Amos 7

1Nyɔnɔwa Naawen ale pai dii a sak mi la ale nna. Ase ba ale jam a yaali naawa wuutaŋa ate wa jam pai a te duŋsa la a nueri la, wa jam gomsi ka tintue ate ŋa piilim a dɛ wubuluku ale jam a nyini la. 2Ate tintueŋa ale jam dɛ wuutaŋa a nueri la, mi yaa kaari ayen, <<Nyɔnɔwa Naawen dii ale zuak la Jekob dɔkdemma ate ba nye ka sɛ a vuugi? Vɔŋ a te ba dii nyiŋla ba an piisi ya!>>

3Dila nyiŋla Naawen a yaa tagri wa popola. Naawen weeni ayen, <<M kan basi ate dila a nye.>>

4Nyɔnɔwa Naawen ale pai dii a sak mi la ale nna. Nyɔnɔwa Naawen a jam gomsi ka bolim ayen wa pai a bo ba buusa. Bolimu a jam dɛ ba beli kpienni kama ale ŋman chɔgsi tɛŋka meena a dɛ. 5Ate dila nyiŋ mi yaa kum ayen, <<Nyɔnɔwa Naawen, fi nuruma Jekob buuni an soa diiya, fi dan te wanni de choa a jam ba jigi ba waai a kan vuugi!>>

6Dila nyiŋla Naawen a yaa tagri wa popola. Nyɔnɔwa Naawen a weeni ayen, <<M kan basi ate dila mɛ a nye.>>

7Wa ale pai dii a sak mi la ale nna. Nyɔnɔwa jam za ka siak kaai ate ba jam pai magsika miik a sɛ la tɛŋ, ate magsika miika a bo wa nisa po. 8Naawen yaa ŋman jam bek mi ayen, Amos, <<Ka boa ate fi nya?>> Mi yaa tulisi wa ayen, <<Mi nya ka ja magsim.>> Ate Nyɔnɔwa yaa weeni mi ayen, <<M pai ka ja magsim a dueni Izirali demma suŋsuŋ. Mi kan ŋman vɔŋ a te ba. 9Aizik pimpitimaŋa ale kaasi. Izirali demma Wenni diinaŋa ale ŋɔriŋ. Mi ale nye kpaliŋ ale Jeroboam yenni.>> 10Betel kaabteerɔwa Amaziya yaa jam te Izirali naawa Jeroboam nɔi ayen, <<Amos a ta ka biem popola a va fi zuk Izirali nyiŋ. Tɛŋka an baga a pigi wa wieŋa meena. 11Amos abe ale weeni diila ale nna, <Jeroboam a za wa kpi ka kpaliŋ po ate tɛŋ yoŋ dem za ba yik Izirali demma, ate ka yalima ale badek tɛŋka.> >>

12Ate Amaziya a yaa weeni Amos ayen, <<Biisiteerɔ ŋman pilim a cheŋ Juda a ga biisi Wen wanni abe fi a dɛ dula. 13Kan ŋman biisi wari Betel, dii nyiŋla ka naawa wen yeri ale tɛŋka wen yeri.>>

14Amos yaa weeni Amaziya ayen, <<Mi daa Wen biisiteerɔ yaase m ka Wen biisiteerɔ biiga. Alege mi jam chim ka naapeerik ale ŋman jam a nya kinkaŋsa zuk. 15Alege mi ale jam a nya piisaŋa zuk la, Naawen a yaa weeni mi ayen, <Cheŋ a ga weeni m wanni a te m nuruma Izirali demma.> 16Yɔgyɔgla de ni yaa be wom Naawen wanni. Ni weeni kama ayen, m kan biisi kaasuŋ a te Izirali ale Aizik dɔkdemma.

17<<Dila nyiŋla Naawen ale weeni diila ale nna, <Ni pooma ale chim ka taabuksa tɛŋ kpieŋka po, ate ni nidoabilisaŋa ale ni liema ba ko ale gebik. Ba le magsi ni tɛŋka a lab ka te nuruba, tɛŋ kaai ale ka tɛŋ chaŋ la ate ni kpi dula. Ate ba za ba yik Izirali demma badek tɛŋka po a ta ba a ga basi tɛŋ yoŋ po ate ka yalima ale ba tɛŋka.> >>

Currently Selected:

Amos 7: BWU

Highlight

Copy

Compare