Amos 6

1Ku ale tua a te nama baai ale a dɛ masim ni suiniima po Zayon po la kama, ale baai ale ta sebchakka ayen ba baga a nya sukka Samaria Guuku zuk la, ale Izirali nisɔm baai ate nuruba a jam ba jigi la. 2Ni cheŋ Kalne ga nya ku ale ka diila, ni dan nyini dula ni cheŋ Yamat ale zuak diila, abe ni cheŋ siŋ Gat ale bo Filistia po la. Ba tɛŋsaŋa a zunchoŋ nama naata buyewa kama? Ba tɛŋsaŋa a zuak gaam nama tɛŋsaŋa kama? 3Nama a zɛri kama ayen kaasuŋ dai an cheena. Alege ni ale a nye diila a ta di a moata kama. 4Gaduata ate ba pai yauk nyina a gobi ate ni a duak ti zuk a dɛ ase nyiŋworuk nyam la. Ni a ŋɔbi ka pabisa ale naabisa sii ale biigi ate ni a yaali la. 5Ni a yaali ka ni a yi yiila ase Deevid la, ate ni pai ni kpantaŋa a nak 6chin kpiema ate ni pai a nyu daam ale pai kpa nyuntisa a sa ni nyiŋsaŋa, Josefi buuni ale waaŋ la ku kan daani ni. 7Dila nyiŋla nama ale ni dɛ niŋ ate ba yik ni a ta cheŋ tɛŋ yoŋ po, ni ŋandiinta tiŋŋa ale masim buui ate ni a dɛ la ale kpeglim.

8Nyɔnɔwa Naawen a pɛ ka wadek nyiŋ. Naawen, Wen Dii Ale A Dɛ Tugurik Tɔŋdɔma Niŋ La ale weeni ayen, <<Mi a kisi Jekob kanjantaŋa kama ale kan cheem a nya wa yie pagrisaŋa. M le pai tɛŋ kpieŋka ale jaab meena ale bo ka po la a te.>>

9Ase nidoaba pi a dan tali bo yeri po, ba mɛ za ba kpi kama. 10Ate kpiema nuru a dan jam ayen wa pai kpiema a ta ga nye kuunaŋa a yaa bek waai ale diem suk bo yenni po la ayen, <<Waai a bo ale fu?>> Ate wa weeni ayen, <<Aaya.>> Ate wa yaa weeni ayen, <<Limisi! Ti an magsi ayen ti wi Naawen yuenni.>>

11Dii nyiŋla Naawen a te ka nɔi, ayen wa ale ŋɔriŋ yie kpiemaŋa nna gela gela abe yie fiisaŋa wa nye ŋa nna yisayisa.

12Wusuma a baga a chali yegayega piuŋ kpiema po? Nuru baga a yik niiga a kpa nyakpiemu po? Alege nama labri nyemagsika kama ate ka chim choŋ alege ate wayɔrisima yɔna a toa.

13Ni ale nak dɛ Lo Debar tɛŋka la, ni sue a peenti kama a yaa a weeni ayen, <<Daa nidek pagrim ate ni pai nak a vari Karnaim?>> 14Dila nyiŋla Naawen, Wen Dii Ale A Dɛ Tugurik Tɔŋdɔma Niŋ La a weeni kama ayen, <<Mi ale siti tɛŋ a basi ni nyiŋ Izirali demma, ate ba ale namsi ni, ni boka jigini meena a ta nyini Yamat a ta ga paari Araba viaka.>>

Currently Selected:

Amos 6: BWU

Highlight

Copy

Compare