyɔnɔwa, Naawen Dii Ale A Dɛ Tugurik Tɔŋdɔma Niŋ La, waai ale a tiri tɛŋka ate ka a nyaliŋ la, ate baai meena ale bo ka po la a kum. Tɛŋka meena a yiti kama ase Nile benni la, a yaa siŋ ase Ejipiti benni la. 6Naawen dii ale sɛ wa yenni wenŋmazuk la ale nye di nyubini tɛŋka zuk la, waai ale basi ate nyakpiemu nyaataŋa a tagli tɛŋka meena la. Wa yuei ale Naawen.

7Naawen ale weeni diila ale nna, <<Izirali demma, nama ale tɛŋ yoŋ dem, ase Kus demma daa bunyi? Mi a yeeri Izirali demma a nyini yontidi po Ejipiti tɛŋka po, Filistia demma nyini Kaftor po ate Araam demma nyini Kir tɛŋka po?

8<<Chekki Nyɔnɔwa Naawen a nya Izirali tɛŋka demma wabaataŋa kama m be za m kaasi ba kama a ta nyini tɛŋka zuk. Alege m kan kaasi Jekob ŋaaŋsaŋa meena.>> Ka Naawen ale weeni. 9<<Mi ale te ka nɔi, ayen tɛŋ yonsa demma a nye Izirali demma ase ba ale a yɛliŋ zom diila a yeeri baai ale kan ta kiri la a basi. 10Wabaata nyama ale maa pulim nuruma po la meena a za ba kpi kama kpaliŋ po, ale baai mɛ ale weeni ayen kaasuŋ a kan paari ba la mɛ la meena.>>

11Naawen ale weeni diila ale nna, <<Dai ale jam ate mi ale ŋman pilim pai Izirali demma pagrimu a te ni ase diipo ate Deevid a jam ka naab la. Ba yie ŋaai ale lo la, mi ale pilim a sɛ ŋa ate ŋa pilim a nye ase ŋa nyiem ale jam ka diila. 12Ate ba pilim a nak tuesi Edom demma ale bo tɛŋ sii po la meena ale tɛŋ sii meena ale ta mi yuenni la.>> Ka Naawen dii ale wa nye wieŋa de la ale weeni.

13Naawen ale weeni ayen, <<Daaŋa a cheena ate naa kpaarɔwa ale gaam cheerɔwa a taam. Ate yɔn pisidɔwa a gaam vukdɔwa a taam. Da paalik ale nyini pinaŋa po a tagli guutaŋa meena zuk. 14M nuruma Izirali demma ale bo tɛŋ yoŋ po la, m le ŋman ta ba a jam badek tɛŋka po. Ba tɛŋsaŋa ale kaasi la mi ale pilim a sɛ si ate ba ale bo si po. Ba ale nya daam a nyu a nyini yɔna ti sii ate ba vuk la po. Ba ale kpa ŋan baai la ale ta ŋandiinta a jam te ba. 15Mi ale te Izirali demma a kali ba tɛŋka po waai a kan ŋman yiak ba a nyini tɛŋ kaai ate mi a pai a te ba la.>> Ka Naawen fi Wenni ale weeni.

Currently Selected:

Amos 9: BWU

Highlight

Copy

Compare