Amos 8

1Nyɔnɔwa Naawen ale pai dii a sak mi la ale nna: Ku jam ka busik ate yɔn ŋaai ale bɛ la a sueri ka. 2Wa yaa bek mi ayen, <<Amos, fi nya ka boa?>> Ate mi a tulisi wa ayen, <<Mi nya ka busik ate yɔn ŋaai ale bɛ la a sueri ka.>> Naawen yaa weeni mi ayen, <<M nuruma Izirali demma daaŋa a paari kama. M kan ŋman vɔŋ a te ba. 3Nyɔnɔwa Naawen ale weeni diila ale nna, <<Va ŋala po Wen yenni po yiilaŋa a za ŋa labri a chim ka kumsa. Nuruba yegayega ale za ba kpi ate ba yuk ba nyiŋsaŋa a basi jigi meena nna dikdik!>>

4Dila nyiŋla ni be wom, nama baai ale a vari niwomma ale a yiak ŋanjaksa tɛŋka po la. 5Ba weeni ayen, <<Ka dimpo ate Chi Paalika ale taam ate ti pai ŋanbie a da, abe Vuusumu Danni a kpeglim ate ti gerim ŋanbie?>> Abe ti a ŋmak ŋanmagsintaŋa, a vi ŋanta diak, abe ti pai venta ŋanmagsintaŋa, a nye dɛ gaamka ale nuruba. 6Kpana ate ni pai a da ŋanjaksaŋa ale pai nuesa mɛ a da baai ale kan ta la. Ni pai ka ŋanbie ale ŋanfokla gum chaab a da. 7Jekob Kanjantaŋa nyiŋ Naawen a pɛ kama ayen, <<M kan baŋ wie ŋaai meena ate ba nye la.

8<<Tɛŋka a kan choa kude nyiŋŋa, ate baai meena ale bo ka po la a kum? Tɛŋka demma meena za ba yiti kama ase Nile benni la. Bu le choa a ŋman siŋ ase Ejipiti benni la.>>

9Nyɔnɔwa Naawen ale weeni ayen, <<Va ŋala po m le basi kama ate wenbinni a kpabi siŋ kantueŋ po ate legi ale bo tɛŋka meena. 10Mi ale labri ni suitaŋa tiŋŋa ate ŋa chim kuub kumsa ate ni yiilaŋa yika a chim kumsa. Mi ale nye kama ate ni meena a jo boorisa gatta abe ni poni ni zuimaŋa. Mi ale nye va ŋala po ate ŋa nye ase ka waai ale ta wa bi yeŋ ate wa kpi alege wa la. Ate va ŋala kpeglimka danni, a za ku toa kama.>>

11Nyɔnɔwa Naawen ale weeni ayen, <<Daaŋa a cheena kama ate mi ale basi ate kom le jam tɛŋka po, daa ŋandiinta kom yaase nyanyuila kom alege ka Naawen wieŋa womka kom. 12Nuruba ale wuuri bela meena po, ba ale nyiem a nyini wiiluk geŋsa a ga paari kori geŋsa a gisi Naawen wari alege ba kan nya di.

13<<Va ŋala po nipok kalaasa baai ale nala la ale nidoabili paalisa baai ale pagra la a za ba cha kama nyanyuila nyiŋ. 14Nuruma de baai ale a pɛ Samaria bɔgtaŋa yaase Dan wenni yaase Beerseba tangbanaŋa la, ba za ba lo kama ba kan ŋman yiti ŋmai ya.>>

Currently Selected:

Amos 8: BWU

Highlight

Copy

Compare